¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿La nakalikatsiniyaw tiku xatalaksakni?

Lanka xtapalh liʼakxilhaw xtakanajlakan, pero ni kamalankiyaw. Akinin ni kamalankiyaw amakgapitsin (Jud. 16, nota). Ni katlawaniyaw takgalhskinin nema ni kinkalakgchanan nakatsiyaw xlakata xtakgalhkgalhinkan (w20.01, página 29).

¿Tuku likatsiyaw pi Jehová kinkalilakgaputsayan chatunu chatunu akinin?

Biblia masiya pi Jehová kinkaʼakxilhni asta maski nina xlakachinaw chu kgaxmata oraciones nema tlawaniyaw. Nachuna katsi tuku wi kkinakujkan chu tuku lakpuwanaw. Nachuna, tuku tlawayaw tlan namakgapaxuwa o ni (1 Crón. 28:9; Prov. 27:11). Chu tlawanit pi natalakatsuwiniyaw (w20.02, página 12).

¿Tuku kilhtamaku tlan nachuwinanaw chu tuku kilhtamaku ni nachuwinanaw?

Kinkamakgapaxuwayan akxni lichuwinanaw Jehová. Na kilichuwinatkan akxni akxilhaw pi wi tiku tlawama tuku nitlan. Lakgkgolotsin kastakyawakgo natalan akxni maklakaskinkgo. Ni kgalhskininanaw chu ni lichuwinanaw la tlawakan kintaskujutkan niku ni mastakan talakaskin nakakninaniyaw Dios. Ni lichuwinanaw tuku ni xlikatsitkan amakgapitsin (w20.03, páginas 20 chu 21).

¿Tuku litalakgpalikgo xtuki nema lichuwinan capítulo 2 xla Joel chu nema lichuwinan capítulo 9 xla Apocalipsis?

Joel 2:20-29 wan pi Dios makgat xʼama kalin xtuki chu wan pi xʼama lakkaxtlawa tuku nitlan xtlawakgolh. Alistalh, xʼama makamin xʼespíritu. Uma kgantaxtulh akxni babilonios akgchipakgolh Israel chu alistalh atanu la xʼamapa kgantaxtu. Apocalipsis 9:1-11 kalichuwinan tiku xatalaksakni kkinkilhtamakujkan, tiku lichuwinankgo la namalakgaxokge Dios uma nixatlan kakilhtamaku, tuku lu nitlan limakgkatsikgo tiku tatayakgo (w20.04, páginas 3 asta 6).

¿Tiku mapakgsina xalak norte litaxtu la uku?

Rusia chu tiku tatayakgo. Lu nitlan tuku katlawaninit xkachikin Dios xlakata malakgachokgokgonit xtaskujutkan xtatayananin Jehová chu xlakata ni kaʼakxilhputunkgo. Mapakgsina xalak norte talalakatawakanit mapakgsina xalak sur (w20.05, página 13).

¿Kajwatiya pulaknajatsa tayat nema talichuwinan kʼGálatas 5:22, 23 tuku «espíritu tlawa pi latamanin nakgalhikgo»?

Ni. Espíritu santo na kinkamakgtayayan nakgalhiyaw atanu tayat, chuna la xaʼakgstitum nalikatsiyaw (Efes. 5:8, 9) (w20.06, página 17).

¿Tuku max lu nitlan nakitaxtu komo namawakayaw kredes sociales fotos, videos o tuku tlawayaw?

Tuku mawakayaw kredes sociales max nalimasiya pi tlankajwa makgatsiyaw chu ni taktujuyaw (w20.07, páginas 6 chu 7).

¿Tuku tlan nakatsiniyaw xpalakatakan xalaktlan skitinanin?

Xalaktlan skitinanin palha skujkgo chu kaputsakgo skiti niku tatekgskgo, liwana maklakaskinkgo tuku liskitinankgo chu ni pekuankgo maski titaxtukgo tuku tuwa. Akinin na tlan chuna natlawayaw akxni lichuwinanaw Dios (w20.09, página 5).

¿La tlan nakamakgtayayaw tiku kalimakgalhtawakgemaw Biblia xlakata tlakg napaxkikgo Jehová?

Tlan nakamakgpuwantiniyaw nalikgalhtawakgakgo Biblia chali chali, nakamakgtayayaw nalilakpuwankgo tuku likgalhtawakgakgo chu nakamasiyaniyaw la natlawakgo oración (w20.11, página 4).

¿Tiku na xkalichuwinama Pablo akxni wa pi «xpalakata Cristo putum nakamaxkiparakan latamat»? (1 Cor. 15:22).

Apóstol Pablo ni xwamputun pi putum latamanin nakamalakastakwanikan. Akxni wa «putum» na xkakilhchanima tiku xatalaksakni, “tiku Dios kamasantujlinit la xtamakgalhtawakgen Cristo Jesús” (1 Cor. 1:2; 15:18) (w20.12, páginas 5 chu 6).

¿Tuku natlawakgo tiku xatalaksakni akxni «kaj xalakapala» nakalakgpalikan, «akxni namatasikan xaʼawatiya trompeta»? (1 Cor. 15:51-53).

Namakgtayakgo Jesús akxni nakalipulalin kachikinin lixtokgo xla likan (Apoc. 2:26, 27) (w20.12, páginas 12 chu 13).