Watangele muabonga malongo a Inzo Yaleha ya Mutaledi a givo egi ba? Gula idi ngenyi, wajiya guhana mvutu gu mihu eyi yalandula:

Luholo lutshi tudi naye gukalegela Aklisto ambiwe maji mu nyuma ndaga?

Tuana suanguluga mukunda nu gutshigina guawo; uvi tuanago guasunzula muavula gubalega. Tushigo naye ‘gushimana athu muavula gubalega.’ (Yuda 16) Tushigo naye guahula mihu ha gujiya ndaga yatadila felela diawo.—w20.01, diyiji 29.

Itshi yajiya gugutuma ha gutshigina egi Yehowa wana gugujiya muabonga?

Biblia idi mumonesa gamba, Yehowa wagujiyile gutuama egi uvualewe. Wana guvua isambu yaye. Wana gujiya matangi aye nu ndaga jidi mu mutshima waye. Ndaga wana gukalagala jiajiya gumusuanguluisa nga gumuhana gikenene. (1 Gudi. 28:9; Ish. 27:11) Wagunanele gudi muene.—w20.02, diyiji 12.

Ifezegeselo itshi idi mumonesa tangua tudi naye guzuela nu tangua tudi naye guhena tedie?

Tuana gukhala nu gusuanguluga ha gulongesa athu ndaga jiatadila Yehowa. Tudi naye guzuela gula tuamona egi muthu udi mutshigina gukalagala ndaga yabola. Akulu adi naye guzuela ha guhana malongo gudi aphangi adi nu funu ya ukuateshi. Tudi naye guhuena tedie gula atuhula ha guzuela ndaga jiatadila mudimo wetu mu ifutshi inyi mafumu a leta ana guwutunyisa. Tushigo naye guzuela ndaga jia gisuegi.—w20.03, diyiji 20-21.

Luholo lutshi matulu adi mu Yowele mukhapho 2 adi a gudisha nu a mu Yatuwuwe mukhapho 9?

Yowele 2:20-29 idi muzuela egi Nzambi mbawukaya matulu ene nu mbawuvutula ima yagasue yabolesele ene. Gungima dia ndaga eyi, Nzambi mbawubundula nyuma yenji. Thomo ndaga eji jiatagenele tangua masuta a enya Babilona ajile muluisa enya Isalele, nu jiajile nji mutagana luko gungima. Yatuwuwe 9:1-11 idi muzuelela Aklisto ambiwe maji mu nyuma a mu masugu etu anyi adi gifua matulu. Aklisto ene adi mulongesa luholo Nzambi mbaaza musophesa mavu awa abola adi mumonesa akombeledi enji lamba.—w20.04, diyiji 3-6.

Nanyi udi fumu ya gu nord mu masugu etu?

Russie nu ifutshi iko inyi yana gumukuatesa. Ana gutuameza mu ifutshi inyi yakhala nu akombeledi a Nzambi nu ana guasagesa, ana gutunyisa mudimo wa gulongesa nu ana gutshigina ndo Matemue a Yehowa. Fumu ya gu nord wana guluisa fumu ya gu sud.—w20.05, diyiji 13.

‘Itshinyi ya bundu dia nyuma’ yakhala phamba mu mukanda wa Galatiya 5:22, 23 ba?

Ndo sha. Nyuma yabonga yana gutukuatesa ha gumonesa makalegelo ako abonga gifua nduedi. (Ef. 5:8, 9)—w20.06, diyiji 17.

Gingonza gitshi giajiya gugubuila gula udi muhaga foto nga video jiaye mu Internet?

Ndaga wana guhaga mu Internet jiajiya gutuma athu ako ha gutangiza egi udi nu lulendo, ushigo muthu wa gudibulumuisa.—w20.07, diyiji 6-7.

Malongo atshi alongeshi ajiya guheta gudi alowi a jishui abonga?

Alowi a jishui ana gulowa mu tangua diatagana nu mu fundo ajiya gukuata jishui jiavula. Ana gulonguga luholo lua gukalegela ikadikilo yawo muabonga. Ana kalagala mudimo nu gikhesa, ikhale adi mutagana nu malamba. Tuajiya nji gukalagala ngenyi mu mudimo wa gulongesa.—w20.09, diyiji 5.

Mu maluholo atshi tuajiya gukuatesa athu tuana gulongesa Biblia ha gukudisa guzumba guawo gudi Yehowa?

Tudi naye guakuatesa ha gutanga Biblia lusugu nu lusugu nu ha gutangigiza ndaga ana gutanga. Tudi naye nji gualongesa luholo lua gukombelela.—w20.11, diyiji 4.

‘Mu njila ya Klisto athu agasue mbaafuzumuga;’ mbimbi eji jidi mutadila akuatshi?—1 Kol. 15:22.

Mupostolo Phaula gazuelelego egi athu agasue mbaafuzumuga. Wakhalele muzuelela Aklisto ambiwe maji mu nyuma, anyi ‘adi mutumbuishiwa hamoshi nu Klisto Yesu.’ (1 Kol. 1:2; 15:18)—w20.12, diyiji 5-6.

Ndaga itshi mbayikalagala Aklisto ambiwe maji mu nyuma tangua ‘mbaasombegesa mu gukamuna gua diso gula phungi ya gisugishilo yadila’?—1 Kol. 15:51-53.

Mbaakalagala hamoshi nu Klisto ha gutuameza athu nu muhango wa utadi. (Yat. 2:26, 27)—w20.12, diyiji 12-13.