Chi teˇ hkʼawꞈ ve Shaw nyi kuiˬ Taꞈ yehˬ nawˬ hkʼa dehꞈ gʼaw nyi˗oˬ laˇ? Awˬ hawˉ lo ve na hkawˇ chi teˇ hpaˍ htaꞈ nawˬ hkʼawꞈ laˇ sheˍ:

Leuˆ yuˬ piˇ taˍ ve chaw htaꞈ ngaˬ hui hkʼaˬ hkʼe te piˇ cawˇ ve le?

Leuˆ yuˬ taˍ ve chaw yonˍ ve htaꞈ ngaˬ hui awˬ hpfuhˇ shiˍ ve yoˬ. Yaꞈ hkʼaˇ, ngaˬ hui yawˇ hui htaꞈ a yeˇ hkʼe taw maˇ te cawˇ. Ngaˬ hui yawˇ hui htaꞈ “chiˇ uiˍ chiˇ mvuh piˇ” ve maˇ te. (Yuˇdaꞈ 16) Yawˇ hui ve dawˇ law kuiˬ htaꞈ caˉ daꞈ ve ngaˬ hui maˇ na nyi piˇ cawˇ.—w20.01, liꞈ mehˆ hpfuhˇ 29.

Yaˬhoˉvaˬ ngaˬ htaꞈ a yeˇ yuˬ laˇ ve laˇ?

Liꞈ hpu hkʼaw kʼoˆ ve, Yaˬhoˉvaˬ lehˬ nawˬ maˇ paw la sheˍ htaˇ kaꞈ nawˬ htaꞈ a yeˇ yuˬ ve yoˬ. Nawˬ bon lawˬ ve htaꞈ yawˇ na chehˇ leh, nawˬ hkʼaˬ hkʼe dawˇ ve htaꞈ yawˇ shiˍ ve yoˬ. Nawˬ te ve awˬ ceuˬ Gʼuiˬ sha htaꞈ heuˆ la kuiˬ cawˬ ve yoˬ. (1 Raˍsaˍvanˍ 28:9; Tawˇ naˉ ve 27:11) Yaˬhoˉvaˬ lehˬ nawˬ yawˇ geh laˬ tuˬ gʼaw veu laˇ shehˍ hpaˇ hpehꞈ ve yoˬ.—w20.02, liꞈ mehˆ hpfuhˇ 12.

Tawˇ yaw cawˇ ve awˬ yanˇ hkʼaˬ hkʼe htaˇ le?

Yaˬhoˉvaˬ ve awˬ lawn ngaˬ hui hkʼaˬ htaˆ kaꞈ yaw tuˬ gu hehnˇ taˍ cawˇ ve yoˬ. A shu teˇ gʼaˇ uiˍ jaˇ ve venˇ baˆ htaꞈ te yaꞈ˗a te ve ngaˬ hui mawˬ htaˇ, yawˇ geh tawˇ ca yaw daꞈ cawˇ ve yoˬ. Chaw teˇ hpaˍ beˆ maˍ piˇ cawˇ ve tehꞈ nyi haꞈ shaˉ paˍ mawˬ htaˇ, tawˇ yaw cawˇ ve yoˬ. A hkaw˗anˬ maˇ gʼa ve mvuhˇ miˬ lo awˬ viˉ awˬ nyi Gʼuiˬ sha ve kanˉ te ve htaꞈ caˉ daꞈ ve shiˍ tuˬ, awˬ lawn awˬ tanˇ kʼoˆ laˇ tuˬ maˇ nyiˉ piˇ cawˇ. Leh maˇ shiˍ keunˍ maˇ shiˍ cawˇ ve awˬ lawn ngaˬ hui maˇ kʼoˆ.—w20.03, liꞈ mehˆ hpfuhˇ 20-21.

Yawˇlaˆ liꞈ kaˇ nanˉ uiˍ 2 hkʼaw ve paˉ ceꞈ awˬ moˍ lonˉ leh Hpeuꞈ maˍ ve liꞈ kaˇ nanˉ uiˍ 9 hkʼaw ve paˉ ceꞈ teˇ hpaˍ hkʼaˬ hkʼe peun daꞈ ve le?

Yawˇlaˆ liꞈ 2:20-29 hkʼaw kʼoˆ ve, Gʼuiˬ sha paˉ ceꞈ moˍ lonˉ htaꞈ gʼaꞈ kʼoˬ piˇ leh paˉ ceꞈ moˍ lonˉ te luˬ taˍ ve htaꞈ Gʼuiˬ sha kʼawꞈ shaiˍ laˇ tuˬ yoˬ tehꞈ ka tiꞈ te taˍ ve yoˬ. Baˍbuˍlonˍ ve maꞈ yaˇ Iˉsaˍreˍlaˆ chaw htaꞈ ca bawˆ la htaˇ, awˬ lawn chi awˬ tehˬ hpehꞈ la ve yoˬ. Yawˇlaˆ kʼawꞈ kʼoˆ sheˍ ve, Gʼuiˬ sha ve kanˇ paˆ piˇ tuˬ yoˬ. Chi Peˍteˍkoˆte awˬ nyi htaˇ awˬ tehˬ hpehꞈ la ve yoˬ. Hpeuꞈ maˍ ve liꞈ 9:1-11 hkʼaw kʼoˆ ve, ngaˬ hui ve awˬ co˗e leuˆ yuˬ taˍ ve chaw paˉ ceꞈ awˬ moˍ lonˉ htaꞈ shuˍ ve lehˬ haiˬ ve miˬ guiˬ chi htaꞈ Gʼuiˬ sha suhˉ jehˬ ve awˬ lawn hto toˇ ve yoˬ. Gʼuiˬ sha ve canˇ paˍ htaꞈ tuꞈ hkanˍ jaˇ tuˬ te piˇ tuˬ yoˬ.—w20.04, liꞈ mehˆ hpfuhˇ 3-6.

Chi beuꞈ teˇ co˗e ‘awˬ na hpawˇ ve jawˇ mawˇ’ a shu le?

Ruˆsaˆ leh yawˇ hpawˇ chehˇ ve mvuhˇ miˬ yawˇ hui Gʼuiˬ sha ve chaw htaꞈ hteˇ˗ehꞈ caˉ daꞈ leh hto toˇ ve kanˉ htaꞈ tawˍ piˇ ve yoˬ. Yawˇ hui Shaˉhkiˆhkanˍ ve chaw htaꞈ nyi bawˬ jaˇ. Awˬ na hpawˇ ve jawˇ mawˇ awˬ hawˉ hpawˇ ve jawˇ mawˇ htaꞈ bawˆ daꞈ leh chi teˇ hkui kaꞈ bawˆ daꞈ chehˇ sheˍ.—w20.05, liꞈ mehˆ hpfuhˇ 13.

“Gʼuiˬ sha ve Awˬ ha hpu ve awˬ shiˍ nawꞈ la ve” lehˬ, Gaˍlaˍtiˆ liꞈ 5:22, 23 (MGS) hkʼaw bvuhꞈ taˍ ve te hkʼaˇ dawˇ hkʼaˇ teˇ hpaˍ ceh cawˬ˗aw laˇ?

Maˇ heˆ. Gʼuiˬ sha ve daꞈ kehˬ ve awˬ ha hpu lehˬ ngaˬ hui hteˇ ve cawˇ ve, yeunˇ hkanˍ ve, Gʼuiˬ sha htaꞈ yawˆ yaw ve leh awˬ nu ve daꞈ ve awˬ ceuˬ kaꞈ cawˬ tuˬ ga laˇ ve yoˬ. (Eˇfeˇsuꞈ 5:8, 9)—w20.06, liꞈ mehˆ hpfuhˇ 17.

Nawˬ a shu yawˇ awˬ to htaꞈ caˉ daꞈ ve in˗teu˗neꞈ hkʼaw bvuhꞈ keu ve lehˬ luˬ tuˬ hkʼaˬ hkʼe te laˇ ve hehˉ le?

Nawˬ in˗teu˗neꞈ hkʼaw bvuhꞈ keu ve awˬ ceuˬ lehˬ nawˬ uiˍ muiˬ caˆ muiˬ leh nyi ma nuˇ nehˬ ve chaw maˇ hpehꞈ ve tehꞈ shu dawˇ tuˬ te piˇ ve yoˬ hehˉ.—w20.07, liꞈ mehˆ hpfuhˇ 6-7.

Hkriꞈ yaˇ lehˬ ngaˇ ca ve chaw cheuˬ jaˇ ve geh aˬ htoꞈ ma henˇ yuˬ gʼa ve le?

Ngaˇ ca paˍ cheuˬ ve chaw lehˬ ngaˇ chehˇ maˇ jaˇ kuiˬ awˬ ti gʼa shiˍ ve yoˬ. Yawˇ hui keunˍ daꞈ ve laꞈ caˉ yehˇ puiˉ ve yoˬ. Awˬ tcuhˉ awˬ yanˇ maˇ daꞈ ve htawˇ, haꞈ hanˉ ve hkʼaw kanˉ te ve yoˬ. Ngaˬ hui hto toˇ htaˇ kaꞈ chi hkʼa shuˍ shuˍ te ve yoˬ.—w20.09, liꞈ mehˆ hpfuhˇ 5.

Liꞈ hpu henˇ ve chaw Yaˬhoˉvaˬ htaꞈ haꞈ maˇ la tuˬ ngaˬ hui hkʼaˬ hkʼe te gʼa tuˬ le?

Liꞈ hpu henˇ ve chaw teˇ nyi le le Liꞈ hpu gʼaw tuˬ awˬ gʼaˇ piˇ ve, yawˇ gʼaw taˍ ve awˬ ceuˬ htaꞈ dawˇ nyi tuˬ ga piˇ ve, leh bon lawˬ tuˬ awˬ hkʼaˇ kaꞈ maˍ piˇ ve yoˬ.—w20.11, liꞈ mehˆ hpfuhˇ 4.

“Hkriꞈ awˬ hkʼaw lo chaw hkʼa peu˗eˬ kʼawꞈ teꞈ tu la tuˬ” ve awˬ moˍ hkʼaw a shu chehˇ tuˬ ve le?—1 Kawˇrenˍhtuˆ 11:22.

Chaw yaˇ teˇ gʼaˇ le le kʼawꞈ teꞈ tu la tuˬ yoˬ tehꞈ Pawˇluꞈ maˇ gʼa kʼoˆ laˇ taˍ. Yawˇ “Yeˍsuˆ Hkriꞈ htaꞈ pa taw daꞈ la kehˬ la peuˬ” ve leuˆ yuˬ taˍ ve Hkriꞈyaˇ htaꞈ kʼoˆ gaˇ ve yoˬ. (1 Kawˇrenˍhtuˆ 1:2; 15:18)—w20.12, liꞈ mehˆ hpfuhˇ 5-6.

‘Awˬ leh meuˇ ve behˬ heh ma meuˆ ve teˇ yanˇ, teˇ hkui tiˉ mehˆ teˇ meꞈ tiˉ awˬ hkʼaw lo gʼa pa’ peuˬ hkʼawꞈ nawˉ, leuˆ yuˬ taˍ ve chaw hkʼaˬ hkʼe te tuˬ le?—1 Kawˇrenˍhtuˆ 15:51-53.

Yeˍsuˆ juˆ fuiˍ taˬ htaꞈ yehˇ leh mvuhˇ miˬ teˇ hpaˍ uˉ peunˍ ve hkʼaw yawˇ hui kaꞈ uˉ peunˍ tuˬ yoˬ. (Hpeuꞈ maˍ ve 2:26, 27)—w20.12, liꞈ mehˆ hpfuhˇ 12-13.