Egga Kari i Panuppalan na Mundo?
Awayya na nga ammum i meyannung ta panuppalan na mundo nga nakagi ta Biblia. (1 Juan 2:17) Kayà na kari kagian nga mapawan i totolay taw ta mundo? Mapawan kari i ngamin nga inango ta planeta nga Davvun onu interamente nga madaral yaw?
PAREHU NGA ARI I TABBAG TAW NA BIBLIA!
Anni i Ari nga Manuppal?
NGAMIN NGA TOTOLAY
I kagian na Biblia: I Dios “arianna pinaratu [i davvun] nga awan tu sesserbi na, ngem kiningngua na yaw tapenu paddianan.”—ISAIAS 45:18.
PLANETA NGA DAVVUN
I kagian na Biblia: “Mappasa i tadday nga henerasion, mappapange gapa i tadday nga henerasion, ngem mattalupaddian tu mannanayun i davvun.”—ECLESIASTES 1:4.
I KAYÀ NA KAGIAN: Segun ta Biblia, ari vuluvuga nga madaral i davvun anna kanayun nga egga i maddian taw. Anni gafu i kayà kagian na panuppalan na mundo?
NONOPAMMU: Nikumpara na Biblia i mappapange nga panuppalan naw nga mundo ta nesimmu ta kaggawan ni Noe. Ta tiempo na, “napannu i davvun tu kinavayolente.” (Genesis 6:13) Ngem matunung si Noe yari tu nipaliag yayya na Dios anna i familia na, ngem zinaral na Dios i marake nga totolay gukaban na dakal nga danum. Kunnaw i kagian na Biblia nga nesimmu ta tiempo da: “Danum gabbalaman i negafuanan na nikadaral nuri na ollu nga naparo nga davvun turi ta naddelubio.” (2 Pedro 3:6) Yatun i panuppalan na davvun onu mundo ta tiempo da. Ngem anni i nadaral? Ari tu i davvun, nu ari i marake nga totolay. Nu kagian gafu na Biblia i meyannung ta panuppalan na mundo, ari na kayà kagian nga madaral i planeta. I marake nga totolay ta davvun anna i institusion ira nga nipataddag da i manuppal onu mapawan.
Anni Noka i Manuppal?
PROBLEMA ANNA KINARAKE
I kagian na Biblia: “Ta ari nga mabbayag, i marakay ira ay mapawan; maski aleram-mu ira ay ariam-mu ira nga maleran; ngem i minappakalinno ay irensiad-da i davvun, anna mattolay ira ta imammo nga mannanayun.”—SALMO 37:10, 11.
I KAYÀ NA KAGIAN: Ari nga permanente nga napawan i kinarake kabalin na Delubio ta tiempo ni Noe. Kabalin na Delubio, nabbalin mangana tu miserable i pattolay megafu ta marake nga totolay. Ngem aranni ngana nga permanente nga pawanan na Dios i kinarake. Kagitta na kinagi na salmista: “I marakay ira ay mapawan.” Panuppalan na Dios i kinarake gukaban na Pappatulan na—tadday nga gobiernu ta langi nga mammaguray ta minattuppal nga totolay.
NONOPAMMU: Suportan kari na mammaguray ira ta mundo i Pappatulan na Dios? Kagian na Biblia nga ari. Itagga da nga kontran i Pappatulan na Dios. (Salmo 2:2) Anni i resulta naw? Talianan na Pappatulan na Dios i ngamin nga gobiernu na totolay, anna “yaw laman i mattalupaddian adde noka.” (Daniel 2:44) Ngem ngatta mawag nga manuppal i pammaguray na totolay?
MAWAG NGA MANUPPAL i Pammaguray na Tolay
I kagian na Biblia: “Ari nga mawayya na tolay nga lumalakag nga itunung maski i dakkua na.”—JEREMIAS 10:23.
I KAYÀ NA KAGIAN: Ari nga naparatu i totolay tapenu pammagurayan i kasittoleda. Ari tu makasta i pammagureda ta totolay anna ari da masolba i problema ira.
NONOPAMMU: Kagian na Britannica Academic nga gitta na imposible ta kada gobiernu nga “masolba i problema ira gitta na ziga, bisin, taki, kalamidad, anna gerra onu kinavayolente.” Kunna paga: “Mangurug i karuan . . . nga masolba yaw ira nga problema nu tattadday laman i gobiernu ta interu mundo.” Ngem maski paga mattaradday i ngamin nga gobiernu na totolay, imperfekto lapa i totolay nga mammaguray. Ari da mawayya nga masolba danaw ira nga problema. I Pappatulan na Dios laman i gobiernu nga permanente nga makasolba ta ngamin nga problema ta mundo.
Segun ta Biblia, ari nakuan nga maganassing i masippo nga totolay ta panuppalan na mundo—i maddaggun nga marake nga sistema na ganna-gannug. Iinnaggattam lallagu yatun megafu ta talianan na makakkasta nga bagu nga mundo na Dios yaw nga nadaral anna dana nga mundo!
Sonu anni nga mesimmu danaw? Mepakanawag ta tumunug nga artikulo i tabbag na Biblia.
