“Kan nagpapabulong ako kan kanser ko, parati akong nakakamati nin grabeng takot,” an paliwanag ni Pamela. “Pero pag namimibi ako sa Diyos na Jehova, nakakalma an pagmati ko asin nakakaya ko an sitwasyon ko. Pirmi pa man giraray akong nakakamati nin grabeng kulog, alagad natatabangan ako kan pamibi na magdanay na positibo. Pag kinukumusta ako, sinasabi ko, ‘Bakong marahay an pagmati ko, pero maugma ako!’”

Siyempre, dai ta na paghalaton pa na magkaigwa kita nin hilang na puwede tang ikagadan bago kita mamibi. Gabos kita nag-aagi nin mga kadipisilan, dakula man iyan o sadit, asin sa parati nakakamati kita na kaipuhan ta nin tabang para makayanan an mga iyan. Makakatabang daw an pamibi?

An Bibliya nagsasabi: ‘Bugtakan diyan ki Jehova an saimong pasan, asin aatamanon ka niya. Dai [niya] papabayaan sagkod lamang na mahulog an [matanos].’ (Salmo 55:22) Nakakaranga nanggad iyan! Kaya paano ka matatabangan kan pamibi? Pag namimibi ka sa Diyos sa tamang paagi, itatao niya saimo an kaipuhan mo para makayanan an saimong mga kadipisilan.—Hilingon an kahon na “ Kun Ano an Maitatao Saimo kan mga Pamibi.”