Munatanda mwamubwa magazini a uno mwaka a Kaposhi ka Kukengela ndi? Nga munatanda, co tumoneni indi mwasa kukumbulula ebi bihula:

Tunapande kumona bati baka-Kilistu bakubwabesa?

Twazema likulahelo lyabo, oloni kutwesi kubasingimika manene. Kutwesi kulibeyela bifwa byabo. Co kutwesi kubehula ngwetu: ‘Bamibwabesele bati?’—w20.01, lipu. 29.

Bika bimilingisa mukulahele ngweni Yehova amizibuka mwamubwa?

Mbimbiliya inamwesa ngwayo Yehova wamizibukile te kanda musemuke. Akatolilila ku malombelo eni. Co lalo, azibuka biyongola byeni nomu mu muli na kulizibila. Bilinga byeni byasa kumuzibisa kubwaha ku mbunge nambe kumuzibisa kubihya. (1 Mizi 28:9; Visi 27:11) Namikoko mangana mukale kuyehi nendi.—w20.02, lipu. 12.

Simbu muka itunapande kwendeka na simbu itunapande kwoloka kulu?

Tukabwahelela mutukendeka bya Yehova. Co lalo, tukendeka mutukamono munu uje ashaka kulinga byuma bije bimukobelesa mu bukalu. Bakulunu bakanangula munu uje atonda bukwasi. Oloni tukoloka kulu nga munu ashaka ngwendi tulangulule mucili na kwendela cipangi ca kwambulula mu mafuti mubanashoko cipangi cetu. Kutwesi kujombola biñanda bije kubapandele kuziba banu.—w20.03, lipu. 20-21.

Bimbimba babanendeka ku Njwele capita  2 banaliseze bati na baje babanendeka ku Kujombolola capita 9?

Mukanda wa Njwele 2:20-29 unamwesa ngwawo Njambi wabatundisileko, co wakulahesele kwilwisa bije bibabiisile. Munima yebi, Njambi wetilile sipilitu yendi. Ebi byuma byalishulisilile omwo maswalale ba Bambambilone balwisile Baisalele na munima. Mukanda wa Kujombolola 9:1-11 ukewo unendeka bya bimbimba baje bemanena bangamba ba Yehova bakubwabesa baje bali na kwambulula ngwabo Njambi akasompa kano kaye kakabi, co oku kuli na kuzibisa cifwayoyo baje banalikwatasana na kano kaye.—w20.04, lipu. 3-6.

Iya napu mwene wa ku kunto ano matangwa?

Lifuti lya Russia na mafuti aje analikwatasana nalyo. Co banalwisa banu ba Njambi ha kubashokela cipangi ca kwambulula na kuyandesa bandolome na bandokazi babangi. Co lalo, ou mwene natwalelelaho kulilwisa na mwene wa ku mbwela.—w20.05, lipu. 13.

Kuma bifwa bya kupwa 9 bibanatumbula ku Ngalatiya 5:22, 23, bikebyo lika byapwa ‘bushuka bwa sipilitu’ ndi?

Embwe. Sipilitu ya kujela ikatukwasa tukale na bifwa bikwabo byabibwa bya kufwa ngwe busunga. (Efeso 5:8, 9)—w20.06, lipu. 17.

Bukalu muka bwasa kutunda mu kwaka bikupulo na biñanda byetu ha intaneti?

Byuma bimwaka ha intaneti binasa kumwesa ngwabyo muli na kulyalesa, co kumwapwile ba kulikehesa.—w20.07, lipu. 6-7.

Baka-kwambulula basa kulilongesa bika ku baka-kutsiya bisi?

Baka-kutsiya bisi bakapangela ku myela kuje kuli bisi, co lalo bakapanga ha simbu ibasa kuwana bisi babangi. Bakalilongesa kupangesa bikwata binapande, co bakatwalelelaho kupanga mu kusimpa nameme byuma bikaluwa. Netu tunapande kulinga ngoco omwo twambulula.—w20.09, lipu. 5.

Twasa kukwasa bati banu batukalilongesa nabo Mbimbiliya bazeme manene Yehova?

Tunapande kubashongangeya batande Mbimbiliya ha litangwa na litangwa na kusinganyekesesa ha byuma bibatanda. Co lalo, tunapande kubalongesa mwa kulombelela.—w20.11, lipu. 4.

Paulu walumbunwine beya omwo wendekele ngwendi ‘boshe bakasanguka’?—1 Koli 15:22.

Kapositolo Paulu kalumbunwine ngwendi munu woshe akasanguka. Walumbunwine baka-Kilistu bakubwabesa baje ‘banalikwatasana na Kilistu Yesu.’ (1 Koli 1:2; 15:18)—w20.12, lipu. 5-6.

Cipangi muka cibakalinga bakubwabesa mubakatenguluka “bwasi-bwasi ngwe kukapula kwa lisho omwo lupembo lwa kukotoka lukaimba”?—1 Koli 15:51-53.

Bakalikwatasana na Yesu mu kunyunga banu na mulamu wa cikubo. (Kujo 2:26, 27)—w20.12, lipu. 12-13.