GÜRIGIA

Ka tariñagubei Lererun Bungiu? Bungiu “le adügübalin múa, aranseléi, le ederebudagüdübalin, lun haganóun gürigia” (ISAÍASI 45:18).

UBÓU LE ÍDANBEI WAWINWANDA

Ka tariñagubei Lererun Bungiu? “Ru bumuti múa luagu lebu, lun mánhingichun lan lídangiñe lubara” (SÁLUMU 104:5).

KA MINI LUBEI LE? Afuranguagüdatu Lererun Bungiu magünrinchawagunbei lan Ubóu le, ani haganóuba lan gürigia lidan lun súnwandan. Ligíati, ka mini lubéi dan le tadimurehan luagu lagumuchagüle ubóu?

SAMINA HUMÉI LE. Góubaguagüda tumuti Lererun Bungiu lagumuchagüle ubóu le luma le asuseredubei lidan lidaani Noé. Lidan meha dan ligía, “gíbeti anarimeni” ubouagu (Agumesehani 6:13). Lau sun lira, aban meha wügüri úaraguati Noé, ábati lesefuruni Bungiu dandu ligía kei liduheñu, ábati lagünrinchaguniña sun salufuritiña lidan aban guran. Afuranguagüda tumuti Lererun Bungiu le asuseredubei: “Aban lagünrinchaguni Bungiu ubóu meha ligira lau lidunarina guran” (2 Féduru 3:6). Ligía meha lagumuchagülebei ubóu lidan dan ligía. Kati agünrinchawagubei? Mama ubóu, gürigia wuribatiña agünrinchawagubaña. Ligíati, dan tadimurehan Lererun Bungiu luagu lagumuchagüle ubóu, mama tayanuhaña luagu lagünrinchawagun Ubóu le ñein lubéi wawinwanda. Lubaragiñe lira, tayanuhaña luagu hagünrinchawagun gürigia wuribatiña luma lagumuchún lau luriban igaburi le arihúbei ubouagu.

TUROBULI BURÍ LUMA WURIBANI

Ka tariñagubei Lererun Bungiu? “Málühaña ánhaña ua wuribatiña, gayaraabei báluahaniña, ani madaribubaña. Ánhaña ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (SÁLUMU 37:10, 11).

KA MINI LUBEI LE? Magumuti meha guran lidan lidaani Noé lau wuribani sunsuinagubei. Lárigiñe guran, ábaya hagumeserun salufuritiña agadeirei habagari sun gürigia. Yarafa madise lagumuchuba Bungiu lau sun wuribani sunsuinagubei. Kei lariñaguni abürühati Sálumu, “Málühaña ánhaña ua wuribatiña”. Layusurubei Heowá Larúeihan siéluna, lun lagumuchun lau wuribani, aban arúeihani lun sun ubóu le lunbei larúeihaniña gürigia ha gaganbadibaña lun Bungiu.

SAMINA HUMÉI LE. Kábati asusereda hau urúeigu ha lánina ubóu le? Hagundaaruba san ani gaganbadi hagíame lun Larúeihan Bungiu? Ariñagatu Lererun Bungiu mítaranbei lan. Hiñuraguba houngua lun hawügürihóun lun Larúeihan Bungiu (Sálumu 2:2). Ida lubati lagumuchun sun le? Lárügüdübei Larúeihan Bungiu habara sun urúeigu ha ubouagubaña ani “ábame ladurarun lun súnwandan” (Danieli 2:44). Kati uéigiñe mégeiwa lubéi lun lagumuchún hau urúeigu ha lánina ubóu le?

Ka tariñagubei Lererun Bungiu? “Bungiu Heowá, subudi numuti luagu ua lan yu lan lémeri wügüri lun. Úati yu lan lun wügüri le éibugubei ladundehani lupasun guánarügü” (HEREMÍASI 10:23, TNM).

KA MINI LUBEI LE? Madügǘntiña gürigia lau ubafu lun harúeihaniña gürigia háledigu. Wuribati harúeihaniña amu gürigia ani maransehan hamuti burí turobuli le ubouagubei.

SAMINA HUMÉI LE. Ariñagatu enciclopedia Britannica Academic luagu siñagua hamá urúeigu houngua lidan sun burí ageiraü lun “hagumuchun lau ágani kei burí gudemei, ilamaü, sandi, liñawan dan, wuribu luma burí anarimeni”. Ariñagatu giñe: “Añahein gürigia [...] saminatiña, ábanrügüñein lan arúeihani le lánina sun ubóu gayara lagumuchun lau sun lanarime luriban ágani burí le lun súnwandan”. Lau sun lira, íbini hamuga hóundaragun sun urúeigu ha ubouagubaña, kei gafigoun habéi súngubei, mabafutiña lun hagumuchun lau sun turobuli le uágubei wadimureha íñugiñe. Larúeihan Bungiu, ligíarügüñein arúeihani gabafu lun lagumuchun lau sun turobuli le ubouagubei sunsuinagubei.

Arufudahatu Lererun Bungiu, moun lumuti lan hanufudedun gürigia buítiña luagu lagumuchagüle ubóu o luagu lagumuchún luriban igaburi le arihúbei ubouagu. Lubaragiñe lira, buiti uganu le, lugundun ladügüba Bungiu aban iseri ubóu leweñeguame lagübüri ubóu gádeihali le guentobei.

Ídabati lasusereda sun le? Lafuranguagüdübei fánreinti le asigirubei le tariñagubei Lererun Bungiu.