¿Ñawincharqanchikchu Willakuq qillqakunata? ¿Imatam kay tapukuykunamanta nichwan?

¿Imaynam kananchik hanaq pachapaq akllasqakunawan?

Diosman sunqu kasqankutam qatipakunanchik, ichaqa manam ancha riqsisqata hinachu qawananchik. Nitaqmi llumpaytaqa alabananchikchu (Jud. 16). Manataqmá tapupayananchikchu hanaq pachaman rinankumantaqa (w20.01, 29 kaq paginapi).

¿Imanasqataq mana iskayrayanchikchu sapakamata Jehova Dios kuyawasqanchikmanta?

Bibliam niwanchik Jehova Diosqa mamanchikpa wiksanpi kachkaptillanchikraq rikuwasqanchikta. Uyariwanchiktaqmi mañakusqanchiktapas. Chaymantapas, payqa allintam riqsiwanchik, chaymi yachan sunqunchikpa ima munasqanta. Anchatataqmi kusikun kasukuptinchikqa (1 Cron. 28:9; Prov. 27:11). Jehova Diosqa akllaykuwarqanchiktaqmi runankuna kananchikpaqpas (w20.02, 12 kaq paginapi).

¿Haykapitaq allin kanqa rimayninchik hinaspa upallakuyninchik?

Jehova Diosmanta rimaspanchikmi. Iñiqmasinchikkunatapas rimapayananchikmi ima huchatapas manaraq ruwachkaptinku. Punta apaqkunapas iñiqmasinkutaqa rimapayaykunankum. Diosmanta willakuyninchikta harkakuq nacionkunapi yachaq iñiqmasinchikkunataqa manam tapunanchikchu imayna willakusqankumantaqa. Manataqmi mana willakunapaq kaqkunataqa willakunanchikchu (w20.03, 20, 21 kaq paginapi).

¿Imakunapitaq mana chaynallachu Joelpa qawasqanwan Juanpa qawasqan aqaruwaykunaqa?

Joelpa willakusqanpim nin aqaruwaykunata mana imapa kanan chaki allpaman Jehova Dios wischunanmanta, nintaqmi chaykunawan runakuna ñakarisqankurayku Dios kutichipuy munasqanmantapas. Chaykunapa qipantañataqmi atiyninta qumurqa. Chaykunam cumplikurqa Babilonia tropakuna Jerusalen llaqtata tuñichiptinku hinaspa 33 kaq watapi. Apocalipsis 9:1-11 nisqanpim hanaq pachapaq akllasqa kaqkunata aqaruwaykunawan tupachin, paykunam kunan tiempopi willakuchkanku tukuy mana allinkunata Dios chinkachinanmanta. Chaywanmi pantay religionkunapi kaqkunapas piñakunku (w20.04, 3-6 kaq paginapi).

Kunan punchawkunaqa, ¿ima naciontaq norte lawmanta nacionqa?

Rusia nacionwan yanapaqnin nacionkunam. Chay nacionpi autoridadkunaqa iñiqmasinchikkunatam chiqninku, hinaspapas Diosmanta willakunankutam harkakunku. Chaymantapas, Rusia nacionqa sur lawmanta nacionwanmi pasaypaqta chiqninakun (w20.05, 13 kaq paginapi).

¿Galatas 5:22, 23 nisqanman hina kanallapaqchu taytanchik Jehovapa atiyninqa yanapawanchik?

Manam. Jehova Diosqa atiyninwanqa yanapawanchiktaqmi tukuy imapi allin runa kanapaqpas (Efes. 5:8, 9) (w20.06, 17 kaq paginapi).

¿Imanasqataq allinta tantiananchik internetpi fotonchiktawan videonchikta churanapaq hinaspa imatapas qillqanapaqqa?

Tukuy chaykunata churaspanchikqa riqsisqa kay munasqanchikta hinaspa hatun tukuq kasqanchiktam qawachichkachwan (w20.07, 6, 7 kaq paginapi).

¿Imatam yachachwan allin challwaqkunamanta?

Allin challwaqkunaqa yachankum imay hora hinaspa maypi challwakuna tariyta, challwanankupaq kaqkunata imayna servichikuyta, hinaspapas mana manchakuspankum llamkanku imaña-haykaña kaptinpas. Ñuqanchikpas chaynatam Diosmanta willakuspanchik ruwachwan (w20.09, 5 kaq paginapi).

¿Imaynatam bibliamanta yachachisqanchik runamasinchikta yanapachwan Jehova Diosta astawan kuyananpaq?

Bibliata sapa punchaw ñawinchananpaqmi kallpanchachwan, chay ñawinchasqanpi yuyaymanananpaqmi yanapachwan, hinaspapas Diosta mañakunanpaqmi yachachichwan (w20.11, 4 kaq paginapi).

¿Pikunamantataq Pablo rimachkarqa ‘Cristoraykum lliw runakuna kawsarimunqaku’ nispan? (1 Cor. 15:22).

Manam lliw runakunamantachu, aswanqa hanaq pachapaq akllasqa kaqkunamantam. Paykunam ‘Cristo Jesuswan kuska kasqankurayku Diospa sapaqchasqan’ kanku (1 Cor. 1:2; 15:18) (w20.12, 5, 6 kaq paginapi).

¿Imatam ruwanqaku hanaq pachapaq kawsarimuqkuna? (1 Cor. 15:51-53).

Jesuswan kuskam mana allin runakunata chinkachinqaku (Apoc. 2:26, 27) (w20.12, 12, 13 kaq paginapi).