JIÑI LAC PIʼɅLOB

¿Chuqui miʼ yʌl jiñi Biblia? Dios «mach lolomic tsiʼ mele pañimil. Tsiʼ mele chaʼan i chumlib winicob» (ISAÍAS 45:18).

ILI PAÑIMIL

¿Chuqui miʼ yʌl jiñi Biblia? «Miʼ yilan pañimil, miʼ chʌmel. I yalobil miʼ chʼʌmben i yajñib. Pero jini lum an tiʼ pejtelel ora» (ECLESIASTÉS 1:4).

¿CHUQUI YOM I YɅL ILI? Jiñi Biblia miʼ yʌl chaʼan ili Pañimil (Lum) maʼañic mi caj i jilel i chaʼan añʌch majqui mi caj i chʌn chumtʌl. Cheʼ jiñi, ¿chuqui yom i yʌl cheʼ miʼ taj ti tʼan i jilibal pañimil?

ÑATANCU ILI: Jiñi Biblia miʼ lajin i jilibal pañimil yicʼot jiñi tsaʼ bʌ ujti tiʼ yorajlel Noé, ti jimbʌ ora «tsaʼ pʼojli jontolil tiʼ pejtelel pañimil» (Génesis 6:13). Noé tsaʼʌch i jacʼbe i tʼan Dios, jin chaʼan Dios tsiʼ colta yicʼot i familia. Pero tsiʼ jisa jiñi jontoloʼ (mañajoʼ) bʌ ti jiñi ñuc bʌ Butʼjaʼ. Jiñi Biblia miʼ yʌl chuqui tsaʼ ujti ti jimbʌ ora: «Tsaʼ jejmi jini pañimil am bʌ ti oñiyi tiʼ yorajlel butʼjaʼ» (2 Pedro 3:6, I tʼan Dios). Cheʼ bajcheʼ ili, tsaʼ jili jiñi pañimil ti jimbʌ ora. Pero ¿chuqui jiñi tsaʼ bʌ jili? Mach jiñic jiñi Lum, jiñʌch jontol bʌ lac piʼʌlob. Jin chaʼan, cheʼ bʌ jiñi Biblia miʼ taj ti tʼan chaʼan mi caj i jisʌntel ili pañimil mach jiñic woli (choncol) i taj ti tʼan ili Lum, woliʼ taj ti tʼan jontol bʌ lac piʼʌlob yicʼot jiñi mach bʌ weñic chuqui an i meleyob (chaʼleyob).

JIÑI WOCOL YICʼOT JONTOLIL TAC

¿Chuqui miʼ yʌl jiñi Biblia? «Mach jalix mi caj i jilel jini mach bʌ anic miʼ ñop Dios. Cheʼ mi caj a qʼuel jini xjontolil mach yaʼix an. Jini utsoʼ bʌ i pusicʼal mi caj i yʌqʼuentelob i wenlel. Tijicña mi caj i yubiñob cheʼ ñʌchʼʌlob i pusicʼal» (SALMO 37:10, 11).

¿CHUQUI YOM I YɅL ILI? Jiñi ñuc bʌ Butʼjaʼ tiʼ yorajlel Noé maʼañic tsiʼ yoque jisa jiñi jontolil, come jiñi jontol bʌ lac piʼʌlob tsaʼ caji i bej melob mach bʌ weñic. Pero tsʼitaʼ jax yom chaʼan Dios miʼ yoque jisan jiñi jontolil. Cheʼ bajcheʼ tsiʼ yʌlʌ jiñi salmista, jiñi jontoloʼ bʌ mi caj i jilelob. Dios mi caj i cʼʌn i Yumʌntel chaʼan miʼ jisan jiñi jontolil, jumpʼejl yumʌntel am bʌ ti panchan muʼ bʌ caj i chaʼlen yumʌntel tiʼ tojlel muʼ bʌ i jacʼbeñob i tʼan Dios.

ÑAʼTANCU ILI: ¿Chuqui mi caj i yujtel tiʼ tojlel jiñi yumʌlob? ¿Muʼ ba caj i coltʌbeñob i Yumʌntel Dios? Jiñi Biblia miʼ yʌl chaʼan maʼañic, come mi caj i contrajiñob (Salmo 2:2). ¿I chuqui mi caj i yujtel? Jiñi i Yumʌntel Dios mi caj i yochel tiʼ qʼuexol pejtelel yumʌntel am bʌ ti pañimil i jiñʌch «mi caj i yajñel tiʼ pejtelel ora» (Daniel 2:44). Pero ¿chucoch yom miʼ cʌy i melob i yeʼtel jiñi yumʌlob?

¿Chuqui miʼ yʌl jiñi Biblia? Jiñi wiñic «mach mejlic i bajñel yajcan i bijlel» (JEREMÍAS 10:23).

¿CHUQUI YOM I YɅL ILI? Jiñi wiñicob maʼañic tsaʼ mejliyob chaʼan miʼ chaʼleñob yumʌntel tiʼ tojlel yambʌlob. Jin chaʼan maʼañic mejlem i chaʼleñob yumʌntel yicʼot maʼañic mejlem i tojʼesañob jiñi wocol tac.

ÑAʼTANCU ILI: Jiñi enciclopedia Britannica Academic miʼ yʌl chaʼan pejtelel jiñi yumʌlob «mach mejlic i jisañob jiñi wocol tac cheʼ bajcheʼ jiñi pʼumpʼuñiyel, wiʼñal, icʼ jaʼal yicʼot yujquel lum, guerra tac yicʼot yan tac bʌ jontolil». Miʼ bej al: «An muʼ bʌ i ñaʼtañob chaʼan jumpʼejl jach yumʌntel tiʼ petol pañimil miʼ mejlel i jisan ili wocol tac tiʼ pejtelel ora». Anquese muqʼuic i temob i bʌ jiñi yumʌlob, maʼañic miʼ mejlel ti jilel jiñi wocol tac tsaʼix bʌ la cʌlʌ come bej wiñicob jach woliyoʼ (yʌqueloʼ) bʌ ti yumʌntel. Cojach jiñi i Yumʌntel Dios am bʌ i pʼʌtʌlel chaʼan miʼ mejlel i jisan jiñi wocol tac am bʌ tiʼ pejtelel pañimil.

Jin chaʼan cheʼ bajcheʼ miʼ yʌl jiñi Biblia, jiñi mach bʌ jontolobic mach yomic miʼ bʌcʼñañob i jilibal ili pañimil. Yom tijicñayob come ili jontol bʌ pañimil mi caj i qʼuextʌntel ti tsijiʼ bʌ pañimil.

¿Jala miʼ cajel iliyi? Yaʼ ti yambʌ artículo mi caj i tsictesan muʼ bʌ i yʌl jiñi Biblia.