Wu sabu se Oghwa Odẹrẹ erẹ ẹgbukpe ọnana ne? Omarana, nie sẹ wu na sabu kpahenrhọ enọ enana:

Ukẹro ọgo yo fori na ha ni Ilele Kristi ra djẹha?

E vwo ọdaremẹro kpahen esegburhomẹmro aye; ọrẹn, a vwa kpọmaviẹ rẹn aye pha-an. E vwe ji titi aye pha-an. (Jude 16) Ọwan i vwa ji nọ aye enọ kpahen ẹruefirhọ aye-e.—w20.01, p. 29.

Me yọ nọ lẹrhiẹ mwuo ẹro taghene Jehova o ghini rhe owẹwẹ?

Baibol na ọ tare taghene Jehova o rheruo bọmọke e ki vwiọ. O ji rhon ẹrhomo enọ. O rhe oborẹ we roro ọrhẹ oborẹ ọ ha uvuẹn ọmuduo, irueruo enọ a ji hobọte yi. (1 Chron. 28:9; Prov. 27:11) O tiruo kẹrẹ oma ne.—w20.02, p. 12.

Idje ego sekpahen ọke ra na tẹmro ọrhẹ ọke ra na fọdu?

Ọwan a ta kpahen Jehova rhẹ omamerhomẹ. A tẹmro ọke arha mẹrẹn ohworho ro ruẹ oborẹ ọnọ lẹrhiẹ ruẹ ọdandan. Ekpako ukoko a ha urhebro phia ọke arha guọliẹ. Ọwan i vwa nọ (yanghene ta kpahen) oborẹ a wian owian Uvie na lele uvuẹn ẹkwotọre ra dobọ ye ji-i. Ọwan i vwa ta kpahen ẹmro odjahe-en.—w20.03, pp. 20-21.

Marhẹ ebaka ri ha Joel urhomu-ẹmriẹn 2 o ru vẹnẹ eri ha Revelation urhomu-ẹmriẹn 9?

Joel 2:20-29 ọ tare taghene Osolobrugwẹ o lerẹ aye, ji ve taghene ọnọ kwosa harẹn aye fọkiẹ oghwọghọ aye i haphia. Ọrana orho nie, Osolobrugwẹ nọ ha ẹhẹn ọfuanfon ọnẹyen phia. Eghọn erana i rugba ọke itu i Babylon a ghwọghọ Israel ọrhẹ ọke oru. Revelation 9:1-11 o dje kpahen imizu ra djẹha ri họhọ ebaka ọke aye e ghwoghwo ẹzenguon i Jehova kpahen akpọ ọkon ọnana, rọ lẹrhẹ evwan biomu era hobọtua ye.—w20.04, pp. 3-6.

Ọrọmo yẹ orodje obọrẹ o rierun na inyenana?

Russia ọrhẹ ẹkwotọre erọrọ ra hobọtua ye. Irueruo aye ọ hobọte ihworho Osolobrugwẹ, aye i dobọ owian aghwoghwo na ji, jeghwai vwo utuoma kpahen imizu na. Orodje obọrẹ o rierun ọrhẹ orodje obọrẹ o riotọre na a kparahaso omoma aye.—w20.05, p. 13.

Iruemru irhinrin ra hunute uvuẹn Galatians 5:22, 23 ọvo yẹ “omamọ ẹhẹn ọfuanfon na”?

Ẹjo. Ẹhẹn ọfuanfon na ọ ha userhumu rẹn ọwan vwo iruemru irhorhomu erọrọ jerẹ irueruo ọvwata. (Eph. 5:8, 9)—w20.06, p. 17.

Imwuofẹn owu ọgo yọ havwiẹ sekpahen ekwakwa re fiẹ rhẹ itanẹti ri sekpahen ọwan?

Oborẹ wu fi rhẹ itanẹti, ọnọ sabu lẹrhẹ ihworho roro taghene wa kparoma, ukperẹ wu na homariotọre.—w20.07, pp. 6-7.

Me yẹ Ilele Kristi ina sabu yono mie ikpirhenrin ri ten ona?

Aye a wian uvuẹn ọke ọrhẹ ekete aye ina mẹrẹn irhenrin. Aye e yono oborẹ aye ina ha ekwakwa ri serhọ ruiruo lele. Aye e ji fiudugbere wian uvuẹn erhirhiẹ egbogbanhon sansan. Ana ji sabu ruẹ omaran uvuẹn owian aghwoghwo na.—w20.09, p. 5.

Izede ego ye ne ru ha userhumu rẹn era ha i Baibol yono ruẹ ẹguọlọ aye i vwo kpahen Jehova kodorhọ?

Ana sabu jirie rẹn aye nẹ aye i se i Baibol na kẹdẹkẹdẹ jeghwai roro kodo kpahiẹn. Ana ji sabu yono aye oborẹ a nẹrhomo.—w20.11, p. 4.

Ayọmo yi ha usuẹn ẹmro na: “Ihworho ephian ine ji nyerẹn fọkiẹ Kristi”?—1 Cor. 15:22.

Ọnyikọ Paul ọ vwọ ta taghene ana rhọmọ ituakpọ ephia-an. Ọ ta kpahen Ilele Kristi ra djẹha, re “ru fon ọrẹ okugbe rhẹ Kristi Jesu.” (1 Cor. 1:2; 15:18)—w20.12, pp. 5-6.

Me yẹ era djẹha na ine ruo ọke aye i rhe ‘wene ogege, uvuẹn ibrẹro owu, uvwre ọke ene kporo ukpori rọ kẹta na’?—1 Cor. 15:51-53.

Aye ine lele i Kristi wian owian aye ine sun ihworho na rhẹ ukorọkpọ uteru. (Rev. 2:26, 27)—w20.12, pp. 12-13.