Pamela wa tja: “Indu tjee pangwa omutjise wandje wokangera ami mba ri nomburuma tjinene. Posi yokutja, indu tjee kumbu ku Jehova Mukuru mba uta okurimuna ohange momuinyo nokuhinokurikenda tjinene. Ami ngamba mbi hihamwa, posi yokutja ongumbiro i ndji vatera kutja mbi kare noumune ouwa. Indu ovandu tji ve ndji pura kutja mbi ri vi, ami mbi tja: ‘Hiri nawa posi yokutja mbi nondjoroka.’”

Otjingaperi kutja katu sokuundja nga indu tji tu ri kehi yomutjise omuzeu okukumba ku Mukuru. Eṱe atuhe tu muna omauzeu omengi pekepeke, nu tu hepa ombatero okuyetuurunga. Hapo okukumba ma ku yenene okukuvatera?

Ombeibela mai tja: “Omerikendero woye ye esa na Muhona, nEye me ku zeuparisa. Eye kamaa tarere ovasemba amave haverwa.” (Epsalme 55:22) Ingo tjiri omambo omahuhumiṋe. Kunao ongumbiro mai yenene okukuvatera vi? Tji mo kumbu ku Mukuru momuano omusemba, eye me kupe imbi mbi mo hepa kutja u tuurunge omauzeu woye.—Lesa okaongo nga “ Ouwa mbu mo munu mokukumba.”