¡Wa xkʼanatik jun luʼumkʼinal mas lekxa!
Ja António Guterres, secretario general bʼa Naciones Unidas, yala jachuk: «Ayotik bʼa jun luʼumkʼinal bʼutʼel wokol». ¿Jach maʼ waxa pensaraʼan ja weʼn?
Ja notisyaʼiki wanxta ipaxel:
Ja chamelik sok ja chamelik wa spuku sbʼaj
Ja desgrasyaʼik
Ja pobreʼil sok ja waʼin
Ja jastik wa xya kuxbʼuk ja luʼumi sok ja calentamiento global
Ja mulalik, ja spekʼjel chikʼ sok ja elkʼanel
Ja guerraʼik
Wa xkʼanatik jun luʼumkʼinal mas lekxa, soka jastik it:
Jun lekil sakʼanil
Mixa jel oj jomuk ja tyempo
Oj ajyuk waʼelal bʼa jpetsaniltik
Asyadoxa oj ajyuk ja luʼumkʼinali
Mixa maʼ oj kʼulajukyi bʼa mi stojoluk
Lamanil ja bʼa luʼumkʼinali
Pe ¿jas wa xkʼan kaltik sok jun luʼumkʼinal mas lekxa?
¿Jasa oj ekʼ sbʼaj ja luʼumkʼinal bʼaytiki?
¿Jasa oj bʼobʼ jkʼuluktik bʼa oj ajyukotik bʼa jun luʼumkʼinal mas lekxa?
Yajni xa kʼuman ja rebista it, oja naʼ ja sjakʼjelik wa xyaʼa ja Biblia sbʼaja sjobʼjelik it sok tuk, sok oj yawi smajlajel.