Minung

Baibal chimmi: Pathian nih “vawlei cu thetse ram, ram pakpalawng ah a ser lo, minung umnak caah a ser.” —ISAIAH 45:18.

Vawlei Jo

Baibal chimmi: “Chankhat cu a liam, a dang chankhat a hung chuak ve, sihmanhsehlaw vawlei cu a sining ṭhiamṭhiam khan a hmun zungzal ko.”—PHUNGCHIMTU 1:4.

ZEI SULLAM DAH A SI?: Baibal ningin vawlei cu zeitikhmanh ah hrawh a si lai lo i mah ah mi pawl cu an um zungzal lai. Cucaah vawlei a dong lai timi cu zei sullam dah a si?

RUATHMANH: Baibal nih hi vawlei donghnak caan kha Noah chan ah a cangmi thil he a tahchunh. Mah lio caan ah vawlei cu “sualnak” in a khat. (Genesis 6:13) Asinain Noah cu miding a rak si. Cucaah Pathian nih Noah le a chungkhar pawl cu a khamh ko hna nain miṭhalo pawl cu buanchukcho in a rak hrawh hna. Mah caan lioah a cangmi kong kha cherhchanh in Baibal nih hitin a ti: “Vawlei hlun a hrawktu cu ti ṭhiamṭhiam, buanchukcho ti kha a si.” (2 Peter 3:6) Mah cu vawlei donghnak a rak si. Asinain zeidah hrawh a rak si? Vawlei kha si loin vawleicung ah a ummi miṭhalo pawl tu kha an si. Cucaah Baibal nih vawlei cu a dong lai tiah a ti tikah vawlei jo hi hrawh a si lai a ti duhnak a si lo. Vawleicung ah a ummi miṭhalo pawl le hi vawlei thil sining pawl donghnak kha a chim duhmi a si.

Buaibainak Le Ṭhatlonak

Baibal chimmi: “Luklak ah miṭhalo cu an lo ko lai, na kawl hna hmanhah na hmu kho hna lai lo. Sihmanhsehlaw mi toi ah aa dormi cu ram chungah hin him tein an um lai i daihnak kha tlamtling tein an hmuh lai.”—SALM 37:10, 11.

ZEI SULLAM DAH A SI?: Noah chan i Buanchukcho nih miṭhalo pawl kha voikhatte ah a hrawk dih hna lo. Buanchukcho hnuah miṭhalo pawl nih mi kip kha an nunnak ah harnak an pek ṭhan hna. Asinain a rauhhlan ah Pathian nih ṭhatlonak kha a donghter dih cang lai. Salm caṭialtu pa nih hitin a ti: “Miṭhalo cu an lo ko lai.” Pathian nih a nawl a ngaimi pawl vancung in a uk dingmi vawlei cozah a simi a Pennak thawngin ṭhatlonak vialte kha a donghter dih lai.

RUATHMANH: Vawlei uktu hna nih Pathian Pennak kha lungtho tein an bawm lai maw? Baibal nih an bawm lai lo tiah a ti. Annih nih hrut ngaiin Pathian Pennak kha an ralchanh lai. (Salm 2:2) A phichuak cu zeidah a si lai? Pathian Pennak nih minung cozah vialte kha a airolh dih hna lai i cu pennak cu “zungzal in a hmun lai.” (Daniel 2:44) Asinain minung uknak cu zeicah a dongh a herh?

Baibal chimmi: “Minung nih a zulhmi a lam hi amah nih aa thimmi a si lo i a nun chung i a kalnak lam zong hi amah nih aa ser khawhmi an si lo.”—JEREMIAH 10:23.

ZEI SULLAM DAH A SI?: Minung cu anmah tein i uk kho dingin ser an si lo. Cucaah midang kha ṭha tein an uk kho hna lo i an buaibainak zong kha ṭha tein an tawngthampiak kho hna lo.

RUATHMANH: Britannica Academic timi cauk nih cozah kip nih “sifah harnak, mangṭam, zawtnak, leiser ral le raltuknak asiloah zaangennak ti bantuk buaibainak hna hi an tawngtham kho lomi a lo” tiah a ti. Cun hitin a ti chap: “Mi cheukhat nih . . . vawlei cozah pakhat lawng nih cu bantuk buaibainak hna kha zungzal in a tawnghtham khawh lai tiah an zumh.” Asinain minung cozah dihlak cu an lung aa rual hmanhah a tling lomi uktu an si caah a cunglei ah langhtermi buaibainak vialte kha an tawngtham kho lo. Pathian Pennak lawng hi vawleicung ah a ummi buaibainak vialte a tawngtham khotu cozah a si.

Cucaah Baibal chimmi ningin hi vawlei ṭhalo donghnak cu miṭha pawl nih an ṭih dingmi a si lo. Mah canah a rawkralmi hi vawlei hlun cu Pathian vawlei thar nih a airawlh cang lai caah mah cu thawngṭha a si.

Mah cu zeitikah dah a si lai? A hnu capar ah Baibal a phi kha a fianter lai.