Kana mubalile ka tokomelo limagazini za Tawala ya Mulibeleli za silimo se? Hamubone nji mwakona kualaba lipuzo zetatama:

Luswanela kuunga cwañi Bakreste babatozizwe?

Lwaitebuha tumelo yabona; kono halu bafangi hahulu mamelelo. ‘Haluikumbuti batu babañwi.’ (Juda 16, litaluso ze kwatasi) Haluna kubabuza mone kutezi kuli batoziwe.—w20.01, like. 29.

Ki lika mañi zemikolwisa kuli Jehova wamilemuha?

Bibele ibonisa kuli Jehova mane naamiziba musika pepwa kale. Mi wateelezanga kwa litapelo zamina. Waziba ze mwa pilu yamina mi waziba zemunahana, likezo zamina likona kumutabisa kamba kutokwa. (1 Makol. 28:9; Liprov. 27:11) Umihohezi ku yena.—w20.02, like. 12.

Ki ifi nako yende ya kubulela ni nako ya kukuza?

Lutabela kubulela ka za Jehova. Lwabulelanga halulemuha kuli mutu yomuñwi ubata kueza mafosisa. Baana-bahulu bafanga kelezo kwa mizwale ni likaizeli babona hakutokwahala. Lwakuzanga haiba lubuziwa ka za mouezezwa musebezi waluna mwa linaha moukwalezwi mi halubuzangi zateñi. Halupatululangi litaba zeli kunutu.—w20.03, make. 20-21.

Bupolofita bobubulela za nziye bobuñozwi kwa Joele kauhanyo 2 bushutana cwañi ni bobuñozwi kwa Sinulo kauhanyo 9?

Liñolo la Joele 2:20-29 libonisa kuli Mulimu uleleka nziye mi usepisa kuli ukakutisa zenesinyizwe ki nziye. Hamulaho wa fo, Mulimu usulula moya wahae. Bupolofita bo, nebutalelelizwe ka nako yeo Mababilona nebataselize Maisilaele ni ka nako ya kwapili. Liñolo la Sinulo 9:1-11 libulela za nziye yeyemela Bakreste babatozizwe babapila mwa linako zaluna habanze bakutaza kuli Mulimu ukaatula lifasi lelimaswe le, mi taba yeo ifilikanya hahulu batu babaswalisana ni lona.—w20.04, make. 3-6.

Ki mañi mulena wa kwa mutulo kacenu?

Ki naha ya Russia ni linaha zeswalisana ni yona. Lilwanisa batanga ba Mulimu ka kukwalela musebezi wa kukutaza ni kutoya batanga ba Jehova. Mulena wa kwa mutulo uzwelapili kulwanisana ni mulena wa kwa mboela.—w20.05, like. 13.

Kana “muselo wa moya” ukopanyeleza feela tulemeno totu 9 totubulezwi kwa liñolo la Magalata 5:22, 23?

Batili. Moya okenile ukona kulutusa kuba ni tulemeno totuñwi totunde, totucwale ka kuluka. (Maef. 5:8, 9)—w20.06, like. 17.

Ki nto mañi yemaswe yekona kuezahala haiba mubeya litaba zamina fa Intaneti?

Zemubeya fa Intaneti likona kutahisa kuli batu babañwi banahane kuli mwaikutwisisa.—w20.07, make. 6-7.

Bakreste bakona kuitutañi kwa mandui babaziba hande kueza musebezi wabona?

Bayambanga litapi ka nako yebakona kufumana litapi ni kwa sibaka kobakona kulifumana. Balutilwe mwakuitusiseza lisebeliso zeswanela. Banani bundume mi bazwelangapili kusebeza miinelo niha icinca. Ni luna lwakona kueza nto yeswana mwa bukombwa.—w20.09, like. 5.

Lukona kutusa cwañi baituti baluna ba Bibele kutiisa lilato labona ku Jehova?

Lubasusueze kubalanga Bibele zazi ni zazi ni kunahanisisa zebabala. Mi lubalute kulapela.—w20.11, like. 4.

Pulelo ya kuli: “Kaufela bakazuha ka Kreste” ikopanyeleza ni bo mañi?—1 Makor. 15:22.

Muapositola Paulusi naasatalusi kuli batu kaufela bakazusiwa kwa bafu. Naatalusa Bakreste babatozizwe, bona “babakenisizwe ka Kreste Jesu.” (1 Makor. 1:2; 15:18)—w20.12, make. 5-6.

Ki musebezi mañi obaka eza babatozizwe hamulaho wa ‘kufetulwa mwa kukobya kwa liito, ka nako ya tolombita ya mafelelezo’?—1 Makor. 15:51-53.

Bakaswalisana ni Kreste kulisa batu ka mulamu wa sipi. (Sin. 2:26, 27)—w20.12, make. 12-13.