Tlen miyekej kinemiliaj ijkuak kinotsaj toTajtsin
“Ijkuak niknotsa toTajtsin, nikmachilia ika nouan nemi, nechmatilantiuj niman nechyekantiuj ijkuak xok nikmati kanon ika nias” (MARÍA).
“Nosiuatsin okipix cáncer 13 xiuitl, sakin omik. Nikilnamiki ika mojmostla niknotsaya toTajtsin, nikmachiliaya ika yejua nechkakiya niman yejon nechyolseuiaya” (RAÚL).
“Tiknotsaskej toTajtsin se kualtsin tetlayokolijli tlen yejua yotechmakak” (ARNE).
Tiknotsas toTajtsin se kualtsin tetlayokolijli, ijkon yokimachilijkej María, Raúl, Arne niman miyekej oksekimej. Kimachiliaj ika ueli tlajtouaj iuan toTajtsin, ueli kitlasojkamachiliaj niman ueli kitlajtlaniliaj makinpaleui. Yejuamej kineltokaj tlen kijtoua Biblia itech tiknotsas toTajtsin: “Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis” (1 Juan 5:14).
Maski ijkon, miyekej xkineltokaj tlen kijtoua Biblia. Steve techijlia tlen kinemilia: “Ijkuak nikpiaya 17 xiuitl, yeyimej noamigos omijkej: Se omik ipan se carro niman omemej oamimijkej”. ¿Tlenon okichiuj Steve? “Oniktlajtolti toTajtsin tleka ijkon opanok, san ika, xkeman onechnankili. Kuakon oninotlajtolti: ‘¿Tepaleui tiknotsas toTajtsin?’”. Miyekej noijki ijkon yonomachilijkej niman notlajtoltiaj tla tepaleui tiknotsas toTajtsin.
Niman sekimej kinemiliaj ika xitlaj ika tepaleui tiknotsas toTajtsin. Kijtouaj ika pampa toTajtsin nochi kimatstika, kimati tlenon techajmana niman tlenon techpoloua. Ika yejon, xnoneki tikijliskej tlenon topan nochiua.
Oksekimej kinemiliaj ika toTajtsin xkineki kinkakis pampa okichiujkej tlen xkuajli. Jenny kijtoua: “Nikmachilia ika xtlaj ika nitepaleui. Yonikchiuj miyek tlen xkuajli, ika yejon, kuajli nikmatstika ika xnechnamiki manechkaki toTajtsin”.
¿Niman tlenon tiknemilia tejua? ¿Kemantika noijki yotiknemilijka ika toTajtsin xtechkaki? Tla ijkon, tiyolpakis tikmatis ika Biblia mitsnankilia tlen tikmatisneki. Uelis tikneltokas tlen Biblia kijtoua. * Biblia mitsnankilia yejuin:
-
¿Yemelak techkaki toTajtsin?
-
¿Tleka kemantika xtechnankilia?
-
¿Kenon noneki tiknotsaskej tla tiknekij matechkaki?
-
¿Tlenon ika mitspaleuis tiknotsas toTajtsin?
^ párr. 9 Biblia kijtoua ika Jesús okinots toTajtsin niman miyekej noijki ijkon okichiujkej. San ipan Tlajkuiloltin ika Hebreo, tlen noijki noixmati ken Antiguo Testamento, kinteneua ipantsin 150 teoyomej noso oraciones.
Puede que también le interese
TLEN NOTLAJTOLTIAJ TELPOKAMEJ
¿Tleka melak noneki matiknotsakan toTajtsin?
teoyotl, jehová, tleka noneki tiknotsaskej, totajtsin, tlenon kijtosneki teoyotl, techkaki, tiknisiuiskej totajtsin, tlenon tikijliskej totajtsin, biblia
