Pamela wavova vo: “Ekolo yatambulanga mawuku ma câncer, wonga wayingi yakalanga wau. Kansi, vava yasambanga kwa Yave wa Nzambi, o ntim’ame wavuvama. Kiakala diaka ye wonga ko. E nitu ame yakinu o lunza, kansi e sambu kikunsadisanga mu kala ye ngindu zasikila. Vava wantu bekungiuvulanga: ‘Aweyi kaka?’ Ivutulanga vo: ‘Kina wambote ko, kansi ngina ye kiese.’”

Kieleka, ke tufwete vingilanga ko vo twabakama e kimbevo yovo bwilwa e diambu diampasi, i bosi tusamba kwa Nzambi. Yeto awonso tunuananga ye mambu mampasi ye nkumbu miayingi lusadisu tuvuanga o mfunu muna zizidila e mpasi zazi. Nga e sambu kilenda kutusadisa?

E Bibila kivovanga vo: “Yekeka e zitu diaku kwa Yave, oyandi okusadisa. Kesinga yambula ko vo nsongi kabwa.” (Nkunga 55:22) Ekwe mvovo mia lufiaulwisu! Ozevo, aweyi e sambu kilenda kusadisila? Avo osambidi kwa Nzambi mu mpila yambote, okusadisa mu zizidila e mpasi zaku.—Tala e babu “ Nluta mia Samba kwa Nzambi.”