¿Mi akʼupinoj skʼelel Li Jkʼel-osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼu yelan skʼan xkiltik li buchʼutik tʼujbil chbatik ta vinajele?

Ep sbalil chkiltik ti oy xchʼunel yoʼontonike, pe maʼuk ti toj mas xa noʼox chkichʼtik ta mukʼe. Mu jkʼantik ti lek xa tajek chkalbetik skʼoplalike o ti jtoybetik tajek skʼoplalike (Jud. 16). Muʼyuk ta jakʼtik li kʼusi xuʼ chopol-o xaʼi sbaik kuʼuntike (w20.01, paj. 28, 29).

¿Kʼuxi jnaʼojtik ti te sat ta jtojolaltik li Jeovae?

Li Vivliae chal ti laj xa onoʼox yakʼ tal sat ta jtojolaltik Jeova kʼalal skʼan toʼox xijvokʼe. Jech xtok, chchikinta j-orasiontik, snaʼoj li kʼusi oy ta yut koʼontontik xchiʼuk ta jnopbentike. Li kʼusitik ta jpastike xuʼ xmuyubaj-o kuʼuntik o xuʼ xat-o yoʼonton (1 Kron. 28:9; Prov. 27:11). Jaʼ laj yikʼutik tal stuk li Jeovae (w20.02, paj. 12).

¿Kʼusi ora skʼan xijkʼopoj xchiʼuk bak’in skʼan tsʼijil xijkom?

Ta jkʼupintik yalbel skʼoplal li Jeovae. Jech xtok, skʼan ta slekiluk koʼontontik xkalbetik mi oy buchʼu chchʼay xa ta be chkiltike. Li moletik eke tstojobtasik li ermanoetik kʼalal chtun yuʼun chilike. Muʼyuk ta jakʼtik mi jaʼuk ta xkaltik kʼu yelan ta jpas kabteltik li ta lumetik ti bu mu xakʼike. Muʼyuk ta jpuktik batel li kʼusi mu stakʼ alele (w20.03, paj. 20, 21).

¿Kʼusi sjelbenal li kʼulubetik chal ta Joel kapitulo 2 xchiʼuk li kʼulubetik ta Apokalipsis kapitulo 9?

Li ta Joel 2:20 kʼalal ta 29, chal ti nom to bu tsnuts batel kʼulubetik li Jeovae xchiʼuk ti chkʼexta skotol li kʼusi la slajesike. Ta tsʼakal une, tsmal yalel tal xchʼul espiritu. Taje jaʼo kʼot ta pasel kʼalal la stsakik ta kʼop j-israeletik li soltaroetik ta Babiloniae xchiʼuk li kʼusi kʼot ta pasel ta mas tsʼakale. Li ta Apokalipsis 9:1 kʼalal ta 11, chalbe skʼoplal li buchʼutik tʼujbil chbatik ta vinajel ti xkoʼolajik ta kʼulubetike, yuʼun jamal chalik batel ti ta onoʼox slajes Dios li chopol krixchanoetike. Taje toj chopol chaʼiik li buchʼutik te skʼoplalike (w20.04, paj. 3-6).

¿Buchʼu jaʼ li ajvalil ta norte avie?

Jaʼ li Rusia xchiʼuk li lumetik ti jmoj sjol xchiʼuke. Oy kʼusitik spasojbe li steklumal Diose: mu xa xakʼ ti xichʼ cholel mantale xchiʼuk skontrainoj tajek li stestigotak Jeovae. Li ajvalil ta nortee stsakoj ta kʼop li ajvalil ta sure (w20.05, paj. 13).

Li baluntos talelal chal ta Galatas 5:22 xchiʼuk 23, ¿mi jaʼ noʼox skotol li «talelaletik chakʼ chʼul espiritue»?

Mu jechuk. Yuʼun li chʼul espiritue xuʼ skoltautik sventa xkakʼtik ta ilel yan talelaletik, jech kʼuchaʼal li tukʼilale (Efes. 5:8, 9) (w20.06, paj. 17).

¿Kʼusi xuʼ van xkakʼtik ta ilel kʼalal ta jmuyes jfototik, videoetik o yan kʼusitik li ta redes socialese?

Li kʼusitik ta jmuyestik ta redes socialese xuʼ xakʼ ta ilel ti xijtoyet xa chkaʼi jbatike, vaʼun muʼyuk xa bikʼit chkakʼ jbatik (w20.07, paj. 6, 7).

¿Kʼusi xuʼ jchanbetik li jtsakchoyetik ti xtojobik leke?

Li jtsakchoyetik ti xtojobik leke tskʼelik kʼusi ora xchiʼuk ti bu xuʼ stsakik mas choye, xtojobik lek stunesel li yabtejebike xchiʼuk jech-o ch-abtejik akʼo mi chakʼ tsatsal ikʼaloʼ. Xuʼ jech jpastik ek kʼalal ta jcholtik mantale (w20.09, paj. 5).

¿Kʼuxi xuʼ jkolta kaj-estudiotik yoʼ masuk to skʼan li Diose?

Jtijbetik yoʼonton yoʼ xchan Svivlia jujun kʼakʼal, jkoltatik yoʼ snopbe skʼoplal li kʼusi chchane xchiʼuk kakʼbetik yil kʼuxi ta pasel orasion (w20.11, paj. 4).

¿Buchʼutik skʼoplal kʼalal xi laj yal li Pabloe: «ta skoj Kristo tsta xkuxlejal skotolik»? (1 Kor. 15:22).

Li jtakbol Pabloe maʼuk la skʼan laj yal ti chchaʼkuxi skotol li krixchanoetike, yuʼun jaʼ laj yalbe skʼoplal li buchʼutik tʼujbil chbatik ta vinajel ti jmoj oyik xchiʼuk Kristo Jesus ti chʼultajesbilike (1 Kor. 1:2; 15:18) (w20.12, paj. 5, 6).

¿Kʼusi tspasik li buchʼutik chbatik ta vinajel kʼalal mi laj yichʼik jelel ta anil ta jvikʼel ta jmutsʼel noʼox ta satile, ti «jaʼo kʼalal chichʼ jupanel li slajeb okʼese»? (1 Kor. 15:51-53).

Tskoltaik Jesus yoʼ spasik ta mantal li lumetike xchiʼuk tstunes xvaxton ti pasbil ta takʼine (Apok. 2:26, 27) (w20.12, paj. 12, 13).