Zebabulela Batu Ka Za Kulapela
“Hanilapela, niikutwanga inge kuli Mulimu u kwatuko ni na, unisweli kwa lizoho mi wanietelela.”—Bo MARÍA.
“Musalaa ka naashwile hamulaho wa kukula kansa ka lilimo ze 13. Nenilapelanga ku Mulimu zazi ni zazi mi neniikutwanga kuli naateelezanga kwa litapelo zaka ka nako yetaata yeo. Neniikutwanga kuomba-ombiwa luli.”—Bo RAÚL.
“Tapelo ki mpo yende yalufile Mulimu.”—Bo ARNE.
Bo María, bo Raúl, bo Arne, ni babañwi babañata, baanga kuli tapelo ki mpo yende hahulu. Baikutwa kuli mwa tapelo, bakona kuambola ni Mulimu, kuitumela ku yena, ni kumukupa kuli abatuse. Balumelelana ni manzwi afumaneha mwa Bibele abulela ka za kulapela ku Mulimu, aali: “Bo ki bona buikolwiso bolunani ku yena, kuli halukupa nto ifi kamba ifi ka kuya ka tato yahae, waluutwa.”—1 Joani 5:14.
Nihakulicwalo, batu babañata habalumeli zeibulela Bibele ka za tapelo. Bo Steve batalusa mone baikutwelanga ka za kulapela. Bali: “Hane ninani lilimo ze 17, balikani baka babalaalu nebashwile kabakala likozi zepeli zeshutana. Alimuñwi naashwezwi mwa kozi ya fa mukwakwa, mi bababeli nebashwezi mwa liwate hamulaho wa kutiba.” Ki lika mañi zene baezize bo Steve? Batalusa kuli: “Nenilapezi ku Mulimu kuli anituse kuziba libaka lika zeo hane liezahezi, kono naasika alaba tapelo yaka. Kacwalo naipuza kuli, ‘Ki kabakalañi haniswanela kuzwelapili kulapela?’” Batu babañata baikutwa kuli litapelo zabona halialabiwangi, kacwalo banahananga kuli kulapela hakutusi sesiñwi.
Hape kunani mabaka amañwi batu babañwi habaikutwanga kuli kulapela haku batusi. Babañwi babulelanga kuli bakeñisa kuli Mulimu waziba lika kaufela, waziba ni kale zelutokwa mi waziba matata elukopana ni ona, kacwalo, hakuna tuso ya kumubulelela lika zaziba ni kale.
Babañwi bona balumela kuli Mulimu halati kuteeleza kwa litapelo zabona bakeñisa mafosisa ane baezize kwamulaho. Bo Jenny babulela kuli: “Butata boninani ki bwa kuli, niikutwanga kusaba wa butokwa. Neniezize lika zemaswe kwamulaho, kacwalo ninahana kuli Mulimu hakoni kuutwa litapelo zaka.”
Muikutwa cwañi ka za kulapela? Haiba mukile mwaba ni mubonelo oswana ni wa batu bolunyakisisize mwa taba ye, kamba haiba mwakakanyanga ka za kulapela, mukatabela kuziba kuli Bibele yakona kumitusa kufumana likalabo zende ka za tapelo. Lwakona kusepa zeibulela Bibele ka za tapelo; * kakuli yakona kulutusa kufumana likalabo kwa lipuzo zelatelela:
-
Kana luli Mulimu wautwanga litapelo zaluna?
-
Ki kabakalañi Mulimu hasaalabangi litapelo zeñwi?
-
Muswanela kulapela cwañi kuli Mulimu aalabe litapelo zamina?
-
Kulapela kukona kumitusa cwañi?
^ para. 9 Mwa Bibele, kunani mitala ya batanga ba Mulimu bane balapelanga ku yena, kukopanyeleza cwalo ni Jesu Kreste. Mwa Mañolo a Siheberu ili azibahala kuli ki Testamente Yakale, kunani litapelo zefitelela 150.
Hape Mwendi Mwakona Kutabela Litaba Ze
BABANCA BABUZA KULI
Ki Kabakalañi Haniswanela Kulapelanga?
Kana kulapela kutusanga feela mutu kuikutwa hande kamba kunani lituso zeñwi hape?
MUZUHE!
Bibele I Bulelañi ka za Tapelo?
Kana lwa swanela ku lapela kwa mangeloi kamba kwa bahalalehi?
