Oñgeni Ovanthu Vasoka Elikuambelo?
MARÍA wati: “Tyina nemehulilwa, andyilikuambela, ndyityimona okuti, Huku uli ponthele yange mankhuatesako.”
RAÚL wati: “Omuhikuena wange wakalele omanima 13 tyivela, anyimi. Ndyihinangela okuti ankho ndyilikuambela ononthiki ambuho ku Huku. Tyina ndyimona okuti Huku weiva elikuambelo liange, ndyitula omutima.”
ARNE wati: “Elikuambelo otyipuka tyimwe otyiwa Huku aavela ovanthu.”
Ovo María, na Raúl, na Arne, novanthu ovakuavo, vetyimona okuti elikuambelo otyipuka tyimwe otyiwa. Vati tyina velikuambela, vapopia na Huku, avemupandula, avemuiiti evekuateseko. Omokonda yatyi vapopila ngotyo? Omokonda vetavela etyi Ombimbiliya ipopia konthele yelikuambelo. Ombimbiliya yati: ‘Ei oyo onthumbi tunayo mwe, atyiho tuita tyina tyelikuata netyi Huku ahanda, Ngwe ututehelela.’ — 1 Suau 5:14.
Mahi ovanthu vamwe kavetavela etyi Ombimbiliya ipopia konthele yelikuambelo. Steve, wapopia tyimwe alingile etyi elikuambelele. Wati: “Etyi ndyina omanima 17, ankho ndyina omapanga ange vetatu avanyimi. Umwe waviluka netuku-tuku, vevali vankhila melunga.” Oityi Steve alingile? Wati: “Nelikuambelele ku Huku, andyipulu omokonda yatyi ayekela omapanga ange. Mahi, nii ahankhumbulula. Andyisoko andyiti: ‘Opo naina ndyilikuambelela-tyi?’” Ovanthu vamwe kavelikuambela vali, vasoka okuti omalikuambelo avo kaakumbululwa-le, vasoka nga Steve.
Ovakuavo vasoka ñga: ‘Huku wii ovipuka aviho. Ovitateka viange uvieete-ale, netyi nahanda utyii. Opo ndyilikuambelela-tyi?’
Vamwe vasoka okuti Huku kameveivi-ale ine velikuambela mokonda kohale valingile ovipuka viapenga. Jenny wati: “Ame ndyina otyitateka, nelitomba ngoti hisilivila-le. Ame nelivela umwe ovipuka aviho nalingaile! Mahi apeho ndyisoka vala okuti, Huku kapondola okusuka nomunthu nga ame.”
Iya ove? Tyina usoka elikuambelo oityi tyiya momutwe? Okuti una etyi wahanoñgonokele nawa tyayemba kelikuambelo? Utyii okuti Ombimbiliya ipondola okukuatesa utyinoñgonoke? Ombimbiliya, oyo muene ipopia elikuambelo; * Ipondola okukukuatesako okuvasa omakumbululo omapulo ngaa:
-
Okuti Huku utehelela umwe omalikuambelo etu?
-
Omokonda yatyi Huku ahakumbululila omalikuambelo amwe?
-
Oñgeni tuna okulikuambela opo etutehelele?
-
Oñgeni elikuambelo lipondola okukukuatesako?
^ pal. 9 Mo Mbimbiliya muahonekwa omalikuambelo omanyingi alingilwe novaumbili va Huku vo kohale. Atee umwe muahonekwa omalikuambelo a Sesusi Kilisitu. Mo Testamendu Onkhulu, okupolelela momukanda wa Genesis atee mu Malaquias, muahonekwa omalikuambelo alamba po 150.
Hamwe Noove Uhanda
OVAKWENDYE VAPULA
Oityi Tuesukisila Okulikuambela?
Okuti ñgaa okulikuambela pena umwe etyi tyilinga, ine okupeselela-po vala omuvo?
OMUTALA WOMULAVI
Okuti Wesukisa Okulikuambela?
Huku upondola okukumbulula omalikuambelo tyihalingi omahuviso.
