Seo Batho ba se Bolelago ka go Rapela

BAPALA

MARIA o re: “Ge ke rapela, ke ikwa eka Modimo o kgauswi le nna e bile o ntshwere ka seatla sa gagwe, le gona ge ke ikwa eka ke lahlegile, o a ntlhahla.”

RAUL o re: “Mosadi wa ka o ile a swarwa ke bolwetši bja kankere ka mengwaga e 13, gomme ka morago a hlokofala. Letšatši le letšatši ge ke be ke ekwa bohloko, ke be ke rapela Modimo. Le gona ke be ke tseba gore o ntheeditše, le gore o kwešiša bohloko bjo ke bego ke bo kwa. Ka morago ga gore ke rapele ke be ke ikwa ke ena le khutšo ya monagano.”

ARNE o re: “Thapelo ke mpho e botse yeo Modimo a re filego yona.”

María, Raúl, Arne, le batho ba bangwe ba bantši, ba lebelela thapelo e le mpho e bohlokwa kudu. Ba bona thapelo e le tsela e nngwe ya gore ba boledišane le Modimo, ba mo leboge le gore ba mo kgopele thušo. Le gona, ba tloga ba tshepa mantšu ao a lego ka Mangwalong a Makgethwa ao a bolelago ka thapelo. Mantšu ao a re: “Ye ke kgodišego ye re nago le yona ya gore go sa šetšwe seo re se kgopelago go ya ka thato ya Modimo, Modimo o a re kwa.”—1 Johane 5:14.

Lega go le bjalo batho ba bantši ga ba tshepe seo se bolelwago ke lengwalo le. Steve o re botša gore yena o be a ikwa bjang ka go rapela Modimo. O re: “Ge ke be ke na le mengwaga e 17, bagwera ba ka ba bararo ba ile ba hlokofala, yo mongwe o bolailwe ke kotsi ya koloi gomme ba babedi ba ile ba kgangwa ke meetse.” Ke’ng seo Steve a ilego a se dira? O re: “Ke ile ka rapela Modimo ke nyaka go tseba gore ke ka baka la eng bagwera ba ka ba hlokofetše, eupša ga sa nka a nkaraba. Mafelelong ke ile ka ipotšiša gore, ‘Go re’ng ke itshwenya ka go hlwa ke rapela?’” Go no swana le Steve, batho ba bantši ba bona okare Modimo ga a arabe dithapelo tša bona gomme seo se ba dira gore ba bone eka go rapela ga go na mohola.

Batho ba bangwe ba na le mabaka ao a dirago gore ba bone okare go rapela ga go ba thuše ka selo. Ba bangwe ba re ka ge Modimo a tseba dilo ka moka tšeo di diregago bophelong bja rena, gona ga go hlokagale gore re mmotše mathata a rena goba dilo tšeo re di hlokago, ka gore o šetše a di tseba.

Ba bangwe ba nagana gore Modimo ga a nyake go theetša dithapelo tša bona ka baka la dilo tše mpe tšeo ba di dirilego nakong e fetilego. Jenny o re: “Bothata bja ka bjo bogolo ke gore ke ikwa ke se na mohola. Ke dirile dilo tše di sa kgahlišego tšeo ke itsholelago tšona, gomme seo se ntira gore ke fele ke ikwa ke sa swanelege gore Modimo a ka kwa dithapelo tša ka.”

Wena o ikwa bjang ka go rapela? Ge e ba le wena o ikwa go swana le batho ba re sa tšwago go bolela ka bona ka mo godimo, goba o bona eka Modimo ga a theetše dithapelo tša gago, o se ke wa tshwenyega, Beibele e tla go thuša. E tla go thuša le go kwešiša dilo tše dintši ka thapelo. * Ka mohlala, Beibele e ka go thuša go hwetša dikarabo tša dipotšišo tša go swana le tše di latelago:

Na ruri Modimo o kwa dithapelo tša rena?
Ke ka baka la’ng Modimo a sa arabe dithapelo ka moka?
O ka rapela bjang gore Modimo a kwe dithapelo tša gago?
Go rapela go ka go thuša bjang?

^ ser. 9 Beibele e na le mehlala ya batho bao ba ilego ba rapela Modimo, go akaretša le Jesu Kriste. Mangwalo a Seheberu ao re a tsebago e le Testamente ya Kgale, a na le dithapelo tše di fetago tše 150.