БӘШӘРИЈЈӘТ

Мүгәддәс Китабда дејилир: «Јерә гурулуш верән, ону мөһкәм тәмәл үстдә гуран Халиг, ону бош јерә дејил, јашајыш үчүн» јарадыб (ӘШИЈА 45:18).

ЈЕР КҮРӘСИ

Мүгәддәс Китабда дејилир: «Бир нәсил ҝедир, о бири нәсил ҝәлир, амма Јер әбәди дурур» (ВАИЗ 1:4).

МӘНАСЫ: Мүгәддәс Китаба әсасән, Јер күрәси һеч вахт мәһв олмајаҹаг, орада һәмишә јашајыш олаҹаг. Бәс онда дүнјанын сону дејиләндә нә нәзәрдә тутулур?

ДҮШҮНҮН: Мүгәддәс Китабда бу дүнјанын сону Нуһ пејғәмбәрин дөврүндә баш верән һадисә илә мүгајисә едилир. Һәмин вахт јер зоракылыгла долу иди (Јарадылыш 6:13). Амма Нуһ пејғәмбәр салеһ өмүр сүрүрдү. Буна ҝөрә дә Аллаһ Нуһ пејғәмбәрлә аиләсини сағ сахлады, шәр инсанлары исә дашгын ҝөндәриб мәһв еләди. Һәмин дөврдә баш верән һадисә һагда Мүгәддәс Китабда дејилир: «О вахт мөвҹуд олан бәшәр дашгын сулары алтында галыб мәһв олмушду» (2 Бутрус 3:6). Бунунла да, һәмин дөврдә мөвҹуд олан дүнјаја сон гојулмушду. Бәс нә мәһв едилмишди? Јер күрәси јох, орада јашајан шәр инсанлар. Демәли, Мүгәддәс Китабда дүнјанын сону дејиләндә Јер планетинин мәһв едилмәси нәзәрдә тутулмур. Шәр инсанларын вә онларын тәсис етдији гурулушун мәһви нәзәрдә тутулур.

ӘЗАБ-ӘЗИЈЈӘТ ВӘ ШӘР ӘМӘЛЛӘР

Мүгәддәс Китабда дејилир: «Аз галыб! Артыг пис адам олмајаҹаг, јеринә бахаҹагсан, о, јохдур. Һәлимләр јер үзүнә саһиб олаҹаг, әмин-аманлығын боллуғундан һәзз алаҹаглар» (ЗӘБУР 37:10, 11).

МӘНАСЫ: Нуһ пејғәмбәрин дөврүндәки дашгын дүнјадан пислијин көкүнү һәмишәлик кәсмәди. Дашгындан сонра шәр инсанлар јенә дә дүнјаны аҹынаҹаглы һала салдылар. Амма тезликлә Аллаһ пислијә сон гојаҹаг. Онун Кәламында дејилир: «Артыг пис адам олмајаҹаг». Аллаһ ҝөјдә гурдуғу Падшаһлыг васитәсилә пислијин көкүнү кәсәҹәк. Јер үзүндә јалныз әмәлисалеһ инсанлар јашајаҹаг вә бу Падшаһлыг бүтүн дүнјаны идарә едәҹәк.

ДҮШҮНҮН: Сизҹә, дүнја рәһбәрләри Аллаһын Падшаһлығына табе олаҹаг? Мүгәддәс Китабда дејилир ки, табе олмајаҹаг. Әфсуслар олсун ки, онлар Аллаһын Падшаһлығына гаршы чыхаҹаглар (Зәбур 2:2). Бу нә илә нәтиҹәләнәҹәк? Аллаһын Падшаһлығы инсан һөкумәтләрини «әзиб јох едәҹәк, өзү исә әбәди дураҹаг» (Дәнјал 2:44). Бәс нәјә ҝөрә инсан һакимијјәтинә сон гојулмалыдыр?

Мүгәддәс Китабда дејилир: «Аддымларыны јөнәлтмәк инсанын ихтијарында дејил» (ӘРӘМЈА 10:23).

МӘНАСЫ: Инсанлар бир-бири үзәриндә һакимијјәт сүрмәк үчүн јарадылмајыблар. Онлар башга инсанлары идарә етмәји баҹармырлар, проблемләри һәлл етмәкдә аҹиздирләр.

ДҮШҮНҮН: Бир енсиклопедијада дејилир ки, ајры-ајрылыгда һөкумәтләр «бәшәријјәтә гәним кәсилән јохсуллуғу, аҹлығы, хәстәлији, тәбии фәлакәтләри, мүһарибә вә ја зоракылығы арадан галдыра» билмир. Орада һәмчинин гејд олунур: «Бәзи инсанлар... дүшүнүр ки, бүтүн дүнјаны јалныз бир һөкумәт идарә едәрсә, бу писликләрин көкүнү кәсмәк мүмкүн олар» («Britannica Academic»). Анҹаг бир мәсәлә вар ки, дүнјадакы дөвләтләр бирләшсә дә, дүнјаны јенә дә фани инсанлар идарә едәҹәк. Онлар исә садаланан бу проблемләри арадан галдырмаг игтидарында дејил. Аллаһын Падшаһлығы бүтүн дүнјадакы проблемләри бирдәфәлик арадан галдырмаға гадир олан јеҝанә һөкумәтдир.

Демәли, Мүгәддәс Китаба әсасән, салеһ инсанлар бу шәр дүнјанын сонундан горхмамалыдыр. Әксинә, буну сәбирсизликлә ҝөзләмәлидир! Чүнки дағылыб ҝедән бу көһнә дүнјанын јерини Аллаһын гурдуғу мөһтәшәм јени дүнја тутаҹаг!

Бәс јени дүнја нә заман олаҹаг? Нөвбәти мәгаләдә бу суала Мүгәддәс Китаб әсасында ҹаваб верилир.