Ka wacihanganyire okusoma enimero z’Ilabiro ly’Akalalizi z’ogu mwaka? Ololage erhi wanashuzagya kw’aga madoso:

Gurhi rhukwanine okujirira Abakristu bashîge amavurha?

Rhunashagalukire obuyemere bwabo; cikone, rhurhababona nka bali bantu ba bulagirire kulusha abandi. Rhunayake ‘okulimiza [erhi, kukunga-kunga] abantu.’ (Yd. 16) Rhurhabadosa amadoso oku biyerekire obulangalire bwabo.​—w20.01-ZS, buk. 29.

Bici bikuyemezize oku Yehova aba akumanyire?

Ebibliya eyerekine oku akubwîne embere oburhwe. Na kandi, anayumve amasala gawe. Amanyire entanya zawe n’ebiri omu murhima gwawe, n’ebijiro byawe binamusimise erhi kumugayisa. (1 Nga. 28:9; Mig. 27:11) Akukulwire ly’omukolera.​—w20.02-ZS, buk. 12.

Nyiganyo zihi ziyerekine amango rhukwanine okuderha n’amango rhukwanine okuhulika?

Rhunashagalukire okuderha okubiyerekire Yehova. Rhunaderhe erhi rhubona owirhu Mukristu akola ayerekire omu njira mbi. Abagula banaderhe lyo bahanûla omuntu, nka kuli kwa bulagirire. Rhunahulike erhi bakarhuhûna emyanzi okubiyerekire omukolo gwirhu omu bihugo guhanzibwemwo. Kandi, rhurhafulûla emyanzi ekwanine okubera ihwè.​—w20.03-ZS, buk. 20-21.

Bulya gurhi enzige ziganirirwe omu citabu ca Yoweli cigabi ca 2 zirhashushini n’eziganirirwe omu citabu c’Amafulûlo cigabi ca 9?

Olwandiko lwa Yoweli 2:20-29 ludesire oku Nnamahanga alibirhakw’ezo nzige analanganya oku alipa ebi zasherezagya. Enyuma z’aho, Nnamahanga abulaga iroho lyage litagatifu. Ebyo byahikirizibwe amango ishanja lya Babiloni ligwarhâga Israeli na buzinda bwaho. Olwandiko lw’Amafulûlo 9:1-11 luganirire Abakristu bashîge amavurha ba muli kano kasanzi kirhu bali bayaliza gurhi Nnamahanga ashereza er’igulu, n’oko kuli kwagayisa abantu b’er’igulu.​—w20.04-ZS, buk. 3-6.

Ene, omwami w’emukondwe (Nord) ye ndi?

Russie n’abamulunzire okuboko. Bali barhegeka omu bihugo birimw’abakozi ba Nnamahanga, bahanzize omukolo gwirhu gw’amahubiri na kandi bayerekine enshombo yabo kuyerekera Abahamirizi. Omwami w’emukondwe (Nord) ali aja mashigwe n’owabo w’emwene (Sud).​—w20.05-ZS, buk. 13.

K’amorhere mwenda g’ilehe l’iroho litagatifu gaganirirwe omu lwandiko lw’Abagalasiya 5:22, 23 ka gone gaba bigabi “b’ilehe l’iroho litagatifu”?

Nanga. Iroho litagatifu linarhurhabale okuba n’agandi morhere minja, kwa lwiganyo obushinganyanya. (Ef. 5:8, 9)​—w20.06, buk. 17.

Bulya gurhi kurhali kwinja okuheba oku Enterneti enfoto, evideo, erhi yindi myanzi eyerekine akalamo kawe wene?

Ebi ohebire oku Enterneti byanayereka abandi oku oli waciyerekana, cikone orhali mwirhohye.​—w20.07, buk. 6-7.

Bici olwiganyo lw’abadubi bayishiduba lwakayigiriza Abakristu?

Banakagend’idubira aha bakabona ensamaki nyinji na kandi banagendiduba omu kasanzi kashinganine. Baba bahûgusirwe oku ngasi cikolanwa cakakolesibwa. Na kandi, banakole n’obushiru ciru akaba bali omu kasanzi kazibu. Nirhu rhwanajira ntyo omu mukolo gwirhu gw’amahubiri.​—w20.09, buk. 5.

Gurhi rhwakarhabala abanafunzi birhu b’Ebibliya bayushûle obuzigire bwabo kuli Yehova?

Rhwanabaha omurhima bakasoma Ebibliya ngasi lusiku n’okurhanya kw’ebi bali basoma. Na kandi rhwanabayigiriza gurhi bakakasalira.​—w20.11, buk. 4.

Bandi bali ba muli balya “boshi bayish’ishubiramwo omûka muli Kristu”?​—1 Kr. 15:22.

Paulo arhalonzagya okuderha oku ngasi muntu ayishifûlwa n’okuja empingu. Akagiganirira Abakristu bashîge amavurha, balya “bacêsibwe muli Yezu Kristu.” (1 Kr. 1:2; 15:18)​—w20.12, buk. 5-6.

Mukolo guhi Abakristu bashîge amavurha bayishijira enyuma z’ ‘okuhinduka kundi kundi, omu kugohya ntya, oku izu ly’omushekera muzinda’?​—1 Kr. 15:51-53.

Bayish’ikola haguma na Kristu lyo bayâbula amashanja n’ehirhi hy’ecûma. (Maf. 2:26, 27)​—w20.12, buk. 12-13.