Waswe, iu readim olketa Wastaoa magasin wea iumi kasem insaed disfala year? Trae ansarem olketa kwestin hia:

Hao nao iumi shud treatim olketa brata and sista wea anointed?

Iumi tinghae lo faith blo olketa, bat iumi no laek for mekhae lo olketa. Iumi stap klia lo wei for tinghae tumas lo man. (Jude 16) Iumi shud no askem tumas kwestin abaotem hope blo olketa.—w20.01, p. 29.

Wanem nao mekem iu sure dat Jehovah hem tingim iu?

Bible showimaot hao taem iu no born yet Jehovah lukim iu finis. And hem lisin lo olketa prea blo iu. Hem savve wanem nao lo heart blo iu, and hem savve lo tingting blo iu, and wanem iu duim savve affectim feeling blo hem. (Fas Kronikols 28:9; Provebs 27:11) Hem laekem iu for kam klos lo hem.—w20.02, p. 12.

Wanem nao olketa example lo raet taem for talem samting and taem for stap kwaet?

Iumi hapi for story abaotem Jehovah. Iumi savve talem samting taem iumi lukim samwan start for go difren. Olketa elder savve talem samting for givim kaonsel taem samwan needim. Iumi mas no storyim (or givimaot) information abaotem waka blo iumi wea gohed lo olketa kantri wea olketa banim. Iumi mas no talemaot olketa confidential information.—w20.03, p. 20-21.

Hao nao olketa grashopa wea Joel chapter 2 storyim hem difren from olketa grashopa wea Revelation chapter 9 storyim?

Joel 2:20-29 hem sei God raosem olketa grashopa and promis for ‘givim bak moa’ evri samting wea olketa grashopa spoelem. Bihaen datwan, God bae givim kam spirit blo hem. Olketa samting hia fulfill taem olketa lo Babylon tekovarem Israel and bihaen datwan tu. Revelation 9:1-11 storyim hao olketa anointed lo taem blo iumi olketa olsem grashopa wea talemaot judgment blo hem againstim nogud world blo Satan, wea datwan mekem olketa wea sapotim hem for no hapi.—w20.04, p. 3-6.

Hu nao king blo north distaem?

Russia and olketa wea sapotim hem. Olketa duim samting wea barava affectim pipol blo God, olketa banim preaching waka and showimaot olketa heitim olketa Witness. King blo north hem gohed for compete witim king blo south.—w20.05, p. 13.

Waswe, olketa fasin wea Galatia 5:22, 23 storyim, hem nomoa olketa wei blo holy spirit?

Nomoa. Holy spirit helpem iumi for garem olketa nara fasin moa, olsem wei for raeteous. (Eph. 5:8, 9)—w20.06, p. 17.

Wanem nao wanfala danger lo wei for postim information abaotem iuseleva online?

Samting wea iu postim hem maet mekem olketa narawan for ting dat iu haem iuseleva and iu no hambol.—w20.07, p. 6-7.

Wanem nao olketa wea preach savve lanem from wanfala gud fisherman?

Hem bae waka lo taem and ples wea hem luksavve bae hem kasem fish. Hem lane for iusim olketa stret tul. And hem no fraet for waka nomata situation hem change. Iumi savve duim olsem tu lo ministry blo iumi.—w20.09, p. 5.

Wanem nao samfala samting wea iumi need for duim for strongim love blo Bible student for God?

Iumi savve encouragem olketa for readim Bible evriday and ting raonem wanem olketa readim. And iumi savve teachim olketa for prea.—w20.11, p. 4.

Hu nao disfala toktok, “Evriwan bae laef bak bikos long Christ” hem story abaotem?—1 Cor. 15:22.

Aposol Paul hem no sei dat evriwan bae laef bak. Hem story abaotem olketa anointed Christian, wea ‘holy and wan mind witim Christ Jesus.’ (1 Cor. 1:2; 15:18)—w20.12, p. 5-6.

Wanem nao olketa anointed bae duim bihaen olketa laef bak olsem taem wea ‘eye hem sat and open moa, long taem wea datfala last trumpet hem krae’?—1 Cor. 15:51-53.

Olketa bae waka witim Christ for shepherdim pipol witim wanfala iron stik. (Rev. 2:26, 27)—w20.12, p. 12-13.