Sa mutokwiibaluka nshotwakeeya kuswa mumitwi ipusenepusene yamu Njashi Yamulindilishi yamu 2020? Amucane shikumbulo kumiipusho itookonkelawo:

Ino bananikitwe tulyeelete kunoobabona buyani?

Tulalumba paceebo calushomo lwabo; sombi tatweelete kunoobabona anga balindite bamwi. Tatweelete kunokonkela muntu mbuli ‘mutanjilili wesu.’ (Judi 16) Tatweelete kubeepusha mbocakalinga kwaamba ayi bananikwe.—w20.01, pe. 29.

Ino nciinshi ceenga camupa kushoma ayi Yehova alamubikila maano?

Baibo ilatondesha ayi wakamushiba kamutana kushalwa. Alimwi alakutika mipailo yanu. Alishi miyeeyo yanu alimwi ashili mukati kamoyo wanu, alimwi nshomucita shilamukuma. (1 Maka. 28:9; Tus. 27:11) Wamusenya pafwiifwi anguwe.—w20.02, pe. 12.

Ino ndilili ndyetweelete kwaamba andyetweelete kuumuna?

Tulakondwa kwaamba pali Yehova. Tatuloondi kucafwa mukwesu na nankashi na watalika kucita shintu sheenga shapa kwaamba ayi acite cilubo. Bamanene balalulika baabo batoyandika kululikwa. Tatwaambi sha ncito yesu mboitoocitwa mushishi moyakakashikwa. Tatuyubululi makani abushishi.—w20.03, mape. 20-21.

Ino mbupusano nshi buli pakati ka nsoshi shaambwa mu Jowelo capita 2 asheesho shaambwa mu Ciyubululo capita 9?

Jowelo 2:20-29 ilaamba ayi Lesa alaakutandaanya cisoshi alimwi akushomesha ayi alaakulipila pashoonse shakanyonyoolwa kucisoshi. Kuswawaawo, Lesa wakatila mushimu wakwe. Mbasu ishi shakakumanishikwa ciindi bene Babiloni ndyebakesa mukulwana bene Isilaeli alimwi amukuya kwaciindi. Ciyubululo 9:1-11 ilasansulula bananikitwe abo batokwaambilisha cakutaloonda makani aboomboloshi bwakwe Yehova pa bweende bwashintu bubiibi ubu, aboobo abo babete kulubasu lwa cishi balanyumfwa cibiibi.—w20.04, mape. 3-6.

Ino mwaami wakumatwa ngani pacecino ciindi?

Mfulumeende ya Russia ashishi shisebensela pomwi anjiyo. Balalwana bantu bakwe Lesa kwiinda mukukasha ncito yakushimikila kutondesha ayi balipatite Bakamboni. Mwaami wakumatwa watolelela kupikishanya amwaami wakumalenge.—w20.05, pe. 13.

Sa “shisepo sha mushimu” nshilya sheenkabo shaambwa palilembo lya Bene Galatiya 5:22, 23?

Sobwe. Mushimu usalashi ulatucafwa kuba amibo imwi ibotu mbuli bululami. (Efe. 5:8, 9)—w20.06, pe. 17.

Ino ndipenshi nshi lyomwi ndyeenga muntu wacana na kaabika makani nabi shikope pa intaneti?

Shikope na mavidyo ngomubika pa intaneti inga apa bamwi kubona anga mulalibonesha, muciindi cakuliceesha.—w20.07, mape. 6-7.

Ino Beneklistu inga beeya nshi kuswa kucakubonenaako ca beshikucata nswi bacishi kabotu ncito?

Balaya kumisena nkweenga bacata nswi alimwi apaciindi nceenga bashicana. Baleeya bwakusebensesha shisebensesho sheelete. Alimwi balasebensa cakubula boowa mushiindi shipusenepusene. Aswebo mbweenga twaciita muncito yakushimikila.—w20.09, pe. 5.

Ino nshiinshi nsheenga twaciita kwaamba ayi tucafwe shikwiiya Baibo kuyumya lusuno lwakwe pali Yehova?

Inga twabayuminisha kubelenga Baibo bushiku abushiku akukutumana kuyeeya nshebabelenga. Alimwi inga twabacafwa akwiiya bwakupaila.—w20.11, pe. 4.

Ino mbaani beelikitwe mumaswi akwaamba ayi: ‘Kubushikwa kwa bantu boonse kulaakuba kwiinda muli Klistu’?—1 Koli. 15:22.

Mutumwi Paulo taakalinga kusansulula ayi muntu uli woonse alaakubushikwa. Wakalinga kwaamba pa Beneklistu bananikitwe, abo “bakasalashikwa kuba bashikwiiya bakwe Klistu Yesu.” (1 Koli. 1:2; 15:18)—w20.12, mape. 5-6.

Ino bananikitwe balaakucita nshi pesule ‘lyakusandulwa muciindi ciniinibo ceelenebo akukapula kwa liinso, pakulila lupeenga lwakweelaako’?—1 Koli. 15:51-53.

Balaakusebensela pomwi a Klistu incito yakweembela bantu ankooli yaceela. (Ciyu. 2:26, 27)—w20.12, mape. 12-13.