Inki Mutindu Kisambu Lenda Sadisa Nge?

TALA NA

Pamela belaka maladi ya ngolo mpi yandi sosaka kubaka lusansu ya mbote. Ata mpidina, yandi sambaka sambu Nzambi kupesa yandi ngolo ya kukanga ntima na mpasi na yandi. Keti kisambu sadisaka yandi?

Yandi ke tuba nde: “Mbala mingi mono vandaka kuwa boma ntangu mono vandaka kubaka lusansu na maladi na mono ya kansere. Ntangu mono vandaka kusamba Yehowa Nzambi, mono vandaka kuwa ngemba na kati na mono mpi mono kukaka kukanga ntima na bampasi na mono kukonda boma. Mono ke belaka maladi yina ke manaka ve kansi kisambu ke sadisaka mono na kutadila bampasi na mono na mutindu ya mbote. Ntangu bantu ke yulaka mono kana mono ke kudiwa nki mutindu, mono ke songaka bo nde ‘mono ke bela kansi mono kele na kiese.’”

Ya kieleka sambu na kusala kisambu, beto fwete vingila ve kaka nde beto bela maladi mosi ya ngolo to beto kutana ti bampasi ya ngolo. Beto yonso ke kutanaka ti bampasi, yo vanda ya ngolo to ve mpi mbala mingi beto ke vandaka ti mfunu ya lusadisu sambu na kununga bampasi yango. Keti kisambu lenda sadisa beto?

Biblia ke tuba nde: “Losila Yehowa kizitu na nge, ebuna yandi ta sadisa nge. Yandi ta pesa ve nzila ata fioti nde muntu ya lunungu kubwa.” (Nkunga 55:22) Verse yai ke pesa beto kikesa. Yo yina, inki mutindu kisambu lenda sadisa nge? Kana nge ke samba Nzambi na mutindu ya mbote, yandi ta pesa nge bima yina nge kele ti yo mfunu sambu na kunwana ti bampasi.—Tala lupangu “ Mambote Yina Bisambu Lenda Natila Nge.”

Mambote Yina Bisambu Lenda Natila Nge

Ngemba ya mabanza

Biblia ke tuba nde: “Beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno mpi mabanza na beno na nzila ya Kristu Yezu.” (Bafilipi 4:6, 7) Kana nge ke songa Nzambi bampasi na nge, yandi ta sadisa nge na kuvanda na ngemba mpi na kusala mambu na mayele yonso.

Mayele yina ke katukaka na Nzambi

Biblia ke tuba nde: “Kana muntu mosi na kati na beno me konda mayele, bika yandi landa kulomba na Nzambi, sambu yandi ke kabaka mingi na bantu yonso mpi kukonda kunganina, mpi Nzambi ta pesa yandi yo.” (Yakobo 1:5) Bantangu ya nkaka, beto ke bakaka balukanu ya mbi kana bantu ya nkaka ke pusa beto. Kansi, kana nge lomba Nzambi mayele, yandi ta sadisa nge na kuyibuka minsiku mingi yina kele na Ndinga na yandi Biblia.

Ngolo mpi kikesa

Biblia ke tuba nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.” (Bafilipi 4:13) Yehowa Nzambi Nkwa-Ngolo Yonso, ta pesa nge ngolo yina nge kele ti yo mfunu sambu na kunwana ti bampasi to yandi ta sadisa nge na bantangu ya mpasi. (Yezaya 40:29) Biblia ke bingaka mpi Yehowa nde “Nzambi yina ke lembikaka bantu yonso.” Yandi ta lembika beto “na bampasi na beto yonso.”—2 Bakorinto 1:3, 4.

KETI NGE TA ZOLA NDE KISAMBU KUSADISA NGE?

Ya kieleka, Yehowa ke pusa nge ve na kusamba yandi na ngolo. Kansi na zola yonso, yandi ke lomba nge na kusamba yandi. (Yeremia 29:11, 12) Inki nge ta sala kana nge me zwaka ve mvutu na bisambu na nge? Kulemba ve nitu. Bibuti ya mbote lenda sadisa ve bana na bo kaka mutindu bana na bo ke zola to kaka na ntangu yina bana na bo ke yindula. Mbala ya nkaka bibuti kele ti diambu mosi ya mbote ya kusala. Ya kieleka, ntembe kele ve nde bibuti ya zola ke sadisaka bana na bo.

Yehowa Nzambi kele kibuti ya kuluta zola mpi yandi ke zola kusadisa nge. Kana nge tadila mbote-mbote minsiku ya Biblia yina beto tubilaka mpi kusala yonso yina nge lenda sala sambu na kusadila yo, Nzambi ta pesa mvutu na bisambu na nge na mutindu mosi ya mbote.—Nkunga 34:15; Matayo 7:7-11.

Nge Lenda Sepela Mpi Ti

NZOZULU YA NKENGI

https://cms-imgp.jw-cdn.org/img/p/2021008/univ/art/2021008_univ_sqr_xl.jpg

wp21 No. 1 balut. 14-15

Bambangi ya Yehowa

Inki Mutindu Kisambu Lenda Sadisa Nge?

Nge Lenda Sepela Mpi Ti

Inki Mambote Kisambu Lenda Natila Nge?

6 Keti Beto Tabaka Mambote Kana Beto?

Inki Mutindu Kisambu Lenda Sadisa Nge?

KUBAKA

Nge Lenda Sepela Mpi Ti

KUBAKA

Sola Ndinga na Nge

Kabula