Maikutlo a Batho ke Afe ka Thapelo?
“Ha ke rapela ke ee ke utloe eka Molimo o pel’a ka, o ntšoere ka letsoho ’me oa ntataisa ha ke utloa eka ke lahlehile.”—MARÍA.
“Mosali oa ka o ile a hlokahala ka mora lilemo tse 13 a tšoeroe ke kankere. Ke hopola ke rapela Molimo letsatsi le letsatsi ’me ke ne ke utloa hore o ’mametse nakong ena eo ke neng ke utloile bohloko. Ke ne ke e-na le khotso.”—RAÚL.
“Thapelo ke mpho ea bohlokoa eo Molimo a re fileng eona.”—ARNE.
María, Raúl, Arne le ba bang ba bangata, ba nka thapelo e le mpho e ikhethang. Ba lumela hore thapelo e ba thusa ho bua le Molimo, ho mo leboha le ho mo kopa thuso. Ba kholisehile hore seo Bibele e se buang ka thapelo ke ’nete ha e re: “Ena ke kholiseho eo re nang le eona ho eena, hore, ho sa tsotellehe hore na ke eng eo re e kopang ho ea ka thato ea hae, oa re utloa.”—1 Johanne 5:14.
Ka lehlakoreng le leng, batho ba bangata ha ba lumele seo lengolo lena le se buang. Steve oa re bolella hore na o ne a ikutloa joang ka thapelo. O re: “Ha ke le lilemo li 17, metsoalle ea ka e meraro e ile ea hlokahala liketsahalong tse peli tse fapaneng. E mong o ile a hlokahalla kotsing ea koloi, ha ba babeli ba ile ba khangoa ke metsi leoatleng.” Steve o ile a etsa’ng? O re: “Ke ile ka rapela Molimo ke batla ho tseba hore na ke hobane’ng ha seo se etsahetse, empa ha kea ka ka fumana karabo. Kahoo ke ile ka ipotsa ka re:
‘Thuso ke efe ea ho rapela?’ ” Ha batho ba bangata ba utloa eka lithapelo tsa bona ha li arajoe, baa ipotsa hore na thuso ke efe ea ho tsoela pele ba rapela.Ho boetse ho na le mabaka a mang a etsang hore batho ba bang ba utloe eka thapelo ha e ba thuse. Ba bang bona ba re kaha Molimo o tseba lintho tsohle, o se a ntse a tseba hore na re hloka eng le hore na mathata a rona ke afe, kahoo ha ho hlokahale hore re mo bolelle lintho tsena.
Ba bang ba lumela hore Molimo ha a batle ho mamela lithapelo tsa bona ka lebaka la liphoso tseo ba ileng ba li etsa nakong e fetileng. Jenny o re: “Bothata ba ka bo boholo ke hore ke ikutloa ke se na thuso. Ke entse lintho tseo ke ikoahlaelang tsona, kahoo ke itjoetsitse hore ha ke tšoaneloe ke hore Molimo a ’mamele.”
Uena o ikutloa joang ka thapelo? Haeba le uena u kile oa ba le maikutlo a tšoanang, u ka tšelisoa ke ho tseba hore Bibele e fana ka likarabo tse khotsofatsang. Re ka tšepa seo Bibele e se buang ka thapelo. * E ka re thusa ho fumana likarabo tsa lipotso tse tšoanang le tsena tse latelang:
-
Na ehlile Molimo o utloa lithapelo tsa rona?
-
Ke hobane’ng ha Molimo a sa arabe lithapelo tse ling?
-
U ka rapela joang e le hore Molimo a u utloe?
-
Ho rapela ho ka u thusa joang?
^ ser. 9 Bibele e na le lithapelo tse ngata tsa bahlanka ba Molimo, ho akarelletsa le tsa Jesu Kreste. Mangolo a Seheberu a tloaelehileng ka hore ke Testamente ea Khale, a na le lithapelo tse ka holimo ho 150.