តើសេចក្ដីអធិដ្ឋានអាចជួយអ្នកយ៉ាងដូចម្ដេច?
ផាម៉ាឡាមានជំងឺមហារីក ហើយគាត់ខំរកគ្រូពេទ្យដើម្បីព្យាបាលជំងឺនេះ។ ប៉ុន្តែ គាត់ក៏បានអធិដ្ឋានសុំកម្លាំងចិត្តពីព្រះដើម្បីស៊ូទ្រាំនឹងស្ថានភាពដ៏ពិបាកនេះផងដែរ។ តើសេចក្ដីអធិដ្ឋានបានជួយគាត់ឬទេ?
ផាម៉ាឡាបានពន្យល់ថា៖ «ពេលដែលខ្ញុំកំពុងទទួលការព្យាបាលជំងឺមហារីក ខ្ញុំច្រើនតែមានអារម្មណ៍ភ័យខ្លាច។ ប៉ុន្តែពេលដែលខ្ញុំអធិដ្ឋានទៅព្រះយេហូវ៉ា ខ្ញុំមានអារម្មណ៍ស្ងប់ហើយអាចស៊ូទ្រាំបាន។ ខ្ញុំនៅតែឈឺរាំរៃ ប៉ុន្តែសេចក្ដីអធិដ្ឋានបានជួយខ្ញុំឲ្យមានទស្សនៈត្រឹមត្រូវ។ ពេលដែលអ្នកឯទៀតសួរខ្ញុំថា បងសុខសប្បាយទេ? ខ្ញុំឆ្លើយថា ខ្ញុំនៅតែឈឺប៉ុន្តែខ្ញុំសប្បាយចិត្ត»។
ពិតមែន យើងមិនចាំបាច់ចាំរហូតដល់មានជំងឺធ្ងន់ធ្ងរមុនពេលយើងអធិដ្ឋានទៅព្រះឡើយ។ យើងទាំងអស់គ្នាប្រឈមមុខនឹងបញ្ហាទាំងតូចទាំងធំ ហើយជារឿយៗយើងមានអារម្មណ៍ថា យើងត្រូវការជំនួយដើម្បីដោះស្រាយបញ្ហាទាំងអស់នេះ។ តើសេចក្ដីអធិដ្ឋានអាចជួយយើងបានទេ?
គម្ពីរចែងថា៖ «ចូរផ្ទេរបន្ទុករបស់អ្នកទៅលើព្រះយេហូវ៉ា នោះទ្រង់នឹងជួយទប់ទល់អ្នក ទ្រង់មិនព្រមឲ្យមនុស្សសុចរិតត្រូវរង្គើឡើយ»។ (ទំនុកតម្កើង ៥៥:២២) នេះពិតជាសម្រាលទុក្ខយើងមែន! ដូច្នេះ តើតាមរបៀបណាសេចក្ដីអធិដ្ឋានអាចជួយអ្នក? ពេលដែលអ្នកអធិដ្ឋានទៅព្រះតាមរបៀបត្រឹមត្រូវ លោកនឹងផ្ដល់អ្វីដែលអ្នកត្រូវការដើម្បីស៊ូទ្រាំនឹងបញ្ហារបស់អ្នក។—សូមមើលប្រអប់« តើអ្នកអាចទទួលប្រយោជន៍អ្វីពីសេចក្ដីអធិដ្ឋាន?»