¿Á ka̱ʼviún ndiʼi Tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

¿Nda̱saa xíniñúʼu keʼéyó xíʼin na̱ nda̱kaxin Ndióxi̱?

Ndáyáʼvina nu̱úyó saáchi kándíxanína Ndióxi̱, soo va̱ása ndíʼi̱ní-iniyó xa̱ʼa̱ ña̱ kéʼéna. Ta va̱ása ndíku̱nyó sa̱tá na̱ yiví (Jud. 16, nota). Va̱ása ndáka̱tu̱ʼunyóna ndáa ki̱ʼva nda̱kaxin Ndióxi̱ miína á xa̱ʼa̱ inkaka ña̱ʼa (w20.01, página 29).

¿Nda̱chun kándíxayó ña̱ kíʼin Jehová kuenta xíʼin iin tá iinyó?

Ña̱ Biblia káʼa̱nña ña̱ tá kúma̱ní kakuvíyó ki̱ʼin Jehová kuenta xíʼinyó, ta xíniso̱ʼora oración ña̱ káʼa̱nyó xíʼinra. Xíni̱ra ndáaña íyo níma̱yó xíʼin ña̱ ndákanixi̱níyó. Xíʼin ña̱ kéʼéyó kivi sákusuchíyó á sákusi̱íyó-ini Jehová (1 Crón. 28:9; Prov. 27:11). Ta ka̱nara miíyó ña̱ ná kuyatinyó nu̱úra (w20.02, página 12).

¿Ama kúú ña̱ xíniñúʼu ka̱ʼa̱nyó ta ama kúú ña̱ va̱ása xíniñúʼu ka̱ʼa̱nyó?

Kúsi̱í-iniyó tá káʼa̱nyó xa̱ʼa̱ Jehová. Ta saátu xíniñúʼu ka̱ʼa̱nyó xíʼin inkana tá va̱ása va̱ʼa íyo ña̱ kéʼéna. Na̱ anciano táxina consejo ndaʼa̱ na̱ hermano tá xíniñúʼunaña. Va̱ása ndáka̱tu̱ʼunyó ta ni va̱ása nátúʼunyó ndáa ki̱ʼva nátúʼunna xíʼin na̱ yiví xa̱ʼa̱ Jehová ñuu nu̱ú va̱ása táxi na̱ chíñu keʼéyóña. Va̱ása nátúʼunyó xa̱ʼa̱ ña̱ʼa ña̱ va̱ása xíniñúʼu natúʼunyó xa̱ʼa̱ (w20.03, página 20 xíʼin 21).

¿Nda̱chun síín íyo tí ti̱ka náʼnu tí káʼa̱n Joel capítulo 2 xa̱ʼa̱ nu̱ú tí káʼa̱n Apocalipsis capítulo 9 xa̱ʼa̱?

Nu̱ú Joel 2:20-29 káʼa̱nña ña̱ xíkaní chindaʼá Ndióxi̱ tí ti̱ka náʼnu, ta saátu káʼa̱nra ndataxira ña̱ va̱ʼa xa̱ʼa̱ ña̱ sa̱ndíʼi-xa̱ʼa̱rí. Tándi̱ʼi táxira espíritu santora. Ña̱yóʼo ni̱xi̱nuña tá ni̱ki̱ʼvi na̱ ñuu Babilonia ñuu Israel ta ni̱xi̱nutuña tá ni̱ya̱ʼaka tiempo. Apocalipsis 9:1-11 káʼa̱nña xa̱ʼa̱ na̱ nda̱kaxin Jehová ku̱ʼu̱n chí ndiví na̱ íyo tiempo vitin, chi na̱yóʼo kéʼéna táki̱ʼva kéʼé tí ti̱ka náʼnu chi xíʼin ña̱ ndakú-ini káʼa̱nna xa̱ʼa̱ ña̱ keʼé Ndióxi̱ xíʼin na̱ ñuyǐví yóʼo, ta na̱ kítáʼan xíʼin na̱ ñuyǐví yóʼo va̱ása kútóona ña̱yóʼo (w20.04, página 3 nda̱a̱ 6).

¿Ndáana kúú ta̱ rey ña̱ norte tiempo vitin?

Na̱ Rusia xíʼin na̱ kítáʼan xíʼinna. Íxandi̱va̱ʼana xíʼin na̱ hermano, ta va̱ása táxina ña̱ natúʼunna xíʼin na̱ yiví xa̱ʼa̱ Ndióxi̱ ta sáa̱-inina xíninana. Ta̱ rey ña̱ norte kánitáʼanra xíʼin ta̱ rey ña̱ sur (w20.05, página 13).

Gálatas 5:22, 23 káʼa̱nña xa̱ʼa̱ i̱i̱n ña̱ va̱ʼa ña̱ xíniñúʼu kuumiíyó, ¿á ña̱yóʼo kuití kúú ña̱ va̱ʼa ña̱ kúúmií espíritu?

Va̱ása. Chi ña̱ espíritu santo chíndeétáʼanña xíʼinyó ña̱ kuumiíyó inkaka ña̱ va̱ʼa, tá kúú ña̱ keʼéyó ña̱ nda̱kú (Efes. 5:8, 9) (w20.06, página 17).

¿Nda̱chun xíniñúʼu kiʼinyó kuenta tá sándaayó nu̱ú Internet na̱ʼná, video xíʼin comentario ña̱ káʼa̱n xa̱ʼa̱ miíyó?

Saáchi ña̱ sándaayó nu̱ú Internet kivi na̱ʼa̱ña ña̱ ni̱nu kúniyó ta va̱ása vitá íyo iniyó (w20.07, página 6 xíʼin 7).

¿Ndáaña kivi sakuaʼayó xíʼin ña̱ kéʼé na̱ xíni̱ tiin ti̱a̱ká?

Na̱ xíni̱ tiin ti̱a̱ká káchíñuna nu̱ú kivi ndani̱ʼínarí xíʼin tiempo ña̱ kivi ndani̱ʼínarí, xíni̱na kuniñúʼuna ña̱ʼa ña̱ tíinna ti̱a̱ká ta ndakú íyo inina káchíñuna ni nda̱a̱ ndáaka ña̱ kúu. Ta saátu kivi keʼé miíyó tá ku̱a̱ʼa̱nyó natúʼunyó xíʼin na̱ yiví (w20.09, página 5).

¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ kuʼvi̱ka-inina kunina Ndióxi̱?

Kivi ka̱ʼa̱nyó xíʼinna ña̱ ná kaʼvina Biblia ndiʼi ki̱vi̱, chindeétáʼanyó xíʼinna ña̱ ná ndakanixi̱nína xa̱ʼa̱ ña̱ káʼvina, ta saátu ná sanáʼa̱yóna ka̱ʼa̱nna xíʼin Jehová (w20.11, página 4).

¿Ndáana ni̱ka̱ʼa̱n ta̱ Pablo xa̱ʼa̱ tá ka̱chira “xa̱ʼa̱ ta̱ Cristo kúú ña̱ ndiʼina ndataku”? (1 Cor. 15:22).

Va̱ása níkuni̱ kachi ta̱ apóstol Pablo ña̱ ndataku ndiʼi na̱ yiví. Chi tá ni̱ka̱ʼa̱nra “ndiʼina” ni̱ka̱ʼa̱nra xa̱ʼa̱ na̱ nda̱kaxin Ndióxi̱ ku̱ʼu̱n chí ndiví na̱ ndu̱yi̱i̱ ña̱ nda̱kutáʼanna xíʼin ta̱ Cristo Jesús (1 Cor. 1:2; 15:18) (w20.12, página 5 xíʼin 6).

¿Ndáaña keʼé na̱ nda̱kaxin Ndióxi̱ tá ná nasa̱mana chi iin ndakunána nduchúnu̱úna ta iin ndakasinaña tá xa̱a̱ ná tivina trompeta tú tivina nu̱ú ndíʼi? (1 Cor. 15:51-53).

Chindeétáʼanna xíʼin ta̱ Jesús ña̱ kuniʼina yichi̱ nu̱ú na̱ yiví xíʼin yitu̱n tú ka̱a (Apoc. 2:26, 27) (w20.12, página 12 xíʼin 13).