Na o badile ka kelohloko dimakasine tša ngwaga wo tša Morokami? Bona ge e ba o ka kgona go araba dipotšišo tše di latelago:

Re swanetše go swara bjang batlotšwa?

Ke nnete gore re leboga tsela yeo ba bontšhago tumelo, eupša ga se ra swanela go ba lebelela ba le bohlokwa go feta bana babo rena ba bangwe. Le gona ga se ra swanela go ba godiša ka tsela e feteletšego. (Juda 16) Ga se ra swanela go ba botšiša gore ba tloditšwe bjang le gore ba ikwa bjang ka seo.—w20.01, letl. 29.

Ke eng seo se swanetšego go go kgodiša gore Jehofa o a go tseba?

Beibele e re botša gore Jehofa o go tsebile le pele o ka belegwa. O kwa dithapelo tša gago. O tseba dilo tšeo o di naganago le seo se lego ka pelong ya gago, e bile dilo tšeo o di dirago di a mo thabiša goba tša mo kweša bohloko. (1 Dikor. 28:9; Die. 27:11) Le gona o go gogetše go yena.—w20.02, letl. 12.

Ke mehlala efe yeo e bontšhago gore re swanetše go bolela neng le gore re homole neng?

Re thabela go bolela ka Jehofa. Re swanetše go bolela ge motho a tshetše melao ya Modimo. Bagolo ba swanetše go bolela le motho yo a itšego ge ba bona a hloka keletšo. Ga se ra swanela go botšiša (goba go ntšha) ditaba mabapi le modiro wa rena dinageng tšeo o thibetšwego. Le gona ga se ra swanela go ntšha diphiri tša ba bangwe.—w20.03, matl. 20-21.

Ditšie tšeo go bolelwago ka tšona go Joele kgaolo 2 di fapana bjang le tšeo go bolelwago ka tšona go Kutollo kgaolo 9?

Joele 2:20-29 e re Modimo o tla rakela ditšie tšeo nageng e bile o be a tla bušetša batho ba gagwe ka baka la tshenyo yeo di e bakilego. Ka morago ga moo Modimo o be a tla ba tšhollela moya o mokgethwa. Boporofeta bjo bo ile bja phethagala ge Bababilona ba be ba hlasela Isiraele le ka morago ga moo. Kutollo 9:1-11 e hlalosa ditšie tšeo lehono di swantšhetšago batlotšwa bao ba bolelago ka sebete gore lefase le le lebe le tlo fedišwa gomme se se dira gore batho ba lefase ba galefe kudu.—w20.04, matl. 3-6.

Kgoši ya leboa ke mang lehono?

Ke Russia le dinaga tšeo di e thekgago. Russia le dinaga tšeo di e thekgago di hlasetše batho ba Modimo ka go thibela modiro wa go bolela ditaba tše dibotse le ka go tlaiša bana babo rena le dikgaetšedi. Kgoši ya leboa e be e dutše e elwa le kgoši ya borwa.—w20.05, letl. 13.

Na dika tše senyane tšeo di lego go Bagalatia 5:22, 23, ke tšona feela tšeo di ‘enywago ke moya wa Modimo’?

Aowa. Moya o mokgethwa o re thuša gore re be le dika tše dingwe tše dibotse tše bjalo ka toka. (Baef. 5:8, 9)—w20.06, letl. 17.

E nngwe ya dikotsi tša go bea dinepe tša gago Inthaneteng ke efe?

Dinepe tšeo o di beago Inthaneteng di ka dira gore batho ba nagane gore o a ikgantšha, e bile ga o na boikokobetšo.—w20.07, matl. 6-7.

Bakriste ba ka ithuta’ng go barei ba dihlapi bao ba nago le bokgoni?

Ba rea dihlapi ka nako yeo di hwetšagalago ka yona le moo di hwetšagalago gona. Ba rutilwe go diriša dithulusi tša maleba. Ba bontšha sebete ka go rea dihlapi le ge go na le madimo ka lewatleng. Le rena re ka ba ekiša modirong wa go dira batho barutiwa.—w20.09, letl. 5.

Tše dingwe tša ditsela tšeo re ka di dirišago go thuša barutwana ba Beibele go rata Jehofa ka mo go tseneletšego ke dife?

Re ka ba kgothaletša go bala Beibele letšatši le lengwe le le lengwe le go naganišiša ka seo ba se badilego. E bile ra ka ba ruta go rapela.—w20.11, letl. 4.

Ke bomang bao ba akaretšwago polelwaneng yeo e rego: “Ka Kriste bohle ba tla phedišwa”?—1 Bakor. 15:22.

Moapostola Paulo o be a sa re gore batho ka moka ba tla tsošwa bahung. “Bohle” bao a bego a bolela ka bona ba akaretša Bakriste ba tloditšwego, e lego bao ba “kgethagaditšwego boteeng le Kriste Jesu.” (1 Bakor. 1:2; 15:18)—w20.12, matl. 5-6.

Ke modiro ofe woo batlotšwa ba tlago go o dira ka morago ga gore ba ‘fetošwe ka go ponya ga leihlo nakong ya phalafala ya mafelelo’?—1 Bakor. 15:51-53.

Ba tla be ba na le Kriste ge a buša ditšhaba ka molamo wa tšhipi. (Kut. 2:26, 27)—w20.12, matl. 12-13.