Ja yeʼn wa xcholo kabʼtik: «Yajni wanon yijel ja kaʼan yuja cánceri, jitsani ekʼele ochkuj ja xiweli. Pe yajni wa xkayi orasyon ja Jyoba, masni laman wa xkabʼ wala ajyiyon sok wani xbʼobʼ jpensaraʼuk jaman lek. Aytoni kiʼoj jitsan syajal, pe yajelyi orasyon wani skoltayon bʼa mi ja oj waj jkʼujol ja jaw. Yajni ja kristyanoʼik wa sjobʼoweki jastal ayon, wa xkala yabʼye: ‹Mi lek ayukon, pe gustoni ayon›».

Meran, mini tʼilanuk oj ekʼ jbʼajtik jun tsatsal chamel bʼa tito oj katikyi orasyon ja Dyosi. Jpetsaniltik wani x-ekʼ jbʼajtik wokolik, chʼin ma niwan, sok wani xkʼana jkoltajeltik bʼa mi oj el jganatik. ¿Ay maʼ jas wa xkoltani ja orasyoni?

Ja Biblia wa xyala: «Jipa jawa wijkats sbʼaja Jyoba, soka yeʼn ojni skoltaya. Sok mini oj yakan ja maʼ toj ayi amokʼuk» (Salmo 55:22). ¡Janekʼto wa xnikwani ja yaljelik jaw! Anto, ¿jastal oj bʼobʼ skoltayotik ja orasyoni? Yajni wa xkatikyi orasyon ja Dyos ja jastalni wa skʼana ja yeʼn, ojni skoltayotik bʼa oj kuchkujtik ja wokoliki (kʼela ja xetʼan « Ja slekilalik ja yajel orasyoni»).