Sicaríʼ guniʼbe: «Biaʼ tiempu gucuaaʼ tratamientu para cáncer, stale biaje guizáʼ bidxibeʼ. Peru óraruʼ bineʼ orar Jehová, ratadxí ladxiduáʼ ne racaneni naa guiníʼ ique jneza. Náparuaʼ yuubaʼ, peru ora runeʼ orar riníʼ iqueʼ cosa ni uguu gana naa. Ora rinabadiidxaʼ binni naa ximodo nuaaʼ, rabeʼ laacaʼ: “Huaxiéʼ galán, peru nuaaʼ nayecheʼ”».

Cadi naquiiñeʼ cuézanu guizaacanu xiixa cosa malu para guni orarnu Dios. Guiranu ridxaagalunu problema, naroʼbaʼ o nahuiiniʼ, ne caquiiñenu tu gacané laanu para gudxíʼlunu cani. ¿Ñee racané oración laanu la?

Biblia ná: «Bilaa ni nualuʼ luguiáʼ Jehová, ne laabe zanaazebe lii. Qué ziuu dxi gudiibe lugar guiaba ni runi ni jneza» (Salmo 55:22). ¡Riguu ca diidxaʼ riʼ gana laanu! Yanna, ¿ximodo zanda gacané oración laanu yaʼ? Ora runi orarnu Dios modo riuulaʼdxiʼ, zudiibe laanu ni caquiiñenu para gudxíʼlunu ca problema stinu (biiyaʼ sección ni láʼ « Ni ribeendunu ora runi orarnu»).