Komana mwatañili nakanañachima yibaaba yachinu chaaka yaKaposhi Kakutalila? Esekenu kwakula awa malwihu:

Twatela kuyimonaña ñahi akwaKristu awayishewa?

Twayihamekaña hamuloña wachikuhwelelu chawu, ilaña hitwaswejaña kuyilemeshaku. Twatondolwelaña ‘kulemesha antu kumesu. (Yuda 16) Hitwayihulaña malwihu kutalisha hakuchiñeja kwawuku.—w20.01, ifu. 29.

Yumanyi yinateli kuyiletesha mukuhweleli chikupu nenu Yehova wayiluka?

Bayibolu yamwekeshaña nawu wayilukili henohu kanda muvwaliki. Nawa watiyaña kulomba kwenu hamuntu-hamuntu. Weluka yuma yidi mumuchima wenu nawa neluki yuma yimunakutoñojoka. (1 Kushi. 28:9; Yish. 27:11.) Wayikokela kwakwihi nayena.—w20.02, ifu. 12.

Yakutalilahwinyi yinakumwekesha mpinji yakuhosha nimpinji yakumwena?

Twahoshaña hadi Yehova. Neyi tumona netu muntu nakwila chuma chikuletesha yavulumuni. Akulumpi ahoshaña kulonda amufumbi muntu. Hitwatela kushimuna (hela kwiluka) nsañu kutalisha hamudimu wetu mumatuña mwalekeshawuku. Hitwashimunaña nsañu yakujindaku.—w20.03, mafu. 20-21.

Chaambwinyi chidi hakachi katuboola tudi muYoweli kapetulu 2 natudi muChimwekeshu kapetulu 9?

Yoweli 2:20-29 yahosha nawu Nzambi nayifumishimu atuboola nawa nakani ‘kuyifuntishila’ yuma yejima yakisañeniwu atuboola. Hakulondelahu, Nzambi nechili spiritu yindi. Chumichi chamwekeni chelili aBabiloni ayilukuki aIsarela. Chimwekeshu 9:1-11 yalumbulula ambuña aYehova awayishewa, ashimwinaña nakuhamuka wunsompeshi waNzambi wakaletayi hadi kanu kaayi katama nikukojeja akahakwilañaku kutiya woma chikupu.—w20.04, mafu. 3-6.

Hinyi mwanta wakukabeta kakuchimunswa makonu?

Ituña daRussia nimatuña azataña hamu nadu. Anakulukuka antu jaNzambi, kulekesha mudimu wakushimwina nikumwekesha nawu ayihela aYinsahu. Mwanta wakubeta kakuchimunswa natwalekihu kudilwisha namwanta wakukabeta kakuchidiilu.—w20.05, ifu. 13.

Komana yilwilu 9 yashimunawu haAñalija 5:22, 23 diyi hohu yilwilu ‘yanyikabu yaspiritu’?

Inehi. Spiritu yajila yatukwashaña kwikala nanyikabu yikwawu yayiwahi chidi neyi, kuloña. (Efwe. 5:8, 9)—w20.06, ifu. 17.

Wubanjinyi wekala mukutudika nyevulu yenu ninsañu yikwawu haInteneti?

Nsañu yimukutudika yikumwekesha nawu munakuditumbakesha nawa himwadizozaku.—w20.07, mafu. 6-7.

Indi akwaKristu akwakukalakala anateli kudizila kwodi kudi ayibinda anshi akuluka yitembi?

Azataña mpinji yatelela nawa azatilaña kunateli kuwanawu inshi. Eluka chakuzatisha yitwa yatelela. Nawa azataña nakuhamuka mpinji yidi yejima. Ninetu dichitwatela kuzataña mumudimu wakushimwina.—w20.09, ifu. 5.

Munjilanyi mutunateli kuyikwashila atudizi etu aBayibolu kumukeña Nzambi?

Twatela kuyikolesha atudizi aBayibolu atañeña Bayibolu mafuku ejima nikutoñojoka chikupu hayuma yinakutañawu. Nawa twatela kuyidizisha chakulomba.—w20.11, ifu. 4.

Anyi anabombeliwu mumazu akwila nawu: “Ejima akekala nawumi kuhitila mudi Kristu”?—1 Kor. 15:22.

Kapostolu Pawulu hahosheleña nindi antu ejima akayisañulaku. Wadiña nakutena akwakristu awayishewa, “ajilikawu dehi kwikala atumbanji twaKristu Yesu.” (1 Kor. 1:2; 15:18)—w20.12, mafu. 5-6.

Chumanyi chakelawu awayishewa hanyima yakwila ‘anayihimpi dehi neyi mukulabula kwadisu hampinji yakavuma mpuña yakukumishaku’?—1 Kor. 15:51-53.

Akazatila hamu naKristu hakubiña antu nakabama kachikuñu. (Chim. 2:26, 27)—w20.12, mafu. 12-13.