TOUT LÉZÒM

Mi sa Bib-la di: “Bondyé pa té fè [latè-a] pou anyen, mé i té fè’y pou moun wèsté asou’y.”—IZAYA 45:18 NWT.

LATÈ-A

Mi sa Bib-la di: “An jennéwasyon ka pasé èk an lòt jennéwasyon ka vini, mé latè-a kay wèsté pou tout tan.”—ÉKLÉZIYASTIS 1:4 NWT.

SA SA VLÉ DI: Silon Labib, latè-a kay toujou la èk i kay toujou ni moun asou’y. Alò, si sé sa, ki sa lafen di moun yé?

WÉFLÉCHI ASOU SA: Bib-la ka konpawé lafen di moun épi sa ki té fèt an tan Nowé. An tan sala, latè-a té “plen vyolans.” (Jennésis 6:13 NWT) Kanmenm, Nowé té ka fè sa ki dwèt. Apwé an tan, Bondyé voyé an gwo déliz asou latè. Jéhova sové Nowé épi fanmi’y, mé i détwi tout mové moun ki té asou latè-a an tan sala. Lè Labib palé asou sa ki té fèt jou sala i di: “Épi sé menm dlo sala tjèk tan ki pasé ki té détwi latè-a an tan déliz-la.” (2 Pita 3:6) Sa sété bout latè-a ki té ka ègzisté an tan sala. Mé ki sa ki té vwéman péwi? Sé pa té latè-a menm ki té péwi, mé sé mové moun-nan ki té ka viv asou’y. Kon sa, lè Bib-la palé di lafen di moun, sa pa vlé di sé latè-a menm ki kay détwi. Pito sa, i ka palé di bout moun ki méchan èk bout tout sé mové bagay-la ki ka fèt asou latè-a.

PWÒBLENM ÈK MOVÈZTÉ

Mi sa Bib-la di: “Sé méchan-an kay dispawèt touswit. Ou kay las gadé pou yo, mé ou pa kay menm jwenn yo. Mé moun ki ka abésé kò yo kay éwityé tè-a Bondyé té pwonmèt yo-a. Yo kay pwan plézi an kantité lapé-a yo kay ni-an.”—SAM 37:10, 11.

SA SA VLÉ DI: Apwé déliz-la ki té fèt an tan Nowé, movèzté koumansé ankò. Anfen apwé an tan, mové moun koumansé fè lavi pwochen yo minab. Mé tou talè Bondyé kay mennen an bout pou tout movèzté pou tout tan. Sé menm kon liv Samz di: “Sé méchan-an kay dispawèt.” Ki mannyè sa kay fèt? Bondyé kay sèvi Wéyòm li, an gouvèdman ki an syèl, pou fè sa. Wéyòm sala kay détwi lé méchan èk i kay kondwi tout moun ki obéyi Bondyé.

WÉFLÉCHI ASOU SA: Ès ou kwè gouvèdman jòdi kay vwéman vlé aksèpté Wéyòm Bondyé? Non! Bib-la di yo pa kay janmen aksèpté sa. Anfen, menm kon moun ki kouyon, yo kay òpozé Wéyòm Bondyé. (Sam 2:2) Bon, ki sa ki kay wivé yo? Ében, Wéyòm Bondyé kay wiplasé tout gouvèdman latè èk “sé li yonn ki kay wèsté pou tout tan.” (Dannyèl 2:44 NWT) Mé, pou ki wézon Bondyé ni pou tiwé tout gouvèdman lézòm?

Mi sa Bib-la di: “Sé pa dwa an nonm pou désidé ki koté pou mété pyé’y.”—JÉRÉMAYA 10:23 NWT.

SA SA VLÉ DI: Bondyé pa té fè lézòm pou gouvèné kò yo. Yo pa sa ni gouvèné lézòt ni wanjé pwòblenm yo.

WÉFLÉCHI ASOU SA: Yon liv yo kwiyé Britannica Academic di i pa sanm gouvèdman latè sa “wanjé pwòblenm tèl kon pòvté, lafen, maladi, dézas natiwèl, èvèk ladjè ében lòt kalité vyolans.” Liv sala osi di: “Adan moun . . . kwè si la té ni yon sèl gouvèdman ka gouvèné tout péyi, sé lè sala sèlman tout sé pwòblenm sala té kay wanjé.” Kanmenm, menm si tout gouvèdman latè mété tèt yo ansanm, yo pa kay sa wanjé sé pwòblenm-lan. Pouki? Paski yo pyès pa pawfé. Wéyòm Bondyé sé sèl gouvèdman ki ni pouvwa-a pou wanjé tout pwòblenm owon latè pou tout tan.

Alò, silon Labib, lafen di moun ében bout sé vyé bagay-la ki ka fèt asou latè sé pa an bagay bon moun bizwen pè. Okontwè, yo pa sa èspéwé jou sala wivé paski Bondyé kay wiplasé vyé latè sala épi an bèl latè nouvo!

Kanmenm ou pé mandé: Ki jou sa kay fèt? Lòt atik-la kay édé nou wè wépons Bib-la pou kwèsyon sala.