Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuya ɛhye mɔ a:

Kɛzi ɔwɔ kɛ yɛ nee Kilisienema mɔɔ bɛkpokpa bɛ la di ɛ?

Yɛ nye die diedi mɔɔ bɛda ye ali la anwo; noko yɛndwe adwenle yɛngɔ bɛ nwo zo somaa. Yɛkpo kɛ ‘yɛbahanvo menli’ somasoma. (Dwu. 16, ɔbdw.) Ɔnle kɛ yɛbiza bɛ bɛ anyelazo ne anwo edwɛkɛ.​—w20.01, m. 29.

Duzu a ɔwɔ kɛ ɔmaa ɛdie ɛdi kɛ Gyihova anye wɔ ɛ nwo a?

Baebolo ne kile kɛ ɔnwunle wɔ kolaa na bɛawo wɔ. Yɛɛ ɔtie wɔ asɔneyɛlɛ. Ɔze mɔɔ wɔ wɔ ahonle nu yɛɛ mɔɔ ɛlɛdwenle nwolɛ la, na wɔ nyɛleɛ ka ye. (1 Ek. 28:9; Mrɛ. 27:11) Ɔdaye mumua ne a ɔhwenle wɔ a.​—w20.02, m. 12.

Mekɛ boni a ɔwɔ kɛ yɛtendɛ anzɛɛ ɔnle kɛ yɛtendɛ a?

Yɛfa anyelielɛ yɛka Gyihova anwo edwɛkɛ. Saa yɛnwu kɛ awie ɛlɛto Nyamenle mɛla a, ɔnle kɛ yɛyɛ koonwu. Saa asafo nu mgbanyima nwu kɛ awie hyia folɛdulɛ a, bɛtendɛ. Saa bɛva bɛ sa bɛdo yɛ gyima ne azo a, yɛnga nwolɛ edwɛkɛ anzɛɛ yɛmbiza nwolɛ edwɛkɛ. Ɔnle kɛ yɛmaa awie te fealeranu edwɛkɛ bie.​—w20.03, m. 20-21.

Kɛzi mbɛbɛ mɔɔ wɔ Dwowɛle tile 2 la le ngakyile fi mɔɔ wɔ Yekile tile 9 la anwo ɛ?

Dwowɛle 2:20-29 ka kɛ, Nyamenle se ɔbavoa mbɛbɛ ne mɔ na yeava ninyɛne mɔɔ mbɛbɛ ne mɔ zɛkyele ye la yeazia yeamaa bɛ. Yemɔ anzi, Nyamenle wolale ye sunsum ne guale bɛ nwo zo. Ninyɛne ɛhye mɔ rale nu wɔ mekɛ mɔɔ Babelɔnoma tetale Yizilayɛma la yɛɛ yemɔ anzi. Yekile 9:1-11 ka menli mɔɔ bɛkpokpa bɛ mɔɔ bɛle kɛ mbɛbɛ mɔɔ bɛbɔ Nyamenle ndɛnebualɛ ne mɔɔ tia ɛtane ewiade ɛhye la anwo nolo, na bɛmaa bɛdabɛ mɔɔ bɛgyi ɔ nzi la anwo dwe bɛ la.​—w20.04, m. 3-6.

Kɛkala nwane a le sɔlɔ belemgbunli ne a?

Russia nee maanle mɔɔ bɛgyi ɔ nzi la. Bɛnyia Nyamenle menli nwo zo tumi wɔ adenle titili zo, bɛfa bɛ sa bɛto edwɛkɛhanlɛ gyima ne azo yɛɛ bɛlɛkpɔ Alasevolɛ ne mɔ. Sɔlɔ belemgbunli ne nee nyiakɛ belemgbunli ne ɛlɛpele tumililɛ nwo.​—w20.05, m. 13.

Asoo “sunsum ne ma” ne ala a bɛdiedia bɛ wɔ Galeehyeama 5:22, 23 la ɔ?

Kyɛkyɛ. Sunsum nwuanzanwuanza ne boa yɛ maa yɛnyia subane ngɛnlɛma bieko le kɛ tenleneyɛlɛ. (Ɛfɛ. 5:8, 9)​—w20.06, m. 17.

Esiane boni a wɔ nu kɛ ɛbava ɛ nwo edwɛkɛ wɔagua yintanɛte ne azo a?

Ninyɛne mɔɔ ɛfa ɛgua yintanɛte ne azo la bahola ahile kɛ ɛlɛtwe adwenle wɔahɔ ɛ nwo zo, ɔngile kɛ ɛbɛlɛ ɛ nwo aze.​—w20.07, m. 6-7.

Duzu a Kilisienema bahola azukoa avi fɛlɛkyevoma mɔɔ ɛbe la ɛkɛ a?

Bɛyɛ gyima wɔ mekɛ nee ɛleka mɔɔ bɛbahye fɛlɛ dɔɔnwo la. Bɛtete bɛ, ɔti bɛze kɛzi bɛfa fɛlɛhyelɛ ninyɛne mɔɔ fɛta la bɛdi gyima la. Yɛɛ bɛfa akɛnrasesebɛ bɛyɛ gyima wɔ mekɛ mɔɔ maanle nu tɛnlabelɛ ne bahakyi la. Yɛbahola yɛayɛ zɔ wɔ daselɛlilɛ nu.​—w20.09, m. 5.

Kɛzi yɛbahola yɛaboa Baebolo sukoavoma yɛamaa bɛanyia Gyihova anwo ɛlɔlɛ kpole ɛ?

Yɛbahola yɛamaa bɛ anwosesebɛ kɛ bɛgenga Baebolo ne dahuu na bɛdwenledwenle mɔɔ bɛkenga la anwo. Eza ɔwɔ kɛ yɛkile bɛ kɛzi bɛyɛ asɔne la.​—w20.11, m. 4.

Nwane mɔ a edwɛkɛ ɛhye fale bɛ nwo a: “Kelaese ati menli kɔsɔɔti banyia ngoane”?​—1 Kɔl. 15:22.

Ɛzoanvolɛ Pɔɔlo anga kɛ bɛbadwazo awie biala mɔɔ bawu la. Ɛnee ɔlɛka Kilisienema mɔɔ bɛkpokpa bɛ, “bɛdabɛ mɔɔ bɛde bɛ nwo wɔ Kelaese Gyisɛse anu” la anwo edwɛkɛ. (1 Kɔl. 1:2; 15:18)​—w20.12, m. 5-6.

Saa “bɛkabɔ bɛ nye bɛade la, wɔ mekɛ mɔɔ bɛbabɔ aweɛne tendenle ne mɔɔ li amozi la” anu na menli mɔɔ bɛkpokpa bɛ la ɛhakyi a, duzu a bɛbayɛ a?​—1 Kɔl. 15:51-53.

Bɛ nee Kelaese bava bulalɛ kpɔma ali menli ne anwo zo tumi. (Yek. 2:26, 27)​—w20.12, m. 12-13.