Kasin natandaan mo ray abasam ed saray isyu na Say Panag-bantayan ed sayan taon? Nengneng mo pa sirin no naebatan mo irayan tepet:

Panon so nepeg ya pantrato tayo ed saray alanaan?

Napapabiskeg tayod pananisia ra; balet agtayo ra iidoloen. Agtayo sobran “irarayew so arum a totoo.” (Jud. 16, paimanod leksab.) Iwasan tayoy mantepet na masyadon personal.​—w20.01, p. 28-29.

Antoy prueba ya kabat tan iimanoen ka nen Jehova?

Ibabaga na Biblia ya anengneng ka la nen Jehova antis ka nin niyanak. Dedengelen to iray pikakasim. Amta toy walad pusom tan nononoten mo. Saray gagawaen mo et nayarin mamaliket o mamaermen ed sikato. (1 Awa. 28:9; Pro. 27:11) Inyasingger ka nen Jehova ed sikato pian nakaarom.​—w20.02, p. 12.

Kapigan so panaon na pansalita tan kapigan so ag-iyesel?

Lanang tayon akaparaan ya ibaga ed arum so nipaakar ed si Jehova. Mansalita tayo met pian pasakbayan so agi ya aliwa lay aarapen to. Mansalita iray elder no walay kaukolan ya bilinen. Agtayo la mantetepet o mangibabaga na impormasyon nipaakar ed kimey tayo ed saray bansan bawal so panagpulong. Agtayo met ibabaga iray kompidensyal ya bengatla.​—w20.03, p. 20-21.

Antoy pandumaan na saray duron ya abitla ed Joel kapitulo 2 tan Apocalipsis kapitulo 9?

Ibabaga na Joel 2:20-29 ya pataynanen na Dios iray duron tan insipan ton ipawil to iray dinederal da. Kayari na satan et ikalbo na Dios so espiritu to. Isisimbolo na saya so inlusob na saray sundalo na Babilonia ed Israel. Say isisimbolo balet na Apocalipsis 9:1-11 et saray alanaan ed panaon tayo. Singa ra duron ya mangiyaabawag na panangukom na Dios ed mundo nen Satanas, kanian singa da papairapen so amin ya onsusuporta ed satan.​—w20.04, p. 3-6.

Siopa so ari na amianen natan?

Say Russia tan saray kaalyado ton bansa. Imbawal da so panagpulong tan pinairap da so nilibon Tasi ed sakop da. Ipapanengneng dan kabusol day Jehova tan saray totoo to. Say ari na amianen et milalaslasan ed ari na abalaten.​—w20.05, p. 13.

Diad saray kualidad ya abitla ed Galacia 5:22, 23, kasin samay siamera labat so kabiangan na “bunga na espiritu”?

Andi. Wala ni ray kualidad ya pawalaen na masanton espiritu, singa say inkatunong. (Efe. 5:8, 9)—w20.06, p. 17.

Antoy makapuy ya epekto no man-post tayoy nipaakar ed sarili tayo diad online?

Lapud saray ipo-post mo, ompan isipen na totoo ya mapangta ka, imbes ya mapaabeba.​—w20.07, p. 6-7.

Antoy naaralan na saray Kristiano ed saray marundunong ya managsigay?

Mansigay ira no kapapaway na sira. Kabisado da ray uusaren dan kagawaan. Makpel dan ituloy so pansisigay da anggano biglan manguman so panaon. Ontan met so gawaen tayo ed ministeryo.​—w20.09, p. 5.

Panon tayon natulongan iray iyaaralan tayo ya mas aroen day Jehova?

Pasesegen tayo ran inagew-agew ya manbasa na Biblia. Ibangat tayo ran mandalepdep tan manpikasi.​—w20.11, p. 4.

Siopa ray kaiba ed samay imbaga nen Pablo ya “bilayen met so amin lapud Kristo”?—1 Cor. 15:22.

Aglabay ya ibaga nen Pablo ya amin a totoo et onoli. Kaibad saray tutukoyen to et saray alanaan ya Kristiano ya “imbiig na Dios bilang disipulo nen Kristo Jesus.” (1 Cor. 1:2; 15:18)—w20.12, p. 5-6.

Antoy gawaen na saray alanaan ya nauman “diad kakirem na mata, legan na unor a trumpeta”?—1 Cor. 15:51-53.

Kaiba ira nen Jesus diad paneral ed saray nasyon panamegley na baston a balatyang. (Apo. 2:26, 27)—w20.12, p. 12-13.