¿Bin-utʼil ya xjuʼ ya skoltayat te orasion?

TSUMA TA

Te Pamela ay ta tulan chamel-a, jich yuʼun bajt ta doktor. Pero jaʼnix jich la skʼopon Dios, la skʼanbey te yakuk x-akʼbot yip yoʼtan yuʼun ya xkujch yuʼun-a te wokolile. ¿Koltayotbal yuʼun te orasione?

Jich ya yal: «Kʼalal yakon ta poxtayel-a yuʼun te kansere, bayal buelta xiwon. Pero te kʼalal ya jkʼopon te Jehová, ya yakʼbon slamalil kʼinal sok leknax te bin ya jnope. Bayalto bin kʼux ya kaʼiy, pero te kʼalal ya jpas te orasion ya skoltayon yuʼun leknax ya kaʼiy jba. Kʼalal ya sjojkʼoybonik te ants winiketik te bin kilele, jich ya kalbeyik: ‹Ma lek ayon, pero tseʼel koʼtan›».

Melel, ma puersauk yuʼun ay bin kʼax tulan ya xkʼax ta jtojoltik yuʼun jich ya jkʼopontik-a te Diose. jpisiltik ya xkʼax jwokoltik, manchukme bayal o jtebnax, sok ya jkʼantik koltayel yuʼun jich ya xkujch kuʼuntik-a. ¿Yabal skoltayotik te orasione?

Te Biblia jich ya yal: «Aʼbeya Jehová te bin ay awocol yuʼun, ha me ya yaʼbat awip; mayuc bin ora ya yacʼ yahluc te machʼa toj yoʼtan» (Salmo 55:22). ¡Kʼax tʼujbil te kʼopetik ini! Jich yuʼun, ¿bin-utʼil ya xjuʼ ya skoltayotik te orasione? Teme ya jkʼopontik te Dios jich bitʼil ya skʼan yoʼtane, jichme ya skoltayotik yuʼun ya xkujch kuʼuntik-a te wokoliletike (ilawil te seksion « Te bintik lek ya jtatik yuʼun te orasion»).

Te bintik lek ya jtatik yuʼun te orasion

Lamalkʼinal

«Aʼbeya snaʼ Dios spisil te bintic yac acʼambeyic [...]. Hich te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel, ya me scanantaybeyex awoʼtanic soc apensaric ta scuenta te Cristo Jesús» (Filipenses 4:6, 7). Teme ya kalbeytik te Dios te bin ya jmel koʼtantik yuʼun, yame yakʼbotik lamalkʼinal sok yame jnaʼ bin ya jpastik te kʼalal ay tenbil ya kaʼiy jbatik.

Pʼijilal

«Teme ay machʼa mayuc spʼijil yoʼtan, acʼa scʼambe Dios, ma pʼisbiluc nax ya yacʼ stuquel soc mayuc machʼa ya spʼaj, ya me xʼaʼbot yuʼun» (Santiago 1:5). Kʼalal tenbil ya kaʼiy jbatik, ayniwan ma lekuk te bin ya jnoptik spasele. Pero teme ya jkʼanbeytik jpʼijiltik te Dios, ya skoltayotik yuʼun ya sjultes ta koʼtantik tojobteseletik te ayik ta Biblia.

Yip-oʼtanil sok smukʼul kʼinal

«Spisil ya xjuʼ kuʼun ta swenta te Machʼa ya yakʼbon yip koʼtan» (Filipenses 4:13, TNM). Te bitʼil spisil ya xjuʼ yuʼun te Jehová Dios, ya xjuʼ ya yakʼbotik yip koʼtantik yuʼun ya xkujch kuʼuntik-a te wokoliletike (Isaías 40:29). Te Biblia ya yal te Jehová jaʼ «te Dios te ya yacʼ spisil mucʼul-oʼtanil, ha te machʼa ya smucʼubtes qʼuinal caʼiytic ta spisil te jwocoltic» (2 Corintios 1:3, 4).

TE ORASION YA XJUʼ YA SKOLTAYAT

Melel te Jehová maba ya sujat yuʼun ya akʼopon, pero sok skʼuxul yoʼtan ya yalbat te yakuk akʼopone (Jeremías 29:11, 12). Teme ay la akʼopon Dios ta namey, pero jich la awil te maba la awichʼbey sujtibe, mame xchebaj awoʼtan. Te meʼil tatiletik te kʼux ta yoʼtan te yal snichʼnabik, ma spisiluk-ora ya yakʼbeyik te koltayel te kʼalal ya skʼan yoʼtanike. Te meʼil tatiletik jaʼ ya snaʼik te bin-utʼil ta chajpanel. Pero ta melel te lekil meʼil tatiletike, yananix skoltayik-a te yal snichʼnabike.

Te Jehová Dios te Tatil te ay skʼuxul yoʼtan, jaʼnix jich ya skʼan ya skoltayat. Teme ya awil ta lek te tekstoetik yuʼun Biblia te la jnoptikixe sok teme ya apas ta akuxlejale, te Dios yame sutbat te orasion awuʼune (Salmo 34:15; Mateo 7:7-11).

Yaniwan amulan-euk sk'oponel ini

TE J-ILKʼINAL TA TOYOL

Te oración: ¿Yabal skoltayotik?

Te oración ya skoltayotik yuʼun lek ya kaʼiy jbatik, pero te bin mukʼxan skʼoplale jaʼ te ya skoltayotik yuʼun ya xnoptsajotik ta stojol te Diose.

TE J-ILKʼINAL TA TOYOL