Tûn kum chhuak Vênnainsâng-te chu ngun takin i chhiar tawh em? A hnuaia zawhnate hi i chhân theih leh theih loh hriat i tum dâwn nia:

Engtin nge hriak thih Kristiante chu kan cheibâwl ang?

An rinna chu ngaihlu hle mah ila, anni chu a lutukin kan ngaihven lo vang. “Mi tlawn” chu kan pumpelh a ni. (Juda 16, C.L. Re-edited) An beiseina chungchângah mi mal zawhnate kan zâwt lo vang.—w20.01, p. 29.

Jehova’n mi mal takin a hria che tih engin nge rinnghehtîr che?

Bible chuan Jehova’n i pian hma aṭang daih tawhin a hria che tih a târ lang a. Chu bâkah, i ṭawngṭainate chu a hria a. I ngaihtuahnate leh i thinlunga awmte pawh a hriain, i thiltihte chuan a chungah nghawng a nei a ni. (1 Chro. 28:9; Thuf. 27:11) Ani chuan a lamah a hîp che a ni.—w20.02, p. 12.

Ṭawng hun leh ngawih hun chungchânga entîrnate chu eng nge ni?

Jehova chanchin chu sawi nuam kan ti hle a. Mi tuemawin kawng dik lo a zawh ṭan tih kan hmuh chuan kan hrilh nghâl vat a ni. A ṭûl chuan kohhran upate’n fuihna an pe bawk. Mahse, kan rawngbâwlna khap behna rama kan hnathawh dânte chu mite hnênah chipchiar takin kan sawi (a nih loh leh hrilh) lo va. Thurûkte chu kan sawi chhuak hek lo.—w20.03, p. 20-21.

Engtin nge Joela bung 2-naa khaukhuap chu Thu Puan bung 9-naa khaute laka a danglam?

Joela 2:20-29-na chuan Pathianin khaukhuap rual chu ûm bo vekin, an thil tihchhiatte chu a rûl leh ang tih a tiam thu a sawi a. Chumi hnuah, Pathianin a thlarau a leih a ni. Chu chu Babulon sipaite’n Israel mite an rûn hunah leh a hnuahte a thleng famkim a ni. Thu Puan 9:1-11-na chuan he khawvêl suaksual tak chunga Pathian rorêlna thuchah puang a, khawvêl thlâwptute tihrehawmtu tûn laia khaute ang hriak thihte chungchâng a târ lang a ni.—w20.04, p. 3-6.

Tûn laia hmâr lam lal chu tu nge ni?

Russia leh a ṭanrualpuite an ni a. Anni chuan Pathian mite chungah tlang takin nghawng an nei a, thu hrilh rawngbâwlna chu khap betin, Thuretute an huatzia an lantîr a. Hmâr lam lal chuan chhim lam lal chu a do reng a ni.—w20.05, p. 13.

Galatia 5:22, 23-a târ lan mize pakuate hi “thlarau rah” pêng awm zawng zawng a ni em?

Ni lo. Thlarau thianghlim chuan felna ang chi mize dang ṭha takte pawh nei tûrin min ṭanpui a ni. (Eph. 5:8, 9)—w20.06, p. 17.

Online-a mahni chanchin pho chhuah a hlauhawm chhan pakhat chu eng nge ni?

I thil pho chhuah chuan mi inngaitlâwm tak ang ni lovin, mi chapo tak angin a lantîr thei che a ni.—w20.07, p. 6-7.

Kristian rawngbâwltute chuan sangha mantu thiam takte hnên aṭangin eng nge an zir theih?

Anni chuan sangha an man theihna hmun leh hunah hna an thawk a. Hmanraw dik tak hmang tûra zirtîr an ni. Dinhmun hrang hrangah huaisen takin an thawk bawk. Kan rawngbâwlnaah chutiang chuan kan ti ve thei a ni.—w20.09, p. 5.

Jehova hmangaihna nei lehzual tûra kan Bible zirpuite kan ṭanpui theih dân kawng ṭhenkhat chu eng nge ni?

Bible chu nî tina chhiar tûr leh an thu chhiarte chhût ngun tûrin kan fuih thei a. Ṭawngṭai dân pawh kan zirtîr thei bawk.—w20.11, p. 4.

“Kristaah chuan mi zawng zawng tihnunin an awm bawk ang,” tihah hian tute nge tel?—1 Kor. 15:22.

Tirhkoh Paula chuan mi zawng zawng kaih thawh an ni dâwn tih a sawi lo va. “Krista Isuaa tihhran,” hriak thih Kristiante chungchâng a sawina a ni. (1 Kor. 1:2; 15:18)—w20.12, p. 5-6.

Hriak thihte chuan ‘tawtawrâwt hnuhnûng ber rîk hun, mit khap kâr lova tihdanglama an awm’ hnuah eng nge an tih ang?—1 Kor. 15:51-53.

Anni chuan Krista nên thîr tiangin mite chungah ro an rêl ang. (Thup. 2:26, 27)—w20.12, p. 12-13.