Pamela alingenie ukuti, “Pakabalilo aka nambililagha ubutuli ubwa mbungo yangu, utubalilo twingi napasyagha fiyo. Loli bo niputile kwa Yehova Kyala, nalyandile ukwipilika kanunu kangi nalekile ukupasya. Ngali ngwipilika ifyakubaba, loli ulwiputo lundulile ukuti niye nulusubilo. Linga abandu bikundalusya muno ngwipilikila, ngubamula ukuti, ‘Ndikwipilika kanunu loli ndiwalusekelo.’”

Bwanaloli ukuti tutikulondiwa ukuti twaghane tasi nindamyo po twiputeghe. Twesa tukwaghana nindamyo, inywamu ninandi loli utubalilo tosa tukulondiwa ubutuli ukuti twifimbilisye kundamyo isi. Ngimba ulwiputo lubaghile ukututula?

Ibaibolo likuti: ‘Bika ikitwalo kyako kwa Yehova, po umwene isakukukasyagha uwe; atisakundeka siku umundu ungolofu ukuti ingileghe mbutolwe.’ (Salimo 55:22) Amasyu agha ghakukasya fiyo. Loli ngimba ulwiputo lubaghile ukubatula bulebule? Linga mukwiputa kwa Kyala munjila inunu, ikuya pakubapa isi mukulondiwa ukuti mwifimbilisye kundamyo isi mukwaghana nasyo.—Keta ibokosi ilyakuti, “ Muno Inyiputo Sibaghile Ukubatulila.”