Apa i kau seng bọu nẹ̌basa majalah Měhabarẹ̌ gunang taung ini? Kěnang pěmanda apa i kau makasimbahẹ̌ manga kakiwal᷊o ini:

Kerea cara i kitẹ měkoạ si sire apang nilanisẹ̌?

I kitẹ měngarěga pangangimang i sire. Maning kerene, i kitẹ tawe měgělị perhatian tumanịu mal᷊awọ si sire. I kitẹ madiri mapakawantugẹ̌ si sire. (Yud. 16) I kitẹ lai tawe měgělị kakiwal᷊o bersifat pribadi soal u pělaharapi sire.​—w20.01, hlm. 29.

Apa nakakoạ si kau mangimang i Yehuwa kai mapadul᷊i si kau?

Alkitapẹ̌ naul᷊ị i Yehuwa mapadul᷊i si kau dongkeng i kau bědang tawe nalahirẹ̌. Kụ i Sie dụdaringihẹ̌ daroanu. I Sie masingkạ apa tẹ̌tiněnangu dingangu apa su ral᷊ungu naungu, kụ kakanoạu lai piạ pěngarune si Sie. (1 Taw. 28:9; Amsal 27:11) I Sie hala němol᷊eng si kau.​—w20.02, hlm. 12.

Su tempo kerea i kitẹ harusẹ̌ mẹ̌bisara dingangu tawe mẹ̌bisara?

I kitẹ mal᷊uasẹ̌ mẹ̌bisara soal i Yehuwa. I kitẹ lai harusẹ̌ mẹ̌bisara su tempong piạ taumata seng mělenga sarang dal᷊eng nẹ̌sal᷊a. Manga penatua lai mẹ̌bisara su tempong měgělị sasasa. Katewe, i kitẹ tawe mẹ̌bisara (arau mẹ̌kiwal᷊o) soal u pelayanan arau haghing kegiatan Kristen kụ kẹ̌koateng su negeri měsẹ̌sěding hal᷊ẹ̌ i kitẹ. I kitẹ lai tawe měhabarẹ̌ informasi rahasia.​—w20.03, hlm. 20-21.

Kerea kal᷊imbotong su Yoel pasalẹ̌ 2 nẹ̌tatěntang dingangu kal᷊imbotong su Wahyu pasalẹ̌ 9?

Yoel 2:20-29 naul᷊ị Mawu napakarau manga kal᷊imbotong ene dingangu nẹ̌diandi sarung měgělị ganti rugi ual᷊ingu kěbị apa seng nipakarusang i sire. Bọu ene, Mawu měgělị rohkẹ̌’E masusi. Kěbị perincian ene nariadi su tempong pasukan Babelẹ̌ něnekẹ Israel dingangu su tempo wal᷊inẹ nal᷊iu bọu ene. Wahyu 9:1-11 něnodẹ manga kal᷊imbotong su ayatẹ̌ ene kai manga ělang i Yehuwa orasẹ̌ ini apang nilanisẹ̌ kụ mělẹ̌habarẹ̌ soal u hukumangu Mawu gunang dunia dal᷊akị ini. Hal᷊ẹ̌ ene nakasigěsạ taumata apang měnẹ̌numběka dunia ini.​—w20.04, hlm. 3-6.

I sai datung sawěnahẹ̌ orasẹ̌ ini?

Rusia dingangu manga hapịe. I sire nẹ̌sěding hal᷊ẹ̌ měnginjilẹ̌ dingangu něnodẹ kawawěngsing su Sahiding Yehuwa. Datung sawěnahẹ̌ turusẹ̌ mědẹ̌dal᷊ia dingangu datung timuhẹ̌.​—w20.05, hlm. 13.

Apa ’buang rohkẹ̌ masusi’ kai kětạeng manga sipatẹ̌ nisěbạ su Galatia 5:22, 23?

Tala. Rohkẹ̌ masusi lai botonge makatul᷊ung si kitẹ měnodẹ manga sipatẹ̌ mapaelẹ̌ wal᷊inẹ, kere katatul᷊idẹ̌. (Ef. 5:8, 9)—w20.06, hlm. 17.

Apa bahayane mẹ̌taho komentarẹ̌, foto, arau video su media sosial?

Apa nitahonu su media sosial botonge makakoạ taumata mẹ̌pěndang i kau masanang, bal᷊inẹ masanạ naung.​—w20.07, hlm. 6-7.

Apa wotonge kaěndungang i kitẹ bọu měnanomạ kina?

Měnanomạ kinạ sarung měnomạ su tempo nẹ̌tatahino dingangu su tampạ piạ lawọ kinạ. I sire lai matahuěna měpakẹ haghing alatẹ̌. Kụ, i sire lai bahani měnomạ maning situasi měbẹ̌bal᷊ui. Su tempong měnginjilẹ̌, i kitẹ botonge mẹ̌těno si sire.​—w20.09, hlm. 5.

Apa piram baụ cara botonge koateng i kitẹ gunang mẹ̌tul᷊ung měngangěndung tadeạu limembong kuměndagẹ̌ si Yehuwa?

I kitẹ botonge měmahangsang si sire gunang mẹ̌basa Alkitapẹ̌ ěllo-ěllo dingangu mẹ̌tiněna apa seng niwasang i sire. Bọu ene lai, i kitẹ botonge měněntiro si sire carane mẹ̌doa.​—w20.11, hlm. 4.

I sai termasuk su bawera, ”Kěbị sarung saụ ipěbiahẹ̌ ual᷊ingu i Kristus”?​—1 Kor. 15:22.

Rasul Paulus tawe naul᷊ị kěbị taumata sarung saụ ipěbiahẹ̌. I sie kai nẹ̌bisara soal u tau Kristen apang nilanisẹ̌ kụ ”seng nipakasusi gunang masěmbaụ dingangi Kristus”. (1 Kor. 1:2; 15:18)—w20.12, hlm. 5-6.

Apa sarung koatengu taumata apang niwal᷊ui ”su ral᷊ungu sěngkakondạ, su tempong těrompetẹ̌ kasamuriange himěte”?​—1 Kor. 15:51-53.

I sire sarung tumol᷊e si Yesus kụ měngahạ manga wangsa dingangu těking uase. (Why. 2:26, 27)—w20.12, hlm. 12-13.