Pamela wakati, “Nindakasaanguna kusilikwa bulwazi bwakkensa ndakalikukataazikana. Pesi nindakali kukomba kuli Jehova Leza ndakali kubatama alubo ndakali kuba aamaboneno aalikabotu. Nikuba kuti bulwazi oobu tabunamana pe, kukomba kuli Jehova kuli kundigwasya kuti ndikkale kandili aamaboneno aalikabotu. Chiindi bantu nibandibuzya kuti ndilikumvwa biyeni, nga ndabasandula kuti, ‘Ndilikuchiswa pesi ndilabotelwa.’”

Tatweelede kulindila kuti tuchiswe mpawo nitutazookombe. Toonse tuswaanana aamapenzi aasiyene-siyene nkinkaako, kuti tukonzye kulisimya kumapenzi aaya tweelede kukkala katukomba.

Bbayibbele lyaamba kuti: “Kowaala mukuli wako uuminya mumaanza aa Jehova, eelyo walo uyookulanganya. Kunyina nayoolekela muntu uululeme kuti awe.” (Intembauzyo 55:22) Majwi aaya alawumbulizya. Kukomba kukugwasya biyeni? Kuti wakomba kuli Leza munzila njayanda, uyookupa manguzu aakuti ulisimye chiindi nwaaswaanana aabuyumu-yumu.—Langa kabbokesi kati, “ Nzukonzya Kujana Kuti Wakomba.”