Kunanga kuti makanasa kuverenga musoro jo kujija jo Murindiri jo gore iri here? Kudari makajiverenga, vonanyi dangani mungakwanisa kudavira muvhunjo iji:

Tinodikana kutajisa kudini Makristu okuzojwa?

Tinoreremeja maningi rutendo hwavo, asi atidikani kuvavona inga vanosisira maningi. Itusu atiemuri vandhu. (Juda 16) Atidikani kuvaita muvhunjo ngo pamusoro po vetero yavo.​—Murindiri wo 01/20, pheji 29.

Ngozvapi zvinomukhohwesa kuti Jehovha anosana kumuziva?

Bhaibheri rinokhombija kuti Jehovha waimuziva pikija pomainga mu ndani mucito mabahwa. Iyena anozwa mukumbiro jenyu. Anoziva zviri mu mwoyo menyu no zvamuri kurangarira. Zviito zvenyu zvinomupsasa maningi. (1 Kronike 28:9; Mazwi Akangwara 27:11) Jehovha ambhwine ndiyena wakamukwevera kwaari.—Murindiri wo 02/20, pheji 12.

Ngojapi muezaniso jinokhombija mukuvo wo kuvereketa no wo kunyarara?

Tinodaka patinobhuya ngo pamusoro pa Jehovha. Tinovereketa patinovona kuti ari wese ari kuita ciro cinozomuitisa kuti aite cishaishi cikuru. Vakuru vanovereketa pavanoda kupekeja ariwese mbhangiro. Atidikani kuvereketa povanotikumbira kuti tinange zviri zvese ngo pamusoro po manera ari kuitwa basa redu mu nyika jo kuti irona ririkurambijwa. Atidikani kunanga zviro zvicikadikani kuzivikanwa ngo vamweni.—Murindiri wo 03/20, mapheji 20-21.

Kuitisa kudini ndongwe jinonangwa pa cipauko 2 co bhuku ra Joeli jakasiyana no jinonangwa pana Apokalipsi cipauko co 9?

Joeli 2:20-3:2 inonanga kuti Mwari waizofundurusa ndongwe jiya, cimwenizve iyena wakagondesa kupoceresa zvese zvakahiwa ngo ndongwe. Pakupera kuita zvondhozvo, waizodurura mujimu wake. Izvo zvaizokwanirisika pa kuphwanywa ko Jerusarema no Vabhabhironi no kumbeji kwatiri kwendari. Apokalipsi 9:1-11 inosanangura kuti ndongwe jinonangwari pa mavhesi aya, jaimirira vokuzojwa vo mu njiku jedu jino, avo vanotokotesa rutongeso hwo nyika ino yakashata, voita kuti vabeseri vavo vatame kujizwa ushoni.—Murindiri wo 04/20, mapheji 3-6.

Ndiani Mambo wo Kanjikazi Nyamasi Uno?

Rusia no vabeseri vayo. Ivona vari kuhwisa kamare vandhu va Mwari, ngo kurambija basa redu ro kucumaera no kukhombija kuti vanonyenya Zvapupu zva Jehovha. Mambo wo kanjikazi na mambo wo kakusi vari kuphikizana.—Murindiri wo 05/20, pheji 13.

Kunanga kuti ‘mucero wo mujimu’ unobatanija basi mugariro jinowanika pana VaGalàsia 5:22, 23? Shanduro yeNyika Itsva

Haiwa. Mujimu mucena unotibesera kuti tisakurire mugariro jimweni jakanaka, jakadari inga ururami. (VaEfeso 5:8, 9)—Murindiri wo 06/20, pheji 17.

Ngoyapi ngozi yo kudira zviro zvenyu mu interneti?

Zviro zvinodihwa mu interneti zvingavonesa kuti imwimwi munoda kujivonesa pacenyu, kuciripi kujidodokesa.—Murindiri wo 07/20, mapheji 6-7.

Makristu anojijenyi ngo vatandi?

Ivona vanoshanda ku ndau yavanoziva kuti vanozobata maningi hove. Vakajijiswa ushoni kushandisa zvo kutanda ndizvona. Cimwenizve, ivona avathyi kubata basa pikija mugariro paunocinja. Itusu tingaitavo zviro zvakafanana mu mushando wedu.—Murindiri wo 09/20, pheji 5.

Tingabeseresa kudini vajiji vedu vo Bhaibheri kuti vade maningi Jehovha?

Tingamuvangisa kuti averenge Bhaibheri njiku jese no kurangarijisisa zvaanoverengaro. Cimwenizve, mujijisenyi manera okuita mukumbiro.—Murindiri wo 11/20, pheji 4.

Ndiani anobatanijwa pa magama a Pauro okuti: “Vese vanozova no uhomi ngo ndava ya Kristu”?—1 VaKorinto 15:22.

Mupostori Pauro aazivi kunanga kuti vandhu vese vaizomuswa. Iyena wainangira Makristu okuzojwa, vese ‘vakanaswa mwa Kristu Jesu.’ (1 VaKorinto 1:2; 15:18)—Murindiri wo 12/20, mapheji 5-6.

Zvicinyi zvinoithwa ngo vokuzojwa pavanopera kucinja ‘pa cimukuvo, pa kupaira jiso, pa kurira ko mbayapaya’?—1 VaKorinto 15:51-53.

Ivona na Kristu vanozohavisa vandhu ngo ndonga yo utare. (Apokalipsi 2:26, 28a, 27)—Murindiri wo 12/20, mapheji 12-13.