You don take time read this year Watchtower? Try whether you go fit answer this questions:

How we suppose de treat anointed Christians?

Their faith de encourage us; but we no de over respect them. We no “de give people special respect because of who they be.” (Jude 16, ftn.) We no go ask them questions about their hope.​—w20.01, p. 29.

Wetin suppose make you dey sure say Jehovah de notice you?

Bible show say Jehovah know you well even before they born you. And e de listen to your prayer. E know wetin dey inside your heart, and wetin you de think. (1 Chron. 28:9; Prov. 27:11) E don draw you come e side.​—w20.02, p. 12.

Which examples we get about when e good to talk and when e no good to talk?

We de glad as we de talk to people about Jehovah. E good make we talk when we see say person want do wrong thing. Elders de talk when them de give advice to person wey need-am. Make we no de ask person (or tell person) about how our work de go for place wey they stop-am. We no suppose to tell other people about some congregation matter wey they no suppose know.​—w20.03, pp. 20-21.

Wetin make the locusts for Joel chapter 2 dey different from the one for Revelation chapter 9?

Joel 2:20-29 talk say God go drive the locusts comot, and e promise say e go pay for the things wey the locusts don spoil. After that one, God pour e spirit. The first one happen when Babylon soldiers attack Israel and the other one happen after. Revelation 9:1-11 de talk about anointed ones wey be like locusts as they no de fear to tell people about how God go judge this wicked world, and this one de really pain people of the world.​—w20.04, pp. 3-6.

Who be the king of the north today?

Na Russia and other countries wey e de get support from. They attack servants of God as they try to stop the preaching work for the areas wey them de rule, and they show say they hate servants of Jehovah. The king of the north and the king of the south de attack each other.​—w20.05, p. 13.

Na only the nine character them wey dey Galatians 5:​22, 23 be the complete “fruit wey the spirit de produce”?

No. The holy spirit still de help us get other fine character, like to dey righteous. (Eph. 5:​8, 9)​—w20.06, p. 17.

Which danger dey if we de write or put things about ourself for Internet?

The thing wey you write or put for Internet fit make people feel say you dey proud, and you no dey humble.​—w20.07, pp. 6-7.

Wetin we fit learn from fishermen wey sabi their work as we de preach the good news?

Them de work for time and place wey they fit see fish catch. They know how to use the correct tools. And them de work with strong heart even when weather change. We fit do like them for our preaching work.​—w20.09, p. 5.

Wetin be some ways wey we fit help our Bible students to love Jehovah more-more?

We fit encourage them to read Bible everyday and think deep about wetin they don read. And we fit teach them to pray.​—w20.11, p. 4.

Which people dey part of wetin Bible talk, when e say: “Everybody go dey alive again because of Christ”?​—1 Cor. 15:22.

Apostle Paul no de talk say everybody go come back to life. E de talk about anointed Christians, people wey “God don make to be holy people to dey as one with Christ Jesus.” (1 Cor. 1:2; 15:18)​—w20.12, pp. 5-6.

Wetin anointed Christians go do after they don ‘change even before person close eye open-am’ when the last trumpet go blow?​—1 Cor. 15:51-53.

They go join Jesus destroy the people with iron rod. (Rev. 2:​26, 27)​—w20.12, pp. 12-13.