Ngimba mubelengilepo inkhani sya kyinja iki isi sikwaghiwa mu Ingasya ya Ndindilili? Keta linga mubaghile ukwamula amalalusyo agha:

Ngimba abapakiwa bikulondiwa ukuti tubabombeleghe bulebule?

Tukubandaghisya panongwa ya lwitiko lwabo; loli tutikubapa ulughindiko ulukulumba. Tukulondiwa ukwepuka “kufinyonywa fyabo.” (Yuda 16.) Kangi tutikubalalusya amalalusyo aghakufwana nulusubilo lwabo.—w20.01, peji 29.

Ngimba findu fiki ifi fibaghile ukubasimikisyila ukuti Yehova abamenye kanunu umwe?

Ibaibolo likunangisya ukuti umwene abamenye kanunu nalinga bo mukali ukupapiwa. Kangi ikupilika inyiputo syinu. Asimenye isi sili mundumbula yinu kangi na isi mukwinong’ona, kangi ifyakubomba fyinu fikumpalamasya. (1 Syambu. 28:9; Mbu. 27:11) Umwene abakwabile kumyake.—w20.02, peji 12.

Ngimba fifwanikisyo filiku ifyakumanya akabalilo akakuyobela nakakuya myee?

Tukuhoboka fiyo ukuyoba isya Yehova. Tukuyoba linga tuketile ukuti umundu yumo ikwenda injila imbibi. Abakulumba bakipanga bikuyoba ukuti babape bamo ubulongosi. Tutikuyoba isyakufwana namuno imbombo yitu yikwendela mfisu ifi yikanisiwe. Tutikuyoba inkhani isya kisisi.—w20.03, peji 20-21.

Ngimba amapalalila agha ghikuyobiwa pa Yoeli chaputala 2 ghakindene bulebule na agha ghikuyobiwa pa Ubusetuli chaputala 9?

Pa Yoeli 2:20-29 pikuyoba ukuti Kyala isakughasosyamo amapalalila kangi afingile ukuti isakughomokesya ifi ghalyonangile. Ukufuma apo, Kyala isakonelelagha mbepo wake. Ifyakubombiwa ifi fyafwanisiwe pakabalilo aka aba Babeloni babasambukile Abaisraeli kangi napanyuma pake. Pa Ubusetuli 9:1-11 pikulingania isya kilundilo kya mapalalila aba bo bapakiwa aba bafumusyagha isya bulongi bwa Kyala nkisu ikibibi iki kangi ifyakukongapo fyake, sikupangisya ukuti bosa aba bali kulubafu lwa kisu bangipilikagha kanunu.—w20.04, peji 3-6.

Ngimba umwalafyale wa kululu yonani amasiku agha?

Russia nifisu ifingi ifi kikukolelana nafyo. Abene bikubanyoza ababombi ba Kyala, bikukanisya imbombo yitu yakufumusya kangi bababengile Abaketi ba Yehova. Umwalafyale wa kululu ikulimbana fiyo numwalafyale wa kwitongo.—w20.05, peji 13.

Ngimba utuyilo 9 utu tuli pa Bagalatia 5:22, 23 totwene utu “seke sya mbepo”?

Hayi. Mbepo mwikemo ghukututula ukuti tunangisyeghe utuyilo utungi utununu, bo ubugholofu. (Ef. 5:8, 9)—w20.06, peji 17.

Ngimba bubibi buliku ubwakubika ifindu fyitu pa intaneti?

Ifi mukubika pa intaneti fibaghile ukunangisya ukuti muli bakwibona komma bakwiyisya.—w20.07, peji 6-7.

Ngimba Unkristu abaghile ukumanyilako isyafiki ku balobi aba bali namaluso?

Abene bikubuka pakabalilo na kuno babaghile ukusyagha iswi. Bamanyile muno babaghile ukubombela ifibombelo fyabo. Kangi bikuya bakifu nalinga bikwaghana nindamyo. Nanuswe tubaghile ukubomba bo ulu linga tuli mubufumusi.—w20.09, peji 5.

Ngimba njila simo siliku isi tubaghile ukubatulila aba bikumanyila Ibaibolo ukuti bakusyeghe ulughano lwabo kwa Yehova?

Tubaghile ukubakasya ukuti babelengeghe Ibaibolo isiku lililyosa nukukonga isi bikumanyila. Tubamanyisyeghe ukwiputa kwa Yehova.—w20.11, peji 4.

Ngimba bo banani aba bali mugulu lya bandu bosa aba: “bisakupeliwagha bumi mwa Kristu”?—1 Kor. 15:22.

Untumiwa Pauli akayobile ukuti abandu bosa bisakusyuka. Umwene ayobagha isya Bakristu abapakiwa aba “bafwilile mwa Kristu.” (1 Kor. 1:2; 15:18)—w20.12, peji 5-6.

Ngimba abapakiwa bisakubomba isyafiki pakabalilo ka ‘kukupisya ikisighe, bo yikulila ingangabwite ya kusulo’?—1 Kor. 15:51-53.

Abene bisakubombagha pampene na Kristu ukubatima abandu ningili sya kyela. (Ubuset. 2:26, 27)—w20.12, peji 12-13.