Makanyasa kuerenga misoro ye Murindiri ye gore rino here? Kana zviri izvona, onai kuti munokwanisa here kudaira mibvunzo dzinoteera:

Tinodikana kubata kudini aKristu akadzodzwa?

Tinotenda kutenda kawo kakabamba; asi, atidikani kuita izvona zvakanyanyisa. Tinodziisa “kuasimba zvakanyanyisa.” (Dju. 16, masoko opasi) Atiyaiti mibvunzo ino cokuita no kariro yawo.—w20.01, paji. 29, (mu ciShona).

Cinyi cingamubetserai kuti mugare necokwadi cekuti Djehovha anomuonai imwimwi pacenyu?

Bhaibheri rinopangidza kuti ayena akamuonai amusati matobarhwa. Uye anozwa minamato yenyu. Ayena anoziya zvamunorangarira no zviri mumwoyo menyu, uye zvamunoita zvinomubata-bata. (1 Mak. 28:9; Zvie. 27:11) Ayena ndiyena akamukweyai.—w20.02, paji. 12, (mu ciShona).

Miezaniso ipi inotibetsera kuziya patinodikana kureketa no patisikadikani kureketa?

Tinopfara patinoreketa nge zva Djehovha. Tinoreketa paya patinoona munhu ecitora gwanza rakashata. Akuru e ungano anoreketa ecipasa zano kana zvecidikanwa. Atireketi (kana kuti kubararisa) nge zve masoko anocokuita no basa redu mu nyika dzinorambidzwa. Atireketi masoko akaigika.—w20.03, mapaji. 20-21, (mu ciShona).

Makwiza anorekethwa muna Joeri kapituro 2 akasiyana papi no anorekethwa muna Zvakapangidzwa kapituro 9?

Pana Joeri 2:20-29 Mwari anogogomera makwiza aya uye anogondesa kutsiya zvese zvaakuwadza. Mumasure me izvi, Mwari anodurura mwiya wake. Zviro izvi zvakadzadzika aBhabhironi paakaparadza nyika ye aIsraeri uye mberiyo. Zvakapangidzwa 9:1-11 Inoreketa nge zve aKristu akadzodzwa e mazuwa ano awo anoparidzira kutonga ka Mwari kaacaita nyika ino yakashata, weciita kuti atsigiri ayo anetseke maningi.—w20.04, pp. 3-6, (mu ciShona).

Ndiani mambo we kakutsi we mazuwa ano?

Russia uye no abetseri ayo. Iwona ari kunetsa anhu a Mwari , eciimisa misangano yedu uye ecipangidza uzondi ku Apupuri a Djehovha. Mambo we kakutsi ari kunetsana no mambo we ku matemaedumba.—w20.05, paji. 13, (mu ciShona).

‘Zvibereko zve mwiya’ zvinorekethwa pana Agaratiya 5:22, 23, ndizvona zvega zviripo here?

Haiwa. Mwiya mucena unotibetsera kuti tisakurire mawara amweni akanaka e kutunhudzira, hingana unatsi. (Aef. 5:8, 9)—w20.06, paji. 17, (mu ciShona).

I ngozi ipi iripo pa kukanda masoko ano cokuita na imwimwi pa interneti?

Mafoto amunokanda mu internet anokwanisa kupangidza kuti muri kudzikudza, haiwa kudzidodosa.—w20.07, mapaji. 6-7, (mu ciShona).

Aedzi apsva anokwanisa kufundei no aedzi agara no basa?

Anoseenza mu nguwa no mu mbuto dzinobatika howe dzakawanda. Anoroedzwa kuti aseenzese mafaramenta anodikana. anoshinga pakuseenza no migarire yakashata.—w20.09, paji. 5.

I mishobo ipi yatingabetsera nayo afundi edu e Bhaibheri kuti akudze rudo rawo na Djehovha?

Tingaakohomedzesa kuti aerenge Bhaibheri mazuwa ese uye anyase kurangarira zvaanonga ecierenga. Uye tingaafundisa kunamata.—w20.11, paji. 4.

Ndiyanani anobatanidzwa pa masoko ekuti: “Na Kristu ese acamutswa”?—1Ako. 15:22.

Muphostori Pauro wainga asikareketi kuti anhu ese aizomutswa. Iyena waireketa nge zve aKristu akadzodzwa, aya ainga “aceneswa pamwepo na Kristu.” (1Ako. 1:2; 15:18)—w20.12, mapaji. 5-6.

Zvinyi zvicaizwa no aKristu akadzodzwa mumasure me ‘kucinjwa mu kuphaira ke dziso, mu kurira ke trombeta ye kupedzesera’?—1Ako. 15:51-53.

Awona acabatana pamwepo na Kritu pa kutonga anhu no Ndonga yo simbi. (Zva. 2:26, 27)—w20.12, mapaji. 12-13.