VATHU

Wona ti Bhiblia yi ti wombako: Txizimu “kha txa ma maha [mafu] diphanga, aniko txi ma vangile kasi ku vathu ve zumba ka ona.” —ISAYA 45:18.

MAFU

Wona ti Bhiblia yi ti wombako: “Liveleko la pinda, li txi ta limwani; aniko mafu ma zumba ngu ha ku si gwitiko.”—EKLEZIYASTE 1:4.

TI WOMBA TXANI TONETO: Ngu kuya ngu Bhiblia mafu ma na mbi khundumuswa kambe mbimo yotshe ku na zumba ku di ni wutomi hamafuni. Se Bhiblia yi la kuwomba txani yi txi khene, mafu ma pinda?

PIMISA NGU TIYA: Bhiblia yi fananisa kupinda ka mafu yawa ni ti ti nga maheka ka timbimo ta Nowa. Ka mbimo yoneyo mafu ma ti ‘tate ngu wubihi.’ (Genesisi 6:13) Kambe Nowa ati maha ta tinene. Se Txizimu txi fuvisile votshe vale vo biha ngu kuthumisa ndambi, kambe kha fuvisa Nowa ni mwaya wakwe. Bhiblia yi womba tiya mayelano ni ti ti nga maheka ka ndambi ya Nowa: “Ditiko da yoneyo mbimo di fuvile ngu kumitwa ngu ndambi.” (2 Pedro 3:6) Wona to ndimana yiya yi khene ditiko di fuvisilwe. Kambe nji txani txi nga fuviswa? Hi nga mafu mapune kambe vathu vo biha ava va nga ti hanya hamafuni. Se ngako Bhiblia yi txi wombawomba ngu kupinda ka mafu yawa kha yi wombi kukhundumuswa ka planeta yathu. Kambe yi womba kufuviswa ka vathu vo biha ava va ku hamafuni kumweko ni ti va ti mahako.

SIKARATO NI WUBIHI

Wona ti Bhiblia yi ti wombako: “Ngu mbimoanyana ya yidotho, khu na mbi va wona kambe vabihi; hambi u txi tsimbila u va lava, khu na mbi swa u va wona. Aniko avale vo thutha va na mana mafu va na tsaka, ve hanya ngu kudikha.” —MASALMO 37:10, 11.

TI WOMBA TXANI TONETO: Ti womba ti to ndambi ya Nowa kha ya heta wotshe wubihi. Msana ka ndambi mafu ma tshumete ma va ni sikarato ngu mhaka ya vathu vo biha. Ngu toneto i si nga kale Txizimu txi na fuvisa wotshe wubihi, Masalmo 37 yi womba tiya: ‘Khu na mbi va wona kambe vabihi.’ Txizimu txi na fuvisa wotshe wubihi ngu kuthumisa mfumo wa txona awu wu no fuma wu txi khukhela nzumani wu txi fuma vathu vo lulama hawa hamafuni.

PIMISA NGU TIYA: Ina mifumo ya vathu ayi yi fumako nyamsi wa ditshiku yi na wu tumela mfumo wa Txizimu? Bhiblia yi womba ti to mifumo yoneyo yi na mbi tumela mfumo wa Txizimu ni ku yi na wu wukela. (Masalmo 2:2) Se ngu yihi txhatxhazelo va no yi mana? Mfumo wa Txizimu wu na vhaleta yotshe mifumo ya vathu ni ku wona wu na ‘zumba ngu ha ku si gwitiko.’ (Dhaniyeli 2:44) Se ngu kutxani mifumo ya vathu yi di fanete kufuviswa?

Wona ti Bhiblia yi ti wombako: “Nzila ya m’thu kha yi nga mtamoni kwakwe. Kambe m’thu kha sikoti kululamisa mazambo akwe.”—JEREMIYA 10:23.

TI WOMBA TXANI TONETO: Ti womba ti to vathu kha va mahelwa ku ve ti fuma vapune. Vona kha va na kusikota kufuma vamwani hambi kululamisa sikarato sa vona va fumako.

PIMISA NGU TIYA: Dibhuku da Britannica Academic di womba ti to mifumo ya vathu yi nge si koti “kululamisa sikarato so fana ni wusiwana, nzala malwati, tiphango ta mtumbuluko, tiyimbi ni tixanisa timwani.” Yona yi tshumela yi womba tiya: “Vamwani va kholwa ti to mfumo wa hamafuni kotshe ngu wona wu nga sikotako kufuvisa sotshe sikarato.” Kambe hambi i di ti to mifumo ya hamafuni kotshe yo pfana yi va mfumo wumwewo mafu ma ndi na simama me fumwa ngu vathu ava va mahako sigoho se va si na kusikota kufuvisa sikarato si hi nga bhula ngu sona. I Mfumo wa Txizimu dwe awu wu nga sikotako kululamisa sotshe sikarato hamafuni da magwito.

Se ngu toneto, ngako Bhiblia yi txi womba-womba ngu kupinda ka mafu yawa i ku kufuviswa ka wubihi wotshe, vathu va vanene kha va fanela kuthava nguko kha va na mba ta fuviswa. Phela ayiya i thenga yo tsakisa nguko mafu yawa ma nga tala ngu sikarato ma na vhaletwa ngu mafu a maphya a Txizimu!

Se toneto ti na maheka ditshiku? Gondo ayi yi londiselako yi na xamula txiwotiso txonetxo.