Leswi Vhanu Va Swi Hlayaka Mayelanu Ni Ku Khongota
“Loko ni khongota, ni titwa na ni li tlhelweni ka Xikwembu Nkulukumba, a khome voko dzranga a ni kongomisa loko ni lahlekile ni nga tivi xa ku xi yentxa.”—MARÍA.
“A nsati wanga a fe ntsrhaku ka 13 wa malembe na a xanisiwa hi mavabyi ya kankru. Ni dzrimuka leswaku a ni khongota siku ni siku ka Xikwembu Nkulukumba nakone a ni titwa na a ni yingela ni ku tlhela a vona ku vavisaka kwanga. Leswo a swi ni zrulisa mbilu.”—RAÚL.
“Xikhongoto i xihiwa xa ku hlamalisa lexi Xikwembu Nkulukumba a xi nyikaka vhanu.”—ARNE.
Ka María na Raúl, Arne ni van’wana a xikhongoto i xihiwa xa ku hlawuleka. Loko va khongota va titwa na va khanela na Xikwembu Nkulukumba, va mu tlangela, ni ku kombela mpfunu ka yene. Vone va kholwa hi ku helela ka leswi Bibele dzri swi hlayaka mayelanu ni ku khongota ka Xikwembu Nkulukumba. Dzrone dzri li: ‘A ku dumba loku hi nga naku ka yene hi loku, leswaku loko hi kombela ntxhumu hi ku zrandzra kwakwe, a hi yingela.’—1 Yohan 5:14.
Kambe vanyingi swa va kazratela ku kholwa leswi Bibele dzri swi hlayaka mayelanu ni ku khongota ka Xikwembu Nkulukumba. Steve a hlaya leswi a a swi pimisa hi xikhongoto: “Loko ni ni 17 wa malembe, ni luzekeliwe hi vanghanu vazrazru. Mun’we a fe hi mhangu ya movha kasi vabidzri va fe hi ku mbombomela matini.” Ntsrhaku ka leswo, i yini leswi Steve a swi yentxiki? A li: “Ni khongote ka Xikwembu Nkulukumba ni vutisa leswaku ha yini ni humeleliwa hi makhombo hinkwawu lawo. Kambe a ni hlamuliwanga ha mhunu. Kutani ni pimise leswi: ‘Swi pfuna yini ku khongota?’” Ku fana na Steve, vanyingi va yanakanya leswaku swikhongoto swavu a swi hlamuliwi kutani va tivutisa leswaku swi siza yini ku khongota.
Kambe lexo a hi xone ntsena xivangelo xa ku va vhanu va nga khongoti. Va vona leswaku swanga hi leswi Xikwembu Nkulukumba a tivaka mintxhumu hinkwayu, a swi zi swi vilela leswaku hi khongota hi mu byela swikazratu swezru kumbe ku mu kombela ntxhumu wa kukazri.
Vhanu vambeni va pimisa leswaku Xikwembu Nkulukumba a nga swi djuli ku va yingela hi mhaka ya mintxhumu ya ku biha va samiki va yi yentxa va tlhela va tilaya hi mhaka ya mintxhumu hinkwayu leyi va yi yentxiki. Xileswo, va titwa va nga faneleki ku twiwa hi Xikwembu Nkulukumba.
Wene ke? Hi dzrini vonela dzraku hi xikhongoto? Loko u same u titwa ku fana ni vhanu lava, u ta nyonxa hi ku tiva leswi Bibele dzri swi hlayaka mayelanu ni xikhongoto. Hine hi nga dumba leswi Bibele dzri swi hlayaka. * Dzrone dzri hi pfuna ku kuma tinhlamulo ta swivutiso swinyingi swa ku fana ni leswi:
-
Xana Xikwembu Nkulukumba awa swi yingela swikongoto swezru?
-
Ha yini Xikwembu Nkulukumba a nga hlamuli swikhongoto swimbeni?
-
Ni nga khongota hi ndlela yini akuva Xikwembu Nkulukumba a ni yingela?
-
Ku khongota ka Xikwembu Nkulukumba swi nga hi pfuna hi ndlela yini?
^ par. 9 Bibele dzri ni swikhongoto swa malandzra manyingi ya Xikwembu Nkulukumba, ku patsra ni swa Yesu Kriste. Matsralwa ya xi-Heberu, lawa hi ntolovelo ma vitaniwaka Testamente dzra Khale, ma ni ku tlula 150 wa swikhongoto.
You May Also Like
LESWI VAMPSHWA VA SWI VUTISAKA
Ha Yini Ni Fanela Ku Khongota?
Xana xikhongoto xi yentxeliwe kuva xi pfuna vhanu leswaku va titwa na va yampswha kumbe xi va pfuna ka mintxhumu yin’wana?
