Pamela kaa ér, “Shighe u i lu sôron mo kyansa la, ashighe kpishi yange i cier mo iyol. Kpa mea eren msen hen Yehova Aôndo yô, i kundum iyol shi i kera cier mo iyol ga. Zan zan hegen kpa, kwaghnyoon ne ngu a mo her taveraa, kpa ka mea er msen yô, kwagh la a wasem u wan ishima eren kwagh u m fetyô la. Or ka nana pinem er i lum iyol yô, m kaa a nan mer, ‘doom iyol ga, kpa saan mo iyol!’”

Nahan kpa, u ngu wer saa se kegh zan zan se va zua a zayol u una fatyô u wuan se ve se er msen ga. Hanma or cii yô nan ngu yan ican a mbamzeyol; mbamzeyol mban mbagenev ka mba vesen, mbagen ka mba kiriki, man ashighe kpishi ka se soo ser ma se zough a iwasen i se fatyô u nôngon a ve yô. Msen una fatyô u wasen see?

Bibilo kaa ér: “Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga.” (Pasalmi 55:22) Mkaanem mara ka ma surun or ishima kpen kpen! Nahan msen una wase u nena? Aluer u er msen hen Aôndo sha gbenda u vough yô, una na u kwagh u i gbe u u lu a mi ve u fatyô u nôngon a mbamzeyol ou la.—Nenge ngeren u kiriki u a lu a itinekwagh ér, “ Akaa a Msen Una Wase U U Zua a Mi La.”