Pe na e faitau māeʻaeʻa i lomiga taʻitasi o Le Olomatamata o lenei tausaga? O lea, pe mafai ona e taliina fesili o loo mulimuli mai?

O le ā le auala e tatau ona tatou feutagaʻi ai ma Kerisiano faauuina?

E tatou te faaaʻoaʻo i lo latou faatuatua peitaʻi, e tatou te lē soona faatāua naʻuā i latou. E tatou te ʻalofia le faaviivii o i latou. (Iuta 16) E tatou te lē fesili atu foʻi iā i latou e faatatau i lo latou faamoemoe.​—w20.01, itu. 29.

Aiseā e tatau ai ona e mautinoa e silafia lelei oe e Ieova?

O loo taʻua i le Tusi Paia e silafia lelei oe e Ieova ae e te leʻi fanau mai. E faafofoga mai foʻi o ia i au tatalo. E na te silafia ou manatunatuga ma mea i lou loto ma e aafia Ieova i au gaoioiga. (1 No. 28:9; Faata. 27:11) Ua ia tosina atu oe iā te ia.​—w20.02, itu. 12.

O ā faaaʻoaʻoga o le taimi e tatau ai ona tautala ma le taimi e lē tatau ai?

E tatou te fiafia e talanoa e faatatau iā Ieova. E tatou te talanoa atu foʻi i se tasi pe a tatou iloa ua amata ona ia uia se ala sesē. E avatu foʻi e toeaina ni fautuaga pe a manaʻomia. E tatou te lē fesili pe taʻu atu foʻi ni faamatalaga e faatatau i la tatou galuega i atunuu e faasā ai. E tatou te lē faailoa atu foʻi mataupu e lē faalauaʻiteleina.​—w20.03, itu. 20-21.

O le ā le eseesega o sē akerise o loo taʻua i le Ioelu mataupu e 2 ma sē akerise i le Faaaliga mataupu e 9?

O loo taʻua i le Ioelu 2:20-29, e faateʻa mamao e le Atua sē akerise, ma na ia folafola mai o le a ia aumaia se taui mo mea na faaleagaina e sē akerise. Mulimuli ane e liligi ifo ai e le Atua lona agaga. Na faataunuuina na vala ina ua osofaʻia e Papelonia Isaraelu ma se taimi mulimuli ane ai. I le Faaaliga 9:1-11, o loo faamatalaina ai le ʻaufaauuina i aso nei e pei o ni sē akerise a o latou faalauiloa atu faamasinoga a le Atua i lenei faiga leaga o mea ma o le a matuā lē fiafia ai i latou e lagolagoina lenei lalolagi.​—w20.04, itu. 3-6.

O ai le tupu o le itu i mātū i aso nei?

O Rusia faatasi ai ma malo o loo lagolagoina o ia. Ua matuā aafia tagata o le Atua i lana pulega, ua ia faasāina le galuega talaʻi ma e ʻinoʻino o ia i Molimau a Ieova. O loo tauivi le tupu o le itu i mātū ma le tupu o le itu i saute.​—w20.05, itu. 13.

O uiga e iva o loo lisiina mai i le Kalatia 5:22, 23, pe e na o le pau na o vala o “le fua o le agaga”?

E leai. E fesoasoani le agaga paia iā i tatou ina ia atiaʻe isi uiga lelei e pei o le amiotonu. (Efe. 5:8, 9)​—w20.06, itu. 17.

O le ā se lamatiaga o le tuu o ata ma faamatalaga e faatatau iā te oe i luga o tuātusi i le Initaneti?

O ata ma faamatalaga e te tuuina i luga o le Initaneti e faatatau iā te oe, e ono atagia atu ai lou faalialiavale nai lo o lou lotomaulalo.​—w20.07, itu. 6-7.

O ā ni mea e mafai ona aʻoaʻoina e faifeʻau Kerisiano mai i faifaiva tomai?

E latou te fagogota i taimi ma ogāsami e maua ai iʻa. Ua toleniina foʻi i latou i le faaaogāina o mea fagota talafeagai. E latou te lototetele e fesagaʻia tulaga e leʻi faatalitalia a o fagogota. E mafai foʻi ona tatou faaaʻoaʻo iā i latou i la tatou faiva.​—w20.09, itu. 5.

O ā ni auala e tatou te fesoasoani ai i a tatou tagata aʻoga o le Tusi Paia ina ia faalolotoina lo latou alofa mo Ieova?

E tatou te faalaeiauina i latou e faitau le Tusi Paia i aso taʻitasi ma manatunatu loloto i ai. E tatou te aʻoaʻo foʻi i latou e tatalo.​—w20.11, itu. 4.

O ai e aofia ai i le faaupuga: E “toe faaolaina uma lava e ala i le Keriso”?​—1 Kori. 15:22.

E lē o uiga atu le aposetolo o Paulo o le a toetutū tagata uma ae na uiga atu o ia i le toetutū o Kerisiano faauuina o ē “ua faapaiaina ma ua autasi ma Keriso Iesu.” (1 Kori. 1:2; 15:18)​—w20.12, itu. 5-6.

O le ā o le a faia e le ʻaufaauuina pe a ʻsuia i latou uma, e pei o le emo o le mata, i le taimi e ili ai le pū mulimuli’?​—1 Kori. 15:51-53.

O le a latou auai faatasi ma le Keriso i le puleaina o tagata i le tootoo uʻamea. (Faaa. 2:26, 27)​—w20.12, itu. 12-13.