Kodi imwepo mwawerenga bwino-bwino nkhani za sanza ya Mulindiri za gole lino? Penu mun’ti inde, yezerani kutawira mibvunzo yakutewerayi:

Kodi tin’funika kumbawawona tani abale wathu wa kudzozedwa?

Ifepano timbatenda cikhulupiro cawo, tsono tin’funika lini kumbawatenda mwakupitirira malire. Ifepano timbatcenkha kudabwa kwene-kwene na makhalidwe yawo. (Juda 16) Ifepano timbawabvunza lini kuti atifotokozere bza cidikhiro cawo.—w20.01, tsa. 29.

Kodi n’ciyani comwe cimbakutsimikizirani kuti Yahova ambakuwonani?

Bibliya limbalewa kuti Yahova adakuwonani pomwe mukhanati kubadwa. Ndipo iye ambatetekera mipembo yanu. Iye ambadziwa bzomwe bziri mu mtima mwanu, bzomwe mumbakumbuka, ndipo ambakomedwa na bzomwe mumbacita. (1 Nkhani 28:9; Mimwani 27:11) Iye ambakukwewani kuti mumufenderere.—w20.02, tsa. 12.

Kodi ni nthawe iponi yomwe mungakhale mudanyamala na nthawe yomwe mungalewelewe?

Ifepano timbakomedwa tikambalewa bza Yahova. Tikawona munthu akucita bzinthu bzomwe bzingamucitise pikado, timbamutsimula. Akulu ambalewalewa kuti apereke malango bzikafunikira. Ifepano timbalewa lini momwe basa lathu lakupalizira likufambira m’madziko yomwe basalo lidaletsedwa. Ndipo timbazimbula lini nkhani za cintsintsi.—w20.03, matsa. 20-21.

Kodi pana kusiyana kuponi pakati pa dzombe la m’bukhu la Djoweri kapitulo 2, na la Cibvumbulutso kapitulo 9?

Pa Djoweri 2:20-29 pambalewa kuti Mulungu angadafundusa kutali dzombe, acibwezeresa bzomwe dzombero ladzonga. Patsogolo pace Mulungu angadapereka mzimu wace. Bzimwebzi bzidacitika pomwe acikunda wa Babulo adapita mu mzinda wa Jeruzalemu. Dzombe la pa Cibvumbulutso 9:1-11 likuimira anyakudzozedwa omwe ambadziwisa bza ciyeruzo ca Yahova kwa dzikoli, ndipo bzimwebzi bzimbakalipisa omwe ambalithandizira.—w20.04, matsa. 3-6.

Kodi mbani mambo wa kumpoto ntsiku zino?

Ni boma la Rússia na madziko yanango yomwe yambathandizira bomalo. Mabomayo yakuboneresa kwene-kwene atumiki wa Mulungu, mwa kuwaletsa kucita basa lakupalizira ndipo akucita bzinthu mu njira yakulatiza kuti ambawenga Mboni za Yahova. Mambo wa kumpoto na mambo wa kummwera akadapitiriza kunesana.—w20.05, tsa. 13. 8.

Kodi makhalidwe ya pa Wagalata 5:22, 23 ndiyo yokha yomwe yambacita mbali ya ‘cisapo ca mzimu’?

Ne. Mzimu wakucena umbatithandiza kukulisa pomwe makhalidwe yanango yabwino ninga cirungamo. (Wayefezo 5:8,9)—w20.06, tsa. 17.

Kodi ni ngozi iponi yomwe ingabwere thangwe ra kuikha bzinthu pa mbuto yakucezera ya pa interneti?

Bzinthu bzomwe imwepo mumbaikha pa mbuto zakucezera za pa interneti, bzimbakhala bzikuthandauza kuti mukubziwonesera ayai kuti ndimwe wakubzicepesa.—w20.07, matsa. 6-7.

Kodi Akristau angapfunze ciyani na akhombwe wa luso?

Iwo akhayenda kukamedza komwe angakagumane ntsomba na pa nthawe yomwe ntsombazo zingagumanike kumweko. Iwo ambadziwa bzinthu bzomwe angaphatise basa na momwe angabziphatisire basalo. Iwo ambafunika kukhala wakukhwimika thangwe rakuti ambaphata basa mu nyengo zakusiyana-siyana. Ifepano tingacitembo bzibodzi-bodzi mu upalizi.—w20.09, tsa. 5.

Kodi ni njira ziponi zomwe tingaphatise basa kuti tithandize anyakupfunza wathu kuti akulise lufoyi lawo kuna Yahova?

Alimbikiseni anyakupfunza wanu wa Bibliya kuti ambawerenge Bibliya ntsiku zentse, na kuti ambakumbukire bzomwe ambawerengabzo. Ndipo tingawapfunzise kupemphera.—w20.11, tsa. 4.

Kodi mafala yakuti: ‘Mwa Kristu wentse an’dzapasidwa moyo’ yambathandauza ciyani?—1 Wakolinto 15:22.

Paulo akhafuna lini kulewa kuti wanthu wentse an’dzalamusidwa. Iye akhalewa bza Akristau wakudzozedwa omwe ‘adacenesedwa mwakubverana na Kristu Jezu.’ (1 Wakolinto 1:2; 15:18)—w20.12, matsa. 5-6.

Kodi n’ciyani comwe anyakudzozedwa an’dzacita pambuyo ‘[kusandulika] ninga kupoira kwa maso pa kulira kwa cimbututu cakumalizira’?—1 Wakolinto 15:51-53.

Iwo an’dzatewera Kristu, ndipo an’dzakumba mitundu ya wanthu na mpsimbo ya simbi. (Cibvumbulutso 2:26, 27)—w20.12, matsa. 12-13.