Pameela togo yitino: “Kaanserete dhibbi amadeennae xagisiˈranni noomma yannara lowo geeshsha yaadoomma. Ikkirono, Yihowa huucciˈre jawaante afiˈroomma; hattono qarraˈya dandee noomma. Xaano buuto dhiwannoeha ikkirono, huuccatto xissoˈya calla hedeemmakki gede kaaˈlitinoe. Mannu ‘Hiittooti woyye noohe?’ yee xaˈmanoe woyite, ‘Dhiwannilla nooe; kayinni hagiirraamete’ yeemma.”

Huuccatto assiˈra hasiissannonkehu buutote dhibbi waadannonke woyite woy qarru iillannonke woyite calla diˈˈikkino. Ninke baalunkura ajono batiˈrono qarru iillannonke; hakko daafira, duucha woyite iillinonke qarra dandee saˈˈate kaaˈlo hasiissannonke. Tennera huuccatto kaaˈlitannonke?

Qullaawu Maxaafi togo yaanno: “Isi irkisannohena, yaaddokki Maganu aana tugi; isi keeraancho qeelamara wore dilaˈˈanno.” (Faarso 55:22) Tini lowo geeshsha jawaachishshanno hedooti. Ikkina, huuccatto kaaˈlitannohehu hiittoonniiti? Maganu gara ikkitino doogonni huucciˈrittoro qarra dandiite saˈˈatto gede kaaˈlannohe.—“ Huuccatto Kaaˈlitannohehu Hiittoonniiti?” yitanno saaxine lai.